Ubaideth

കുമാരനല്ലൂർ ദേവീക്ഷേത്ര നടയിൽ ഒരു സെൽഫി.

ഒരു ഇസ്ലാം മത വിശ്വാസിക്ക് ദേവീക്ഷേത്ര നടയിൽ എന്ത് കാര്യം. പിന്നെ മത സൗഹാർദ്ദ ചിത്രങ്ങൾ സാമൂഹിക മാധ്യമങ്ങളിലൂടെ പറന്ന് നടക്കുന്ന കാലമായത് കൊണ്ട് ലൈക് നേടാനുള്ള ഒരു സൈക്കളോടിക്കൽ മൂവ്മെന്റല്ലേ ഈ ചിത്രം.

അല്ല,
ഞാൻ തികച്ചും ഒരു ഇസ്ലാം മത വിശ്വാസി തന്നെയാണ്. മത സൗഹാർദ്ദം കാണിക്കുന്നതിന് വേണ്ടിയല്ല ഈ ചിത്രം. എത്ര മതവിശ്വാസിയാണെന്ന് പറഞ്ഞാലും നമ്മുടെയൊക്കെ രക്തത്തിൽ അലിഞ്ഞു പോയ ഒരു സംസ്ക്കാരമുണ്ട്, അത് മാറില്ല.

നന്നേ ചെറുപ്പത്തിൽ പാതിരാത്രിയിൽ ദേവിയുടെ എഴുന്നള്ളത്ത് സംക്രാന്തി കടക്കുമ്പോൾ ഉമ്മായും സഹോദരങ്ങളും വിളിച്ചുണർത്തും. പിന്നെ ഉറക്കം വരില്ല. എഴുന്നള്ളത്ത് നീലിമംഗലം കടക്കുവോളം അതിനൊപ്പം ഉണ്ടാകും. പറ വെക്കുന്നതും പറയെടുക്കുന്നതും നോക്കി നടക്കും. അൽപം ശർക്കരയോ തേങ്ങയോ കിട്ടിയാൽ സന്തോഷം.

പിന്നീട് ഒന്നു മുതൽ പത്ത് വരെ പഠനം കുമാരനല്ലൂർ ദേവി വിലാസം സ്ക്കൂളിൽ. ഓരോ വർഷവും ഉത്സവം കൊടിയേറുമ്പോൾ മുതൽ മനസ്സിൽ ഒരു ആവേശമാണ്. ഉത്സവത്തിന്റെ മൂന്ന് നാല് ദിവസങ്ങൾ പഠിത്തമുണ്ടാകും. ഏകദേശം 11 മണിയാകാറാകുമ്പോഴാണ് എഴുന്നള്ളത്ത് തിരികെ അമ്പലത്തിൽ കയറുന്നത്. അത് വരെ ഞങ്ങൾ കുട്ടികൾ ചുറ്റിപ്പറ്റി അവിടെ ഉണ്ടാകും.

പിന്നെ വളർന്നപ്പോഴും ഇതൊന്നും മാറിയില്ല. എല്ലാ ഉത്സവനാളിലും കാർത്തികക്ക് കൃത്യമായി അമ്പലത്തിലെത്തും, ഇപ്പോൾ കുട്ടികളെയും കൂടെ കൂട്ടും.

ഇത് പോലെയാണ് ഞങ്ങൾക്ക് പാറമ്പുഴ പള്ളിയിലെയും പള്ളിപ്പുറത്ത് പള്ളിയിലെയും പെരുന്നാളുകളും.

നമ്മുടെയൊക്കെ മനസ്സ് വിഷമയമാകുവാൻ അൽപം ബുദ്ധിമുട്ടാണ്. നാടിനെ വെട്ടിമുറിച്ച് രാഷ്ട്രീയ നേട്ടം കൊയ്യാൻ കാത്തിരിക്കുന്ന ശക്തികൾ നമുക്ക് ചുറ്റുമുണ്ട്. യഥാർത്ഥത്തിൽ അവർക്ക് മതമില്ല, മദമേയുള്ളു. അത് തിരിച്ചറിഞ്ഞാൽ എല്ലാ വർഗീയ ശക്തികളും പത്തി മടക്കും.

ഇനി ഈ ചിത്രം കാണുമ്പോൾ വിഷമം തോന്നാവുന്ന എന്റെ സുഹൃത്തുക്കളായ തീവ്ര വിശ്വാസികൾക്ക്, എന്റെ നിയ്യത്താണ് എനിക്ക് വലുത്.
മതസൗഹാർദ്ദം ചിത്രങ്ങളിലല്ല വേണ്ടത്, നമ്മുടെ മനസിലും പ്രവർത്തിയിലുമാണ് വേണ്ടത്.

എല്ലാവർക്കും കാർത്തിക ആശംസകൾ.