Siddeeque Nadvi Cheroor

എസ് കെ എസ് എസ് എഫിന്
35 തികയുമ്പോൾ

1990 മാർച്ച് 20ൻ്റെ സായാഹ്നം. സമസ്ത കേരള ഇസ് ലാം മത വിദ്യാഭ്യാസ ബോർഡിൻ്റെ കറുത്ത നിറമുള്ള വണ്ടി ചേരൂർ കുന്നിലെ എൻ്റെ വീടിൻ്റെ മുന്നിൽ വന്നു നിന്നു. അന്നത്തെ SKSSF സംസ്ഥാന ഭാരവാഹികളായിരുന്ന അശ്റഫ് ഫൈസി,അബ്ദുൽ ഹമീദ് ഫൈസി, സി എച്ച് ത്വയ്യിബ് ഫൈസി, സലാം ദാരിമി കരുവാരക്കുണ്ട് തുടങ്ങിയവരാണ് വണ്ടിയിറങ്ങി വന്നത്.

സംഘടന രൂപീകരിച്ചുവെന്നല്ലാതെ ക്ലച്ച് പിടിച്ചിട്ടില്ല. നിലനിൽപ്പ് ഉറപ്പിക്കാനുള്ള നെട്ടോട്ടത്തിലാണ്. അന്നന്നത്തെ പിരിവിലൂടെയാണ് ദൈനംദിന കാര്യങ്ങൾ ഒപ്പിച്ചു പോകുന്നത്. മീറ്റിങ്ങിന് ഓരോരുത്തരും സ്വന്തം ചെലവിൽ സംബന്ധിക്കണം. എല്ലാവരും ജോലിക്കാരായതിനാൽ രാത്രിയാണ് യോഗം നടക്കുക. ഭക്ഷണ സമയമായാൽ അംഗങ്ങളുടെ പോക്കറ്റുകൾ പരതും. കയ്യിൽ വഴിച്ചെലവ് കഴിച്ചു ബാക്കിയുള്ളവർ അന്നത്തെ അന്നം സ്പോൺസർ ചെയ്യും. അങ്ങനെ പിരിവിൻ്റെ ഭാഗമായി സംഘം കാസർകോട്ട് കറങ്ങാൻ വന്നതാണ്. ദയനീയാവസ്ഥ കണ്ടു ദയ തോന്നിയ സമസ്ത നേതാക്കൾ ഓട്ടത്തിന് തൽക്കാലത്തേക്ക് വിട്ടു നൽകിയ ബോർഡ് വണ്ടിയിലാണ് കറക്കം.

അവർ വീട്ടിലെത്തിയപ്പോൾ എൻ്റെ പിതാവിൻ്റെ ആരോഗ്യ നില വളരെ മോശമാണ്. തൊട്ട് മുമ്പുള്ള മൂന്ന് ദിവസമായി അവശനിലയിലാണെന്ന് പറയാം. അവർ വന്നത് എന്നേയും കൂട്ടി പിരിവിന് പോകാനാണ്. എനിക്കാണെങ്കിൽ പോകണോ വേണ്ടേയെന്ന് തീരുമാനിക്കാൻ കഴിയാത്ത അവസ്ഥ. അത്യാസന്ന നിലയിൽ പിതാവിനെ വിട്ട് എങ്ങനെ പോകും. ഇത്രയും ദൂരെ നിന്ന് അവർ വന്ന് പ്രദേശത്തുകാരനില്ലാത്തതിനാൽ പിരിവ് മുടങ്ങുമെന്ന അവസ്ഥയും. അങ്ങനെ ഏതാനും മണിക്കൂറുകൾക്കകം തിരിച്ചുവരാമെന്ന ധാരണയിൽ ഞാനും പുറപ്പെട്ടു. ഇന്നത്തെ പോലെ മൊബൈൽ സൗകര്യമൊന്നുമില്ലാത്ത കാലം. എന്തെങ്കിലും അത്യാഹിതം സംഭവിച്ചാൽ അറിയാനും അറിയിക്കാനും ഏറെ പ്രയാസം.

വഴിക്ക് വച്ച് അയൽ വീട്ടിലേക്ക് ഫോൺ ചെയ്തു വിവരം അന്വേഷിച്ചപ്പോൾ ഉപ്പ ഏറെ പ്രയാസത്തിലാണെന്നും എന്നെ അന്വേഷിച്ചു കൊണ്ടിരിക്കുന്നുവെന്നും അറിഞ്ഞു.അതോടെ അന്നത്തെ പിരിവ് കറക്കം വെട്ടിക്കുറച്ച് ഞങ്ങൾ തിരിച്ചു. എന്നെ വീട്ടിൽ ഇറക്കി, ഉപ്പയെ സന്ദർശിച്ച ശേഷം അവർ മടങ്ങിപ്പോയി. ഏതാണ്ട് രാത്രി 9.45 ഓടെയാണ് ഞാൻ വീടണഞ്ഞത്. തുടർന്ന് 10-20 മിനിറ്റുകക്കകം പിതാവ് അന്ത്യശ്വാസം വലിച്ചു. (ഇന്നാലില്ലാഹ്.... ).

അന്നത്തെ SKSSF സംഘടനാ പ്രവർത്തനങ്ങൾ ഓർത്തെടുക്കുമ്പോൾ മനസ്സിൽ വിങ്ങലായി ഓടിയെത്തുന്ന സംഭവമാണത്. 1989 ഫെബ്രുവരി 19 ന് കോഴിക്കോട് സാമൂതിരി ഹൈസ്കൂളിൽ വച്ച് നടന്ന സംഘടനാ രൂപീകരണം സമസ്തയിലെ ധ്രുവീകരണ സംഭവങ്ങൾക്കിടയിലെ ഒരു നിർണായക വഴിത്തിരിവായിരുന്നു. അശ്റഫ് ഫൈസി പ്രസിഡൻറും ഹമീദ് ഫൈസി ജനറൽ സെക്രട്ടറിയുമായ ആ കമ്മിറ്റിയിലെ വൈസ് പ്രസിസൻറ് സ്ഥാനത്തായിരുന്നു, ഞാൻ. തുടർന്ന് മാസങ്ങളോളം നീണ്ട പ്രവർത്ത യജ്ഞവും അതിൽ അനുഭവിച്ച കഷ്ടനഷ്ടങ്ങളും ഇന്നത്തെ തലമുറയ്ക്ക് സങ്കൽപ്പിക്കാൻ പോലും പ്രയാസമാകും. സംഘടനാ സംവിധാനം മുഴുക്കെ അപ്പുറത്താണ്. പ്രധാന പ്രവർത്തകരെല്ലാം മറുപക്ഷത്ത്. എന്നാൽ ജനങ്ങളുടെ പിന്തുണയിൽ പ്രതീക്ഷയുണ്ടായിരുന്നു. സാമ്പത്തികമായി വട്ടപ്പൂജ്യം. അതിന് പരിഹാരം ഊര് തെണ്ടുക തന്നെ. പക്ഷെ, അതിനും വേണം യാത്രാ സൗകര്യം. ബസ് കയറിയിറങ്ങി പ്രമാണിമാരെ സമീപിച്ചാൽ അവർ വേണ്ട വിധം കനിയില്ല. യാത്രാ ചിലവുകൾ വേറെയും.

അതിന് പരിഹാരം നിർദേശിച്ചത് അന്ന് സെക്രട്ടറിമാരിലൊരാളായ സലാം ഫൈസി കരുവാരക്കുണ്ടാണ്. പരിചയത്തിൽ ഒരു പഴയ അമ്പാസിഡർ കാറുണ്ട്. ചെറിയ തുകക്ക് കിട്ടും. ഒരു ചെറിയ തുക അഡ്വാൻസ് നൽകിയാൽ വണ്ടി വിട്ടുകിട്ടും. പിരിവ് നടത്തി കടം വീട്ടാം. യാത്ര കാറിലാവുകയും ചെയ്യും. അത് വഴി പിരിവിലും പുരോഗതിയുണ്ടാകും. ഓട്ടാൻ സലാം ഫൈസി റെഡി. ഐഡിയ കൊള്ളാം. എല്ലാവരും അംഗീകരിച്ചു. വണ്ടി കയ്യിൽ കിട്ടി. അങ്ങനെ ബാലാരിഷ്ടതകൾക്കിടയിൽ സംഘടനയ്ക്ക് കറുത്ത അംബാസിഡർ കാറിൻ്റെ ഉടമാവകാശവും കൈവന്നു!

പിന്നെ അതിൻ്റെ പൊല്ലാപ്പ് വേറെ. കാറ് കുറേ ഉപകാരം ചെയ്തെങ്കിലും അതിനെ കൊണ്ട് നടക്കുക അതിലേറെ തലവേദനയായി. പലപ്പോഴും ഓടണോ വേണ്ടെയോ എന്ന് കാറ് സ്വയം തീരുമാനിക്കും! എവിടെയെങ്കിലും നാലാൾ കൂടുന്ന സ്ഥലത്ത് വച്ചായിരിക്കും കാറിന് കുശുമ്പ് കൂടുക. സ്റ്റാർട്ടാക്കിയാൽ ആകാൻ കൂട്ടാക്കില്ല. പിന്നെ കൂടെയുള്ളവരും കണ്ട് നിൽകുന്നവരും കൂടി തളളിക്കൊടുക്കണം. സംഘടനയുടെ പ്രതിയോഗികൾ ഓരോ നീക്കങ്ങളും തൊട്ടും മണത്തും അറിയുന്ന കാലം. പലപ്പോഴും അവർക്കിടയിലാണ് കാറിൻ്റെ നിസ്സഹകരണ പ്രഖ്യാപനം ഉണ്ടാവുക. ആകെ കൂടി ശകട സാരഥികൾക്ക് ചമ്മലായി.

അതെല്ലാം പഴയ കഥ. പിന്നീട് രണ്ടാം വർഷം സമസ്ത നേതാക്കളായ ഉസ്താദുമാരുടെ നിർബന്ധത്തിന് വഴങ്ങി പാണക്കാട് സാദിഖലി ശിഹാബ് തങ്ങൾ സംഘടനയുടെ സാരഥ്യം ഏറ്റെടുത്തു. തുടർന്നു ക്രമേണ സംഘടന വളർന്നു. (ഈ കമ്മിറ്റിയിലെ ഒന്നാം വൈസ് പ്രസിഡൻറ് ഈ വിനീതനായിരുന്നു. പക്ഷെ, ഏതാനും മാസങ്ങൾക്കിടയിൽ വ്യക്തിപരമായ ചില പ്രശ്നങ്ങളും പ്രവാസ ജീവിതവുമായി സംഘടനാ രംഗത്ത് നിന്ന് മാറി നിൽക്കേണ്ടി വന്നു. മേൽപ്പറയപ്പെട്ടവർക്ക് പുറമെ Dr. നാട്ടിക മുഹമ്മദലി, അച്ചൂർ ഫൈസി, സലാം ഫൈസി ഒളവട്ടൂർ, ബശീർ അലനല്ലൂർ തുടങ്ങിയവരും അന്ന് സ്റ്റേറ്റ് ഭാരവാഹികളിൽ സജീവമായിരുന്നു.)

അങ്ങനെ ഓരോ പ്രദേശങ്ങളിലും ശാഖകൾ വന്നു. തുടക്കത്തിൽ ശാഖ പോയിട്ട് ജില്ലാ കമ്മിറ്റി പോലും രൂപീകരിക്കാൻ ബന്ധപ്പെട്ടവർ സഹിച്ച ക്ലിഷ്ടതകൾ അനുഭവിച്ചവർക്കേ അറിയൂ. പിന്നെ നാട്ടിലേയും ഗൾഫിലേയും ദീനീ സ്നേഹികളുടെയും അനുഭാവികളുടെയും ഉദാര ഹസ്തങ്ങിലൂടെ സംഘടനയുടെ കാര്യങ്ങൾ മെച്ചപ്പെട്ടു. കോഴിക്കോട് നഗരത്തിൻ്റെ ഹൃദയഭാഗത്ത് വിശാലമായ സ്ഥലം, പള്ളി, ഓഫീസ്/ ഹോസ്റ്റൽ/ ഷോപ്പുകൾ അടങ്ങിയ മൾട്ടി സ്റ്റോറി ബിൽഡിങ്ങ് അങ്ങനെ അടിത്തറ ഭദ്രമായി. അക്കാലത്ത് ഈ വിഷയത്തിൽ സമസ്ത, വിദ്യാഭ്യാസ ബോർഡ് നേതാക്കളും ഗൾഫ് സംഘടനകളും നൽകിയ പിന്തുണ അവിസ്മരണീയമായിരുന്നു.

തുടർന്നു വിവിധ ഹ്രസ്വകാല- ദീർഘകാല പദ്ധതികളിലൂടെ സംഘടന മുന്നോട്ട് പോയി. പുതിയ സ്‌കീമുകളും ക്യാമ്പയിനുകളും കർമ പരിപാടികളുമായി SKSSF നാട്ടിൽ നിറഞ്ഞു നിന്നു. കേരളത്തിലെ ശക്തമായ അടിത്തറയുള്ള ധാർമിക-യുവജനപ്രസ്ഥാനമായി സംഘടന മേൽവിലാസം നേടി. ഇപ്പോൾ അത് 35 ൻ്റെ പടിവാതിൽക്കലാണ്. യൗവനത്തിളപ്പിൽ നിന്ന് പക്വതയുടെ പ്രൗഢിയിലേക്കുള്ള ചുവട് വയ്പ്പ്.

ഇത് പുതിയ കാലമാണ്. യൂസ് ആൻറ് ത്രോയാണ് ഇന്നിൻ്റെ മുഖമുദ്ര. ആസ്വദിച്ച്, അനുഭവിച്ച് വലിച്ചെറിയുക. അതെങ്ങനെ കൈയണഞ്ഞുവെന്ന് നോക്കേണ്ടതില്ല. വർത്തമാനത്തിൽ അഭിരമിക്കുക. ചരിത്രത്തിൽ ചുറ്റിപ്പറ്റി സമയം പാഴാക്കേണ്ടതില്ല. ഇതാണ് പുതിയ തലമുറയുടെ ചിന്താരീതി. അതിനാൽ ചരിത്രത്തിൻ്റെ ഇടനാഴിയിൽ ഓടിക്കിതച്ചു ക്ഷീണിച്ചവരുണ്ടെങ്കിൽ വർത്തമാനത്തിൽ അതിൻ്റെ വരവോ ചിലവോ പ്രതീക്ഷിക്കരുത്.

കാലം ഇനിയും കറങ്ങിത്തിരിയും. വ്യക്തികൾക്കും സംഘടനകൾക്കും മാറേണ്ടി വരും. മൗലികവും അടിസ്ഥാനപരവുമായ കാര്യങ്ങൾ നിലനിർത്തിക്കൊണ്ട് തന്നെ പ്രവർത്തനമേഖലകളിലും കർമപദ്ധതികളിലും മാറ്റങ്ങൾ വേണ്ടിവരും. കാഴ്ചകൾ മാറുമ്പോൾ കാഴ്ചപ്പാടുകളും മാറും. പുതുതലമുറയുടെ ചിന്താരീതിയും മുൻഗണനാക്രമവും ഏറെ മാറ്റിയിരിക്കുന്നു. അവരുടെ ഭാഷയിലും ശൈലിയിലും സംവദിച്ചില്ലെങ്കിൽ നെറ്റ് വർക്കില്ലാത്ത മൊബൈൽ ഫോണിൽ സംസാരിച്ച അനുഭവമായിരിക്കും.

ഏതായാലും 35 ആം വാർഷികം SKSSF നെ സംബന്ധിച്ച് സുപ്രധാനമാണ്. കാര്യപരിപാടികളിലൂടെ തിരഞ്ഞെടുപ്പിലൂടെ അതിനെ നിർണായകമാക്കാൻ കഴിയും. അടുത്ത 35 നെ നേരിടാനുള്ള ദൂരക്കാഴ്ചയോടെ, മനക്കരുത്തോടെ മുന്നോട്ട് പോകാൻ നാഥൻ തുണക്കട്ടെ.

- സ്വിദ്ദീഖ് നദ് വി ചേരൂർ