Nalam Hospital

சமீபத்தில் நண்பர் ஒருவர்
இதை ஒத்த சந்தேகம் கேட்டிருந்தார்
மாஸ்டர் ஹெல்த் செக் அப் முடித்து விட்டு
சிறுநீரக செயல்பாடு குறைபாடு இருக்கவே
நெஃப்ராலஜிஸ்ட் ( சிறுநீரக சிறப்பு நிபுணர்) அவரை அதிகப்படியாக நீர் அருந்த வேண்டாம் என்றும் தினம் பருகும் நீரைக் கட்டுப்பாடுடன் பருக அறிவுறுத்தியிருக்கிறார்.

அதற்கடுத்து குடல் நோய் சிறப்பு நிபுணரின் ஆலோசனையை அவர் மலச்சிக்கலுக்காக பெறும் போது அதிகமாக நீர் அருந்துங்கள் என்றும் அதன் மூலம் மலச்சிக்கல் குணமாகும் என்று அவர் அறிவுரை பகிர்ந்ததாகப் பதிவு செய்து

மருத்துவர்களுக்குள் ஏன் இந்த முரண்
ஒவ்வொரு மருத்துவரும் ஒவ்வொரு மாதிரி நேர் எதிர் அறிவுரைகளைக் கொடுத்தால்
நோயர்கள் குழப்பமடைய மாட்டார்களா?
என்று நியாயமான கேள்வியை எழுப்பியிருந்தார்.

இதே போன்று பல இடங்களில் சிக்கல் ஏற்படும்...

உடல் எடை குறைப்பு / நீரிழிவு நோய் சிறப்பு நிபுணர்
தினசரி நான்கு கிலோமீட்டர் நடப்பது உடல் எடை குறைப்பதற்கு நல்லது என்று கூறியிருப்பார்

ஆனால் எலும்பியல் சிறப்பு நிபுணர்
மூட்டுத் தேய்மானம் காரணமாக அதிகம் நடக்க வேண்டாம் என்று அறிவுறுத்தியிருப்பார்.

பொது மருத்துவர் - விட்டமின் டி பெறுவதற்கு வெயிலில் சற்று நேரம் நிற்பது நல்லது என்றிருப்பார்.

தோல் மருத்துவத்துக்கு சிகிச்சை செல்லும் போது தோல் மருத்துவர் - வெயில் மேலே படுவதால் அலர்ஜி வருகிறது எனவே நேரடி வெயிலை தவிர்க்கவும் என்பார்.

இத்தகைய "முரண்கள்" மருத்துவ சிகிச்சையில்
இயல்பானவையே
இயற்கையானவையே.

இவற்றை இனங்கண்டு களைவது
என்பது மிகவும் எளிதானது.

இதற்கு மருத்துவ அறிவில் நுண்புலம் பெற்றிருக்க வேண்டிய அவசியம் இல்லை.

இதோ மேற்கூறிய மூன்று நிகழ்வுகளிலும் எப்படி தெளிவு பெற வேண்டும் என்று கூறுகிறேன்

பொதுவாக
மருத்துவத் துறையைப் பொருத்தவரை

எம்பிபிஎஸ் பயின்ற மருத்துவர்களுக்கு அவர்கள் பயிலும் போது கூறப்படும் விஷயம்
" உங்களுக்கு மருத்துவத் துறை சார்ந்த அனைத்தைப் பற்றியும் அடிப்படை அறிவு இருக்க வேண்டும்"(SOMETHING ABOUT EVERYTHING) "

எம்டி / எம்எஸ் (MD/MS) பட்டமேற்படிப்புகளில் ஒரு துறையைத் தேர்ந்தெடுத்து அதைப் பற்றி அக்குவேறு ஆணிவேராகப் படித்து பட்டம் பெறுகிறோம்.
இது அந்தத் துறை பற்றி அனைத்தையும் கற்றுத் தேர்ந்திருக்க வேண்டும் என்ற நிலையில் வருகிறது ( EVERYTHING ABOUT SOMETHING)"

எம்சிஹெச்/ டி எம் உள்ளிட்ட சிறப்பு பட்டமேற்படிப்பு பயின்றவர்கள்
குறிப்பிட்ட துறையில் உள்ள ஒரு குறிப்பிட்ட அம்சத்தைப் பற்றி இன்னும் ஆழமாக அறிவர். இது ( EVERYTHING ABOUT SOMEINTHING INSIDE THAT SOMETHING )

எனவே,
சிறப்பு பட்ட மேற்படிப்பு பயின்ற மருத்துவர்
"சிறுநீரகம்" குறித்து மட்டுமே அறிவுரை கூறுவார். அதற்குக் காரணம்
அவர் தொடர்ந்து சிறுநீரகங்கள் சார்ந்த நோய்கள் , நோயாளிகளைச் சந்தித்து அனுபவத்தையும் அறிவையும் வளர்த்துக் கொள்கிறார்.

"குடல்" சார்ந்த பட்டமேற்படிப்பு பயின்றவர்
அதற்குரிய அறிவுரைகளை அவர் சார்ந்த உறுப்பு சார்ந்த அறிவுரையை வழங்குவது சரியானதே.

நுண்ணோக்கி கொண்டு ஒரு விஷயத்தைப் பார்ப்பதற்கும்

தொலைநோக்கி கொண்டு ஒரு விஷயத்தைப் பார்ப்பதற்கும் உள்ள வித்தியாசம் இது.

நுண்ணோக்கி கொண்டு பார்க்கும் போது
அருகில் உள்ள நுண் பொருளும் பெரிதாகத் தெரியும்

தொலைநோக்கி தூரத்தில் உள்ள பொருளை அருகில் காட்டும்.

இப்போது
முதல் நிகழ்வுக்கு வருவோம்

சிறுநீரக செயல்பாடு குறைகிறது
என்பதால் நீர் குறைத்து அருந்த வேண்டும் என்று சிறுநீரக சிறப்பு நிபுணர்

மலச்சிக்கல் காரணமாக நீரை அதிகமாக அருந்தலாம் என்கிறார் குடல்நோய் சிறப்பு நிபுணர்.

இருவரும் இருவேறு எதிர் எதிர் கருத்துகளைக் கூறியிருந்தாலும்
நோயாளி எளிதில் இந்த விஷயத்தில் அறிவார்ந்த ஒரு முடிவுக்கு வர முடியும்.

அதாவது உள்ளுறுப்புகளில் முக்கியமானதாக இருக்கும் சிறுநீரகம் சுமை தாங்க இயலாமல் இருக்கிறது எனவே நாம் சிறுநீரக நிபுணர் கூறிய அறிவுரையை ஏற்க வேண்டும்.

குடல் நோய் நிபுணரிடம் இதனை எடுத்துக் கூறி , சிறுநீரக மருத்துவர் நீர் அதிகம் அருந்தக் கூடாது என்று கூறியிருக்கிறார் என்பதை எடுத்துக் கூறினால்
மலச்சிக்கலுக்குரிய அடுத்த சிகிச்சைகளை பரிந்துரைப்பார்.

ஒரு மருத்துவர் நன்றாக நடை பயிற்சி மேற்கொள்ளுங்கள் என்று கூறினால்
எலும்பு மருத்துவர் மூட்டுத் தேய்மானம் இருப்பதைக் கூறியிருப்பதை எடுத்துக் கூறி தன்னை நடக்கக் கூடாது என்று அவர் அறிவுரை கூறியிருப்பதை எடுத்துக் கூறி மாற்று சிகிச்சையைப் பெற வேண்டும்.

வெயிலில் நின்றால் விட்டமின் டி கிடைக்கும் என்பது பொதுவான அறிவுரை
ஆனால் தான் வெயிலில் இருந்தால் அலர்ஜி வருவதும் அதற்கு சரும நோய் நிபுணர் வெயிலில் நிற்கக் வேண்டாம் என்று அறிவுறுத்தியிருப்பதை
மருத்துவரிடம் கூறினால் விட்டமின் டி சப்லிமெண்ட்ஸ் வழங்குவார்

என்னைப் பொருத்தவரை
அந்தந்த உறுப்புகள்
அந்தந்த உடல் இயக்க மண்டலங்களுக்கான சிறப்பு பட்டமேற்படிப்பு மருத்துவர்கள் வழங்கும் சிகிச்சை முறைகளை
ஒருங்கிணைத்து ஒன்றுடன் மற்றொன்று
முரண்படாமல் தங்களின் சந்தேகங்களை கேட்டறிந்து சிகிச்சை பெறுவது
நோயரின் பொறுப்பாகும்.

அதை நோயர் சரிவரச் செய்ய இயலாமல் இருக்கும் நிலையில், மருத்துவத் துறையில் அனைத்து துறைகள் பற்றியும் அடிப்படை ஞானம் கொண்ட
குடும்ப நல மருத்துவர்
இத்தகைய பல்வேறு சிறப்பு மருத்துவர்கள் தரும் சிகிச்சையை ஒருங்கிணைத்து ஒன்றுக்கொன்று முரண்படாத கடைபிடிக்கத்தக்க அறிவுரைகளை வழங்கும் பணியைச் செய்யலாம்.

நன்றி

Dr.அ.ப.ஃபரூக் அப்துல்லா
பொது நல மருத்துவர் .