Solapur Social Foundation

सोलापूर सोशल फाउंडेशन यांच्या वतीने दक्षिण सोलापूर तालुक्यात बालसंस्काराची चळवळ अधिक बळकट करण्याच्या उद्देशाने आज एक महत्त्वपूर्ण बैठक पार पडली. ही बैठक मा. आमदार सुभाष (बापूसाहेब ) देशमुख यांच्या उपस्थितीत आयोजित करण्यात आली होती.

या बैठकीस तालुक्यातील विविध आध्यात्मिक क्षेत्रातील मान्यवरांनी उत्स्फूर्त सहभाग नोंदवला. यावेळी येत्या काही वर्षांत दक्षिण सोलापूर तालुका “बालसंस्काराचा आदर्श तालुका” म्हणून विकसित करण्याचे उद्दिष्ट निश्चित करण्यात आले.

सध्या वडापूर, आनंद नगर, साडेपूर, अकोले (मंद्रूप) या गावांमध्ये बालसंस्काराचे कार्य नियमितपणे सुरू असून, त्याचे सकारात्मक परिणाम दिसून येत आहेत. त्याच धर्तीवर उर्वरित गावांमध्येही हा उपक्रम विस्तारण्याचा निर्धार यावेळी व्यक्त करण्यात आला.

बैठकीदरम्यान सर्वांच्या सहकार्याने आगामी पिढी घडविण्याच्या दृष्टीने सातत्यपूर्ण प्रयत्न करण्याबाबत सकारात्मक चर्चा करण्यात आली. तसेच भजनी मंडळे, आध्यात्मिक संस्था व सामाजिक कार्यकर्त्यांच्या माध्यमातून हा उपक्रम अधिक प्रभावीपणे राबविण्याचा विश्वास व्यक्त करण्यात आला.

या बैठकीमुळे दक्षिण सोलापूर तालुक्यात बालसंस्काराची व्यापक व संघटित चळवळ उभारण्यास नवी दिशा मिळाल्याचे मत उपस्थितांनी व्यक्त केले.

भंडीशेगाव येथील ऐतिहासिक श्रीमंत बाजीराव पेशवे विहीर सुशोभीकरण शुभारंभ !

📍भंडीशेगाव

भंडीशेगाव (ता. पंढरपूर) येथील ऐतिहासिक श्रीमंत बाजीराव पेशवे विहीर येथे सुशोभीकरणाच्या कामाचा शुभारंभ आ. सुभाष बापू देशमुख यांच्या हस्ते उत्साहात व भक्तिमय वातावरणात पार पडला.

देहू - आळंदी - पंढरपूर या पवित्र पालखी मार्गावर वसलेली ही प्राचीन बारव वारकरी संप्रदायासाठी अत्यंत महत्त्वाचे श्रद्धास्थान आहे. संत परंपरेचा अखंड वारसा जपत दरवर्षी लाखो वारकरी या मार्गावरून पायी प्रवास करतात. विशेषतः संत ज्ञानेश्वर महाराज यांच्या पालखी सोहळ्यातील उभे व गोल रिंगण याच ठिकाणी पार पडत असल्याने या स्थळाचे आध्यात्मिक महत्त्व अधिक अधोरेखित होते.

111 फूट लांबी, 18 फूट रुंदी आणि 65 फूट खोली तसेच 62 पायऱ्या व 6 टप्प्यांची रचना असलेल्या या ऐतिहासिक विहिरीचे जतन व संवर्धन करत तिला अधिक आकर्षक स्वरूप देण्याच्या दृष्टीने सोलापूर सोशल फाउंडेशनच्या पुढाकारातून यापूर्वीही सुशोभीकरण व वृक्षारोपण करण्यात आले आहे.

या ठिकाणाचा सर्वांगीण विकास करून ते भाविकांसाठी सोयीस्कर, आकर्षक पर्यटनस्थळ तसेच वारकरी परंपरेचा अभ्यास व अनुभव घेण्यासाठी प्रेरणादायी उद्यान केंद्र म्हणून विकसित करण्याचा संकल्प करण्यात आला आहे.

या उपक्रमामुळे भाविकांसाठी सुविधा वाढणार असून, वारकरी संप्रदायाचा समृद्ध सांस्कृतिक वारसा पुढील पिढ्यांपर्यंत पोहोचवण्यास मोठी चालना मिळणार आहे.

यावेळी जि.प. सदस्य मा. संतोष बागल , उद्योजक श्री. अजित कंडरे, सरपंच श्री. गणेश पाटील, श्री. अनंता चव्हाण, डॉ. श्रीधर यलमार, श्री. गणेश बागल, सायकल असोसिएशनचे सायकलर्स व पदाधिकारी तसेच ग्रामस्थ मोठ्या संख्येने उपस्थित होते.

#वारकरीसंप्रदाय