Joseph Vazhackan

കോഴിക്കോട്ടേക്ക് ഇങ്ങനെയൊരു യാത്രയും ഇത് പോലൊരു അനുസ്മരണ യോഗവും ഒട്ടും ആഗ്രഹിച്ചതല്ല. രാഷ്ട്രീയത്തിൽ നിന്നും ലഭിച്ചതിൽ ഏറ്റവും വില പിടിപ്പുള്ളതായി കണക്കാക്കുന്നത് ആത്മബന്ധങ്ങളാണ്. അത്തരത്തിൽ ആത്മബന്ധങ്ങളുടെ പട്ടികയിൽ ഇടം പിടിച്ച പ്രിയപ്പെട്ട ബാലനാരായണന്റെ, ഞങ്ങളുടെ ബാലാജിയുടെ കുടുംബത്തെ കാണാനും അനുസ്മരണ യോഗത്തിൽ പങ്കെടുക്കാനുമാണ് കോഴിക്കോട് എത്തിയത്. വിദ്യാർത്ഥി യുവജന കാലം മുതൽ കൂടെയുണ്ടായിരുന്ന സഹപ്രവർത്തകനായിരുന്നു ബാലാജി. കോഴിക്കോട് ജില്ലയിലെ കെ എസ് യൂ യൂത്ത് കോൺഗ്രസ്‌ പോരാട്ടങ്ങൾക്ക് നേതൃത്വം നൽകിയ ജില്ലാ അധ്യക്ഷൻ എന്ന നിലയിലും കോൺഗ്രസ്‌ നേതാവ് എന്ന നിലയിലും പ്രസ്ഥാനത്തിനായി ഒരു ജീവിത കാലം മുഴുവൻ മാറ്റി വച്ച പ്രിയപ്പെട്ടവൻ... എന്നും കോഴിക്കോട്ടേക്ക് വരുമ്പോൾ ഒരു വിളിപ്പുറത്ത്‌ ഉണ്ടാകുന്നവൻ... പ്രിയപ്പെട്ട ബാലാജിയുമായിട്ടുള്ള ഓർമ്മകൾ അനവധിയാണ്. പതിറ്റാണ്ടിന്റെ ആഴവും കരുത്തുമുള്ള സഹോദര ബന്ധമാണ് എനിക്കു നഷ്ടമായത്. പേരാമ്പ്ര ചങ്ങരോത്ത്‌ മണ്ഡലം കോൺഗ്രസ്‌ കമ്മിറ്റി സംഘടിപ്പിച്ച ബാലനാരായണൻ അനുസ്മരണ യോഗത്തിൽ പങ്കെടുത്തു. അദ്ദേഹത്തിന്റെ കുടുംബത്തെ നേരിൽ കണ്ട് അനുശോചനം രേഖപ്പെടുത്തി.