Fitness A-LAB studios

weight loss drink : 7 நாள் 7 பானம்... தினம் ஒன்னு குடிங்க.. உடம்பு கடகடனு குறைய ஆரம்பிக்கும்..


உடல் எடையைக் குறைப்பது என்பது வெறுமனே தசைகளைக் குறைப்பதோ உடலில் உள்ள கொலஸ்டிராலின் அளவைக் குறைப்பது மட்டுமல்ல. உடலில் கழிவுகள் தேங்காமல் பார்த்துக் கொள்வதும் தேங்கிய கழிவுகளை வெளியேற்றும் டீடாக்ஸ் முறையும் சேர்த்தே அடங்கும். அப்படி உடல் எடையையும் உடலில் உள்ள கழிவுகளையும் ஒரே நேரத்தில் குறைக்க நம்முடைய வீட்டிலுள்ள சில இயற்கை பொருள்களை பானமாகத் தயாரித்து குடிக்கலாம்.

உடலில் கொழுப்பு மற்றும் பிற கழிவுகள் தேங்கியிருந்தாலும் உடல் பருமன் பிரச்சினை அதிகரிக்கும். அதனால் உணவுகளின் மூலம் இயற்கையான பானங்களின் மூலமாகவும் அந்த கழிவுகளை வெளியேற்றுவது சிறந்தது. அப்படி வெளியேற்றும்போது உடல் சுத்தமடைவதோடு எடையும் வெகுவாகக் குறையும்.

​எடை குறைய கொத்தமல்லி நீர்

தேவையான பொருள்கள்

கொத்தமல்லி விதைகள் - 2 ஸ்பூன்

தண்ணீர் - 2 கப்

செய்முறை

தண்ணீரில் கொத்தமல்லி விதைகளைப் போட்டு நன்கு கொதிக்க விட்டு தண்ணீர் ஒரு கப் ஆகும் வரை சுண்ட விடுங்கள்.

பிறகு அடுப்பை அணைத்து விட்டு, நீரை வடிகட்டி வெதுவெதுப்பான நிறையில் குடிக்க வேண்டும்.

இது உடலுக்கு உடனடி எனர்ஜியைக் கொடுப்பதுடன் உடலில் கொலஸ்ட்ராலைக் குறைக்கச் செய்கிறது.

இந்த கொத்தமல்லி விதையில் வைட்டமின் ஏ, கே மற்றும் சி, ஃபோலிக் அமிலம் ஆகியவை நிறைந்திருக்கின்றன.

​எடையை குறைக்க வெந்தய நீர்
தேவையான பொருள்கள்

வெந்தயம் - 1 ஸ்பூன்

தண்ணீர் - 1 டம்ளர்

குடிக்கும் முறை

தண்ணீரில் இரவு முழுவதும் வெந்தயத்தைச் சேர்த்து ஊற வைக்க வேண்டும்.

காலையில் எழுந்ததும் அந்த தண்ணீரை வடிகட்டி குடிக்க வேண்டும். வெந்தயத்தை சாப்பிட முடிந்தால் சாப்பிடலாம். கசப்பாக இருக்கிறது என்று நினைப்பவர்கள் தண்ணீரை மட்டும் குடித்து வரலாம். இது உடலில் உள்ள கொலஸ்டிராலைக் குறைப்பதோடு கல்லீரல், சிறுநீரகம் ஆகியவற்றையும் டீடாக்ஸ் செய்கிறது.

​எடையை குறைக்கும் இலவங்கப்பட்டை - தேன்
தேவையான பொருள்கள்

தண்ணீர் - 2 டம்ளர்

இலவங்கப்பட்டை - 2 இன்ச் அளவு

தேன் - சுவைக்கேற்ப

பயன்படுத்தும் முறை

நிறைய பேருக்கு டீடாக்ஸ் பானம் என்றாலே முகத்தை சுளிப்பார்கள். அதில் சுவையே இருக்காது என்று. உங்களுக்காக தான் இந்த இனிப்பான பானம்.

இலவங்கப்பட்டையில் உள்ள ஆன்டி -- ஆக்சிடண்ட்டுகள் உடல் எடையையும் சிறுநீரகப் பாதை தொற்று ஏற்படாமலும் தடுக்கும். உடலில் உள்ள கொலஸ்டிராலின் அளவையும் கட்டுக்குள் வைக்கச் செய்கிறது.

தண்ணீரை நன்கு கொதிக்க வைத்து அதில் இலவங்கப்பட்டையை இடித்து சேர்த்து நன்கு கொதிக்க விடுங்கள்.

இலவங்கப்பட்டையை பொடியாகவும் சேர்க்கலாம். நன்கு கொதித்ததும் வடிகட்டி அதனுடன் சிறிது தேன் சேர்த்து கலந்து குடிக்க வேண்டும்.


​எடையை குறைக்கும் சீரக - எலுமிச்சை நீர்
தேவையான பொருள்கள்

தண்ணீர் - 2 கிளாஸ்

சீரகம் - 2 ஸ்பூன்

எலுமிச்சை - அரை

பயன்படுத்தும் முறை

2 கப் தண்ணீரில் நீரகத்தைச் சேர்த்து இரவு முழுக்க ஊற வைக்க வேண்டும்.

அடுத்த நாள் காலையில் எழுந்ததும் சீரகத்துடன் சேர்த்து அந்த நீரை அப்படியே கொதிக்க வைக்க வேண்டும்.

நன்கு 10 நிமிடங்கள் கொதித்த பிறகு, அந்த நீரை வடிகட்டி ஆற விடுங்கள்.

நீர் குடிக்கும் சூடு அளவுக்கு வந்ததும் அதில் எலுமிச்சை சாறு சேர்த்து குடிக்கலாம். சுவைக்காக எதுவும் சேர்க்கத் தேவையில்லை.

​எடையை குறைக்கும் ஓமம் தண்ணீர்
ஓமம் வயிற்றில் மற்றும் சருமத்தில் உள்ள கழிவுகளை வெளியேற்றி உடலை டீடாக்ஸ் செய்யும்.

தேவையான பொருள்கள்

தண்ணீர் - 4 கப்

ஓமம் - 4 ஸ்பூன்

பயன்படுத்தும் முறை

4 கப் தண்ணீரை அடுப்பில் வைத்து தண்ணீரை நன்கு கொதிக்க வைக்க வேண்டும்.

தண்ணீர் நன்றாகக் கொதித்ததும் அதில் ஓமத்தைச் சேர்த்துக் கொள்ளுங்கள்.

அடுப்பை மிதமாக தீயில் வைத்து நன்கு கொதிக்க விடுங்கள். கிட்டதட்ட 10 நிமிடங்கள் வரை கொதிக்க வைத்துக் கொள்ள வேண்டும்.

பின்பு இந்த நீரை வடிகட்டி வெதுவெதுப்பான நிலையில் காலையில் வெறும் வயிற்றில ஒரு கப் குடிக்க வேண்டும். அதேபோல இரவு உணவுக்குப் பிறகு படுக்கப் போகும்முன் ஒரு கப் குடியுங்கள். இது உடலை டீடாக்ஸ் செய்து எடையைக் குறைக்கச் செய்கிறது.

​எடையை குறைக்கும் வெட்டிவேர் பானம்

தேவையான பொருள்கள்

வெட்டி வேர் - 2 கிராம் அளவு

சுத்தமான தண்ணீர் - 1 கிளாஸ்

குடிக்கும் முறை

வெட்டி வேரை சுத்தம் செய்து எடுத்துக் கொள்ள வேண்டும்.

சுத்தம் செய்த வெட்டி வேரை ஒரு கிளாஸ் சுத்தமான தண்ணீரில் போட்டு ஊற விடுங்கள். வெட்டிவேரின் சாரம் நீருக்குள் இறங்கியதும் அதை வடிகட்டிக் கொள்ளலாம்.

இந்த நீரை அப்படியே குடிக்கலாம். காலை வெறும் வயிற்றில் மட்டுமல்லாது, நாள் முழுக்க தண்ணீருக்கு பதிலாக இந்த தண்ணீரை குடிக்கலாம்.


வெதுவெதுப்பான லெமன் வாட்டர்

தேவையான பொருள்கள்

வெந்நீர் - 1 கிளாஸ்

எலுமிச்சை - பாதி அளவு

தேன் - அரை ஸ்பூன்

குடிக்கும் முறை

வெதுவெதுப்பான நீரில் அரை எலுமிச்சை பழத்தின் சாறினைப் பிழிந்து நன்கு கலக்கிக் கொள்ளுங்கள்.

இதை அப்படியே காலை வெறும் வயிற்றில் குடிக்க வேண்டும். சுவைக்கு தேவைப்பட்டால் தேன் சேர்த்து குடிக்கலாம்.

தேன் இல்லாமல் அப்படியே குடிப்பது இன்னும் சிறந்தது. இது உடலில் உள்ள கழிவுகளை வெளியேற்றி உடலை டீடாக்ஸ் செய்யும்.

அதனால் உடல் எடையும் வேகமாகக் குறைய ஆரம்பிக்கும்.