Orthodox Medical Forum

04/08/2018

സൈബര്‍ കുറ്റങ്ങള്‍ തടയണം :-
പരിശുദ്ധ കാതോലിക്കാ ബാവാ

കേരളം ഇന്ത്യയിലെ ആദ്യ ഡിജിറ്റല്‍ സംസ്ഥാനമാണെന്ന് അഭിമാനിക്കുമ്പോള്‍ തന്നെ സൈബര്‍ ലോകത്തെ നീചവിളയാട്ടങ്ങള്‍ മൂലം ലജ്ജിക്കേണ്ട അവസ്ഥയാണ് സംജാതമായിരിക്കുന്നതെന്ന് പരിശുദ്ധ ബസേലിയോസ് മാര്‍ത്തോമ്മാ പൗലോസ് ദ്വിതീയന്‍ കാതോലിക്കാ ബാവാ. സൈബര്‍ പടയാളികള്‍ എന്ന് സ്വയം വിളിക്കുന്നവരും അജ്ഞാതരായി തുടരാന്‍ ആഗ്രഹിക്കുന്നവരും വ്യാജ നാമധാരികളുമായ ചിലര്‍ സൈബര്‍ ലോകത്ത് നടത്തുന്ന കുറ്റകൃത്യങ്ങള്‍ക്ക് തടയിടാനും കുറ്റവാളികളെ നീതിപീഠത്തിനുമുന്നില്‍ കൊണ്ടുവരാനും അധികാരികള്‍ സത്വര നടപടികള്‍ കൈക്കൊളളണം. വ്യാജ ആപ്പുകളിലൂടെ പണവും സ്വകാര്യവിവരങ്ങളും തട്ടിയെടുക്കുക, വ്യാജസന്ദേശങ്ങള്‍ പ്രചരിപ്പിക്കുക, വ്യക്തികളെയും, സംഘടനകളെയും അപഹസിക്കുക തുടങ്ങിയ കുത്സിത പ്രവൃത്തികള്‍ ചെയ്യുന്നവരെ തിരിച്ചറിഞ്ഞ് ഒറ്റപ്പെടുത്തേണ്ടത് അത്യാവശ്യമാണ്. ആത്മഹത്യാപ്രേരണ ചെലുത്തുന്ന ബ്ലൂ വെയില്‍ ഗെയിം പോലെയുളള അപകടകരമായ കളികളെക്കുറിച്ചും ദോഷകരമായ സൈബര്‍ ഉപയോഗത്തെക്കുറിച്ചും കുട്ടികളെ ബോധവത്കരിക്കാന്‍ ശ്രദ്ധിക്കണം. ജീവകാരുണ്യപ്രവര്‍ത്തനങ്ങള്‍ ഉള്‍പ്പടെ സാമൂഹ്യസേവന രംഗത്ത് സജീവമായ സേവനമനുഷ്ഠിക്കുന്ന ഇന്‍റര്‍നെറ്റ് കൂട്ടായ്മകളെ മാതൃകയാക്കാവുന്നതാണെന്നും പരിശുദ്ധ കാതോലിക്കാ ബാവാ അഭിപ്രായപ്പെട്ടു.