MBA IN CSR

സാമൂഹ്യസേവനവും ബിസിനസ് മാനേജ്‌മെന്റും
കൈകോര്‍ക്കുമ്പോള്‍

CSR (Corporate Social Responsibility)

ഏതൊരു ബിസിനസിന്റേയും കമ്പോളം (market) പൊതുസമൂഹമാണ്. വിവിധ മേഖലകളിലുള്ള ബിസിനസ് സ്ഥാപനങ്ങള്‍ പൊതു വിഭവങ്ങള്‍ ചൂഷണം ചെയ്തുകൊണ്ടാണ് സംരംഭങ്ങള്‍ കെട്ടിപ്പടുക്കുന്നത്. അതുകൊണ്ടു തന്നെ ഇതില്‍ നിന്നും ലഭിക്കുന്ന വരുമാനത്തിന്റെ ഒരു ഭാഗം പൊതുസമൂഹത്തിനു കൂടി അവകാശപ്പെട്ടതാണ്. ആ പങ്ക് പൊതുസമൂഹത്തിന്റെ ഉന്നമനത്തിനായ് ചിലവഴിക്കുമ്പോള്‍ ബിസിനസ്സ് സ്ഥാപനങ്ങളുടെ സാമൂഹിക ഉത്തരവാദിത്തമായി കണക്കാക്കാം. വികസിത രാജ്യങ്ങളില്‍ സാമൂഹിക ഉത്തരവാദിത്തം പലതരം സാമൂഹ്യ സേവന പ്രൊജക്ടുകള്‍ രൂപീകരിച്ച് CSR fund അതിലൂടെ പൊതുസമൂഹത്തിനായി ചിലവഴിച്ചു വരുന്നു.

വികസ്വര രാജ്യമായ ഇന്ത്യയെ പോലുള്ളവയില്‍ CSR വിനിയോഗത്തിന്റെ പ്രാധാന്യം മനസ്സിലാക്കുകയും CSR മേഖല കൂടുതല്‍ ശക്തി പ്രാപിച്ച് വരികയും ചെയ്യുന്നു. 500 കോടി രൂപയുടെ മുകളില്‍ ആസ്തിയോ 1000 കോടി രൂപയുടെ മുകളില്‍ ടേണ്‍ ഓവറോ 5 കോടി രൂപ അറ്റലാഭമോ ഉള്ള കമ്പനികള്‍ അവയുടെ ലാഭത്തിന്റെ 2 ശതമാനം CSR ഇനത്തില്‍ ചിലവഴിക്കാന്‍ നിഷ്‌കര്‍ഷിക്കുന്നു.

CSR മേഖലകള്‍

ബിസിനസ് സ്ഥാപനങ്ങളുടെ പ്രവര്‍ത്തനങ്ങളില്‍ നിന്നുമുള്ള പാരിസ്ഥിതിക ആഘാതം, വിഭവ ചൂഷണം എന്നിവ കണക്കിലെടുത്താണ് മേഖലകള്‍ തിരഞ്ഞെടുക്കുന്നതും പ്രൊജക്ടുകള്‍ രൂപീകരിക്കുന്നതും. പരിസ്ഥിതി സംരക്ഷണം, കാര്‍ബണ്‍ മാലിന്യ നിയന്ത്രണം, ആരോഗ്യ സംരക്ഷണം, ഗ്രാമീണ വികസനം, മാലിന്യ നിര്‍മാര്‍ജ്ജനം എന്നീ മേഖലകളിലാണ് പൊതുവില്‍ CSR ശ്രദ്ധ കേന്ദ്രീകരിക്കുന്നത്. CSR പ്രൊജക്ടുകള്‍ സുസ്ഥിരവികസനത്തെ പ്രദാനം ചെയ്യാന്‍ കഴിയുന്നവയാണ്.

സാമൂഹിക സംരംഭകത്വം (Social Entrepreneurship)

സാമൂഹിക സംരംഭകത്വം ബിസിനസ്സ് സംരംഭകരത്വത്തില്‍ നിന്ന് വ്യത്യസ്തമാണ്. സാമൂഹിക പ്രശ്‌നങ്ങള്‍ക്ക് പരിഹാരം കണ്ടെത്താന്‍ കൂടി ലക്ഷ്യമിടുന്ന തരം സംരംഭങ്ങളെയാണ് സാമൂഹിക സംരംഭങ്ങളായി കണക്കാക്കുന്നത്. സര്‍ക്കാര്‍ തലത്തില്‍ ഇവയ്ക്ക് വലിയ പ്രോത്സാഹനം ലഭിക്കുന്നുണ്ട്. വിവിധ പദ്ധതികളിലായി സാമൂഹികസംരംഭകത്വം ആഗ്രഹിക്കുന്ന വ്യക്തികള്‍ക്കും ഗ്രൂപ്പുകള്‍ക്കും സാമ്പത്തിക സഹായവും ലഭിക്കാം.

സദ്ധ പ്രവര്‍ത്തനങ്ങള്‍ നടത്തുന്ന ഒരുപാട് സ്ഥാപനങ്ങള്‍ നമ്മുടെ നാട്ടിലുണ്ട്. ഇവയില്‍ ഭൂരിഭാഗവും ചാരിറ്റി ലക്ഷ്യത്തോടെ പ്രവര്‍ത്തിക്കുന്നവയാണ്. സോഷ്യല്‍ വര്‍ക്ക് മേഖല എളുപ്പത്തില്‍ മനസ്സിലാക്കാന്‍ സാധാരണയായി ഉപയോഗിക്കുന്ന ഒരു പ്രയോഗം ഉണ്ട്.
''വിശന്നിരിക്കുന്ന ഒരാള്‍ക്ക് നമുക്ക്
മീന്‍ വാങ്ങിക്കൊടുക്കാം, അല്ലെങ്കില്‍
അയാളെ മീന്‍ പിടിക്കാന്‍ പഠിപ്പിക്കാം.
രണ്ടായാലും അയാള്‍ക്ക് ഭക്ഷണം കിട്ടും.
മീന്‍ വാങ്ങിക്കൊടുക്കുന്നത് സന്നദ്ധ സേവനവും
മീന്‍ പിടിക്കാന്‍ പഠിപ്പിക്കുന്നത്
സാമൂഹ്യ സേവനവും ആണ്.''

CSR ഉം സാമൂഹ്യ സേവനവും

Corporate Social Responsibility എത് പൊതുസമൂഹത്തിനും പരിസ്ഥിതിക്കും ഗുണം പകരുന്ന തീരുമാനങ്ങളെടുക്കാനും നടപ്പിലാക്കാനും ഉള്ള ഉത്തരവാദിത്തമാണ്. ഇന്ത്യയില്‍ മാത്രം 16,000-ഓളം കമ്പനികള്‍. കൂടാതെ 1,10,000 ഇന്‍ഡസ്ട്രികളും 2013 ലെ കമ്പനീസ് ആക്റ്റ് ഭേദഗതി പ്രകാരം CSR വിനിയോഗത്തിനായി നിഷ്‌കര്‍ഷിക്കപ്പെട്ടിട്ടുണ്ട്. ഈ സ്ഥാപനങ്ങള്‍ പ്രതിവര്‍ഷം 27,000 കോടി രൂപയോളം CSR ഇനത്തില്‍ ചിലവഴിക്കുന്നുണ്ട്. ഇന്ത്യയില്‍ ടാറ്റാ ഗ്രൂപ്പ് മാത്രം പ്രതിവര്‍ഷം 1000 കോടി രൂപയോളം CSR ഇനത്തില്‍ ചിലവഴിക്കുന്നു.

CSR ന്റെ മാനേജ്‌മെന്റ് തലം

സ്ഥാപനങ്ങളുടെ സാമൂഹിക പ്രതിബദ്ധതയായി CSR പ്രൊജക്റ്റുകളെ നിഷ്‌കര്‍ഷിക്കപ്പെടുമ്പോഴും അതിലൂടെയുള്ള പരസ്യ സാധ്യത മാറ്റി നിര്‍ത്താനാവില്ല. നിലവില്‍ NGO കളും സോഷ്യല്‍ വര്‍ക്കര്‍മാരും സാമൂഹസേവന മനോഭാവം ഉള്‍ക്കൊണ്ട് CSR പ്രൊജക്ടുകള്‍ രൂപീകരിക്കുമ്പോള്‍ അവയിലെ ന്യായമായ ബിസിനസ്സ് സാധ്യത അവഗണിക്കപ്പെടാം. അതിനാല്‍ തന്നെ ബിസിനസ്സ് അറിവോടുകൂടി മാനേജ്‌മെന്റ് തന്ത്രങ്ങളുപയോഗിച്ച് രൂപീകരിക്കുന്ന CSR പ്രൊജക്റ്റുകളാണ് അഭികാമ്യം. നിലവില്‍ NGO കളാണ് കൂടുതലായും CSR പ്രൊജക്റ്റുകള്‍ ഏറ്റെടുത്ത് നടപ്പിലാക്കുന്നത്. ഇവയില്‍ കൃത്യമായ മാനേജ്‌മെന്റ് തന്ത്രങ്ങളോടെ പ്രൊജക്റ്റുകള്‍ ബിസിനസ്സ് സ്ഥാപനങ്ങള്‍ക്ക് അഭികാമ്യമായ രീതിയില്‍ ഫലപ്രദമായി നടപ്പിലാക്കുന്നതില്‍ പ്രത്യേക വൈദഗ്ധ്യമുള്ള പ്രൊഫഷണലുകളുടെ അഭാവം വലിയ തോതിലുണ്ട്. ഇതിലൂടെയുള്ള പരസ്യ സാധ്യതകളും മാര്‍ക്കറ്റിംഗ് അവസരങ്ങളും മാനേജ്‌മെന്റ് തലത്തില്‍ CSR പഠിച്ചവര്‍ക്ക് അവസരങ്ങളൊരുക്കുന്നു. ഇതിനെ ഒരു ബിസിനസ്സ് മാനേജ്‌മെന്റ്തല ചിന്താരീതിയായി പരിഗണിക്കാം.

CSR പഠനം, ഗവേഷണം

വിദേശ സര്‍വകലാശാലകളായ ഓക്‌സ്‌ഫോര്‍ഡ്, ഹാര്‍വാര്‍ഡ്, കോര്‍ണല്‍, ബ്രിട്ടിഷ് കൊളംബിയ, തുടങ്ങിയവയില്‍ CSR കേന്ദ്രീകരിച്ച് പഠനവും ഗവേഷണവും നടന്നു വരുന്നു. CSR നെ മാനേജ്‌മെന്റ് തലത്തില്‍ പഠിക്കാന്‍ MBA in CSR രണ്ട് വര്‍ഷ പി.ജി കോഴ്‌സ് ഇന്ന് ലഭ്യമാണ്. ബിരുദം 50 ശതമാനം (SC/ST 45 ശതമാനം) മാര്‍ക്കോടു കൂടി പൂര്‍ത്തിയാക്കിയവര്‍ക്ക് ഈ കോഴ്‌സിന് അപേക്ഷിക്കാം. ഇന്ത്യയില്‍ IIM (Indian Institute of Management) ഡല്‍ഹി, പൂനെ, ബാംഗ്ലൂര്‍ എന്നിവിടങ്ങളില്‍ ഈ കോഴ്‌സ് ലഭ്യമാണ്. ദക്ഷിണേന്ത്യയില്‍ മൈസൂര്‍ യൂണിവേഴ്‌സിറ്റിയും MBA in CSR നടത്തുന്നുണ്ട്.

Marketing and CSR
Audit and CSR
HR and CSR
Strategy and CSR
എന്നിവയാണ് MBA in CSR ല്‍ തിരഞ്ഞെടുക്കാവുന്നവ. ഇതുവഴി CSR മേഖലയിലും General Management മേഖലയിലും തൊഴിലവസരങ്ങള്‍ ലഭ്യമാണ്.

തൊഴില്‍മേഖല

CSR മേഖലയില്‍ പ്രൊജക്റ്റ് രൂപീകരണം, മാനേജ്‌മെന്റ്, ഓഡിറ്റിംഗ്, മാര്‍ക്കറ്റിംഗ്, സ്ട്രാറ്റജി മാനേജ്‌മെന്റ്, ഹ്യൂമന്‍ റിസോഴ്‌സ് മാനേജ്‌മെന്റ് എന്നിങ്ങനെ പല മേഖലകളിലായി തൊഴിലവസരങ്ങള്‍ സൃഷ്ടിക്കപ്പെടുന്നുണ്ട്. സ്ട്രാറ്റജി മാനേജ്‌മെന്റിന്റെ ഭാഗമായി പ്രൊജക്റ്റ് പ്രൊപോസല്‍ തയ്യാറാക്കാന്‍ കസല്‍ട്ടന്റ് ആയി നിന്നും ഉയര്‍ന്ന വരുമാനം ലക്ഷ്യമിടാം. ഓഡിറ്റിംഗ് രംഗത്ത് സോഷ്യല്‍ ഓഡിറ്റിംഗ് നടത്തുകയും പ്രൊജക്റ്റ് വിലയിരുത്തുകയും ചെയ്യുന്ന തരത്തിലാണ് തൊഴില്‍ സാധ്യത. ഇതര എം.ബി.എ-കളില്‍ നിന്ന് വ്യത്യസ്തമായി കൂടുതല്‍ ആളുകളിലേക്ക് ഏറ്റെടുത്ത പ്രൊജക്റ്റുകള്‍ എത്തിക്കുകയും അത് പരസ്യ രൂപേണ സ്ഥാപനത്തിന് ഗുണം ചെയ്യുന്ന രീതിയില്‍ ക്രമീകരിക്കുകയും ചെയ്യേണ്ടതായുണ്ട്. ഇതിനോടൊപ്പം ഫിനാന്‍ഷ്യല്‍ മാനേജ്‌മെന്റ് വിഭാഗത്തിലും ജോലി ചെയ്യാനാകും. ഒരു പ്രൊജക്റ്റിനായി അതിന്റെ സ്വഭാവത്തിനനുസരിച്ച് പബ്ലിക്ക് റിലേഷന്‍, റീഹാബിലിറ്റേഷന്‍, റീസെറ്റില്‍മെന്റ്, ഡിസാസ്റ്റര്‍ മാനേജ്‌മെന്റ്, എന്‍വയോമെന്റ് മാനേജ്‌മെന്റ് എന്നിങ്ങനെ പല മേഖലകളിലും വ്യത്യസ്ത രീതിയില്‍ പല പദവികളിലായി ജോലി ചെയ്യാനാകും. കോര്‍പ്പറേറ്റ് മേഖലയില്‍ CSR വിഭാഗത്തില്‍ നിലവില്‍ MSW/MBA കഴിഞ്ഞവരാണ് ജോലി ചെയ്യുന്നവരില്‍ ഭൂരിഭാഗവും. ഇത് നിലവിലെ മാനേജ്‌മെന്റ് തലത്തില്‍ CSR പഠിച്ച വിദഗ്ധരായ പ്രൊഫഷണലുകളുടെ അഭാവം മൂലമാണ്. CSR പ്രൊജക്റ്റുകള്‍ രൂപീകരിക്കുന്നതിനും മാനേജ് ചെയ്യുന്നതിനും വൈദഗ്ധ്യം പ്രദാനം ചെയ്യുന്ന കോഴ്‌സായി MBA in CSR നെ പരിഗണിക്കാം.

നിലവിലെ സാഹചര്യത്തില്‍ ഇന്ത്യയില്‍ മാത്രം ഏകദേശം ഒരു ലക്ഷത്തോളം CSR പ്രൊഫഷണലുകളെ വരും വര്‍ഷത്തില്‍ ആവശ്യമുണ്ട്. ഈ കണക്കുകള്‍ CSR മേഖലയില്‍ വളര്‍ന്നു വരുന്ന തൊഴിലവസരങ്ങളിലേക്കാണ് വിരല്‍ ചൂണ്ടുന്നത്.

CSR മേഖലയിലുള്ള പുതിയ പഠന സാധ്യതകള്‍ ഇന്ത്യയിലെ ബിസിനസ്സ് സ്ഥാപനങ്ങളുടെ സുസ്ഥിര വികസനത്തിനും സാമൂഹ്യ പുരോഗതിയ്ക്കും ഉതകുന്ന നാഴികക്കല്ലാകട്ടെ എന്ന് പ്രത്യാശിക്കാം.

CSR തൊഴിൽ മേഖല ചിത്രത്തിലൂടെ
(കടപ്പാട്: ഗൂഗിൾ ചിത്രങ്ങൾ)

Explore Your CSR Oppertunities through "International Journal of Corporate Social Responsibility"

https://jcsr.springeropen.com/

International Journal of Corporate Social Responsibility The International Journal of Corporate Social Responsibility (JCSR) offers a unique platform for the latest theoretical and empirical research and for innovative concepts for sustainable business strategies which create value for business and society (shared value). It contains best practices, li...