Prof.K.M.Chandy Foundation

ഇന്ദിര പ്രിയദർശിനി ഫോറത്തിന്റെ ഉദ്ഘാടനം മുൻ. കെ. പി.സി.സി. പ്രസിഡന്റും, കേരള രാഷ്ട്രീയത്തിലെ നിർഭയനായ നേതാവുമായ ശ്രീ. K Muraleedharan നിർവ്വഹിക്കുകയുണ്ടായി. ഫോറത്തിൻ്റെ ആദ്യപരിപാടിയായ പ്രൊഫ. കെ.എം. ചാണ്ടി അനുസ്‌മരണം എം.ജി. യൂണിവേഴ്‌സിറ്റി മുൻ വൈസ് ചാൻസലർ ഡോ. സിറിയക് തോമസ് നിർവ്വഹിച്ചു.

Prof.K.M.Chandy Foundation

സമുന്നത കോൺഗ്രസ് നേതാവും കെപിസിസി പ്രസിഡൻ്റും സംസ്ഥാന ഗവർണറുമായിരുന്ന പ്രൊഫ.കെ.എം.ചാണ്ടി സാറിൻ്റെ നൂറ്റിഅഞ്ചാം ജന്മദിനമാണിന്ന്.
വിദ്യാർത്ഥിയായിരിക്കുമ്പോൾ തന്നെ അനീതിക്കെതിരെ നിശ്ചയദാർഢ്യത്തോടെ പ്രതികരിക്കുന്ന മനസ്സായിരുന്നു അദ്ദേഹത്തിൻ്റേത്.
സർ സി.പി.യുടെ വിദ്യാർഥി വേട്ടക്കെതിരെ പ്രതിഷേധിച്ചു കൊണ്ടാണ് ചങ്ങനാശ്ശേരി എസ്ബി കോളേജിൽ ഇൻറർ മീഡിയേറ്റ് വിദ്യാർത്ഥിയായിരുന്ന ആ പതിനേഴുകാരൻ സമരരംഗത്തേക്ക് വന്നത്.
മീനച്ചിൽ താലൂക്ക് കോൺഗ്രസ് കമ്മിറ്റി സെക്രട്ടറിയായിരുന്ന അദ്ദേഹം സ്വാതന്ത്ര്യവും പൗരാവകാശങ്ങളും നേടിയെടുക്കാൻ വേണ്ടിയുള്ള പോരാട്ടങ്ങളിൽ സജീവ പങ്കാളിയായി. അറസ്റ്റും ജയിൽവാസവും അനുഭവിക്കേണ്ടി വരികയും ചെയ്തു.
തിരു-കൊച്ചി നിയമസഭാംഗം, കോൺഗ്രസ് പാർലമെൻ്ററി പാർട്ടി ചീഫ് വിപ്പ് എന്നീ പദവികളിലും അദ്ദേഹത്തിൻ്റെ പ്രവർത്തനം മാതൃകാപരമായിരുന്നു.
ഡിസിസി പ്രസിഡൻ്റ് , കെപിസിസി ജനറൽ സെക്രട്ടറി;ട്രഷറർ തുടങ്ങിയ പദവികൾക്ക് ശേഷമാണ് കെപിസിസി അധ്യക്ഷ പദവിയിലേക്കുയർന്നത്.
ഗവർണർ എന്ന നിലയിൽ ഭരണഘടനയുടെ യഥാർത്ഥ കാവൽക്കാരനായി നീതിപൂർവ്വം പ്രവർത്തിച്ച അദ്ദേഹം ഏവരുടെയും ആദരവിന് പാത്രീഭൂതനായി.
സ്വകാര്യ കോളേജ് അധ്യാപകരുടെ ഡയറക്ട് പെയ്മെൻ്റ് യാഥാർത്ഥ്യമാക്കുന്നതിൽ അധ്യാപക നേതാവായിരുന്ന ചാണ്ടി സാറിൻ്റെ പങ്ക് വളരെയേറെ പ്രധാനപ്പെട്ടതായിരുന്നു.
റബ്ബർ ബോർഡ് ചെയർമാനെന്ന നിലയിൽ കർഷക താൽപ്പര്യം സംരക്ഷിക്കുന്നതിന് ഭാവനാസമ്പന്നവും ദീർഘവീക്ഷണത്തോടു കൂടിയതുമായ പ്രവർത്തനമാണ് അദ്ദേഹം നടത്തിയത്.
കെഎസ്‌യു, യൂത്ത് കോൺഗ്രസ് പ്രവർത്തകരെ വളരെയേറെ പ്രോത്സാഹിപ്പിച്ച നേതാവായിരുന്നു അദ്ദേഹം. പഠന ക്യാമ്പുകളിൽ ചാണ്ടി സാറിൻ്റെ ക്ലാസുകൾ രാഷ്ട്രീയ-സാമൂഹ്യ-സാമ്പത്തിക പ്രശ്നങ്ങളെ കുറിച്ച് ആഴത്തിൽ സ്പർശിക്കുന്നതും ദിശാബോധം നൽകുന്നതുമായിരുന്നു.
കെഎസ്‌യു പ്രവർത്തകനായിരിക്കെ തന്നെ ചാണ്ടി സാറുമായി അടുത്ത ബന്ധമാണ് എനിക്കുണ്ടായിരുന്നത്. വിശക്കുമ്പോൾ ചാണ്ടി സാറിനെ കണ്ടാൽ തന്നെ അതിനു പരിഹാരമാകുമെന്നത് അക്കാലത്ത് ഞങ്ങളുടെ ഇടയിലെ ഉറച്ച വിശ്വാസമായിരുന്നു.
ചാണ്ടി സാറിൻ്റെ സ്നേഹവും വാത്സല്യവും ആവോളം അനുഭവിക്കാൻ അവസരമുണ്ടായ തലമുറയാണ് ഞങ്ങളുടേത്.
മനുഷ്യ സ്നേഹിയും സ്നേഹ ധനനുമായ പ്രിയപ്പെട്ട ചാണ്ടിസാറിൻ്റെ ദീപ്തമായ ഓർമ്മകൾക്ക് മുന്നിൽ പ്രണാമം അർപ്പിക്കുന്നു.