Aman Foundation Kolhapur

🧩श्री ला सूर गवसतोय...🎶🪘

साधारण तीन वर्षांपूर्वी साडेतीन वर्षाच्या श्री ला केअर ला घेऊन आलेले आई बाबा आठवतात. कडेवरचे कर्कश रडणारे ते मूल! मल्टिपल डिसबिलिटी. त्यात ऑटीझम हे निदान.ना दृष्टी, ना उभे रहाणे, भिंतीला टेकून कसे बसे बसवावे तर आईच्या मांडीवरून खाली उतरवले की भोकाड पसरलेच.. आवाजही इतका दणदणीत की उरली सुरली पोरही घाबरून रडायला सुरुवात..
अशा या मुलाच्या भोंग्यामुळे त्याच्या आई बाबांना रेंट चे घरही महिनाभरात सोडायला लागायचे.
एकूणच सगळीकडे नाकारलेले हे पोर स्वीकारायचे ठरवले. गंधा बाबत संवेदना तीक्ष्ण असल्याने आई शेजारून हलली तरी कळायचे.आणि मग कसबस कंट्रोल केलेलं रडं दुप्पट व्हायचे.पहिले 15 दिवस आईसोबत बसू दिले. त्याच्या रडण्याचा त्रास होऊन इतर मुलांचे हात सतत कानावर असायचे. एक दोन पालकांनीही नाराजी व्यक्त केली.
थोड्क्यात, सगळे वातावरण बिघडले होते. शिक्षक सुद्धा जरा कुरकुर करायला लागले होते. त्याला पुढे 6 महिन्यांनी बोलावू असेही आडून आडून सुचवले गेले. पण आशावादी मन पराभव मानायला तयार नव्हते.
चिकाटीचा महिना गेला. आई काही वेळासाठी बाहेर बसू लागली.
हळू हळू टाईम स्पॅन वाढवला. मग फक्त आईची ओढणी आधाराला सोबत देऊ लागली. Separation anxiety कमी होऊन आम्हाला विश्वासाने स्वीकारायची वेळ यायला तिसरा महिना आला. तारस्वरातील पट्टी खाली येत येत यथावकाश पूर्ण थांबली. आता ओठावर गोड निरागस हसूही तरळायला लागले होते.
कालांतराने असा रुळला की श्री खूप रडायचा हे इतिहासजमा झाले. एक कठीण परिक्षा पास झाल्याचा आनंद होता. श्री पासून काही वेळासाठी स्वातंत्र्य मिळाल्याने त्याची आई अभ्यास करून परिक्षा देऊ लागली. आणि लवकरच LLM ही पूर्ण केले.
आता श्री च्या आवश्यक त्या थेरपी सुरू झाल्या. हे चॅलेंज स्वीकारताना केअर मध्ये अनेक नवीन साधनांची भर केली गेली.अथक प्रयत्नांनी तो स्वतंत्र बसू लागला. आता चालायलाही सुरवात झाली आहे. स्वतःचे मूल पहिल्यांदा चालल्यावर जितका आनंद झाला नव्हता त्याहीपेक्षा जास्त आनंद श्री ने पहिले पाऊल टाकले तेव्हा केअर च्या स्टाफला झाला .
या मुलांना उपजत काही कला असतात. बहुतांशी मुलांना म्युझिक मध्ये रस असतोच. पण श्री चे हात काही शोधत असायचे. जवळ असणाऱ्या प्रत्येक वस्तूवर थाप मारून आवाजाचा कानोसा घ्यायचा. गेल्या आठवड्यात केअर ला थेरपी करता मैत्रिणीकडून भेट मिळालेला ड्रम (जेम्बे) श्री च्या हाताला लागला. आणि बोटे त्याच्या कलाने फिरवून सुर कसे निघतात याचा कानोसा घेऊ लागला. आम्ही अवाक होऊन पहात होतो.
🎼नेमका सूर सापडून श्री चे भविष्य उज्वल व्हावे याच सदिच्छा ❣️
(झेंबे श्री च्या हातात आल्यावरचा पहिला वहिला व्हिडिओ नक्की पूर्ण पहावा)