Anup Jose

എന്തുകൊണ്ടാണ് ചില ബിസിനസ്സ് ചില ആളുകൾ ചെയ്യുമ്പോൾ വിജയവും അത് കണ്ട് നമ്മൾ എത്ര കഷ്ടപ്പെട്ടാലും നഷ്ടവും സംഭവിക്കുന്നതെന്ന് തോന്നിയിട്ടുണ്ടോ..

അവർ കള്ളം പറയുന്നതാണോ, അതോ നമ്മൾ ഏതെങ്കിലും കാര്യങ്ങൾ വിട്ട് പോയിട്ടുണ്ടോ, ഒരു കഥ പറയാം, അതിന്റെ പിന്നിലെ കുറച്ചു കാര്യങ്ങളും.

ബ്ലെസ്സൻ പാലക്കാട്‌ കല്ലടിക്കോട് സ്വദേശിയാണ്, ചെറുപ്പം മുതലേ മുയലിനെ വളർത്താൻ അദ്ദേഹത്തിന് ഇഷ്ടമായിരുന്നു, എന്നാൽ മുയലിന്റെ പിറകെ നടന്നു പഠനത്തിൽ പിന്നോട്ട് പോകുന്നു എന്ന് കണ്ടപ്പോൾ അദ്ദേഹത്തിന്റെ പിതാവ് വീട്ടിൽ വളർത്തിയിരുന്ന മുയലിനെ എല്ലാം ഒരിക്കൽ തുറന്ന് വിട്ടു.

അങ്ങനെ വീണ്ടും പഠനത്തിൽ ശ്രദ്ധിച്ചു അദ്ദേഹം ഗൾഫിൽ ഒരു ജോലി നേടി, എന്നാൽ 2017 ൽ തിരികെ നാട്ടിലേക്ക് മടങ്ങേണ്ടി വന്നു.

അങ്ങനെ നാട്ടിൽ ഇനി എന്ത് ചെയ്യും എന്നുള്ള അന്വേഷണം ബ്ലെസ്സനെ കൊണ്ട് ചെന്നെത്തിച്ചത് പഴയ മുയൽ വളർത്തലിൽ തന്നെയാണ്.

പക്ഷേ ബ്ലെസ്സന്റെ മുന്നിൽ കുറെയധികം വെല്ലുവിളികൾ ഉണ്ടായിരുന്നു, വീട്ടിൽ കുറച്ചു മുയലിനെ വളർത്തുന്നത് പോലെ അല്ലല്ലോ വ്യവസായത്തിനായി വളർത്തുന്നത്, സ്ഥലം ആണെങ്കിൽ വേനൽചൂടിന് പേര് കേട്ട പാലക്കാട്,

മുയൽ ഇറച്ചി കോഴി പോലെ അത്രയും ഡിമാൻഡ് ഉള്ള സാധനമല്ല, കൊളെസ്ട്രോൾ കുറവാണെങ്കിലും വേണ്ടത്ര പ്രചരണം ഇല്ലാത്തതിനാൽ പ്രാദേശിക വിപണിയെ മാത്രം ആശ്രയിച്ചിരുന്നാൽ നഷ്ടം മാത്രമായിരിക്കും ഉണ്ടാവുക.

ഇങ്ങനെ ബിസിനസിലെ ഓരോ പ്രതിസന്ധികളെയും മനസിലാക്കി അവയ്ക്ക് ബദൽ മാർഗങ്ങൾ കണ്ടെത്തിയപ്പോഴാണ് ബ്ലെസ്സണ് ഇതിൽ വിജയിക്കാൻ കഴിഞ്ഞത്.

ചൂടിനെ പ്രതിരോധിക്കാൻ വേണ്ടി 6 പാളികൾ ഉള്ള മേൽക്കൂരയും അതിന് മുകളിൽ നനയ്ക്കാൻ ഉള്ള സംവിധാനവും ഒരുക്കി, കൂടാതെ പാട്ടത്തിനെടുത്ത റബ്ബർ തോട്ടങ്ങളിലാണ് ഇത്തരം കൂടുകൾ സ്ഥാപിച്ചത്, അതുകൊണ്ട് ഏതാണ്ട് 8° വരെ ചൂട് കുറയ്ക്കാൻ കഴിഞ്ഞു.

അടുത്ത പ്രതിസന്ധി സ്ഥിരമായ വിപണി കണ്ടെത്തുക എന്നതായിരുന്നു, ഇതിനായി ബ്ലെസൻ ബെംഗളൂരുവിലെ വൻകിട മരുന്ന് കമ്പനികളുമായി (Pharma Labs) നേരിട്ട് കരാറുണ്ടാക്കി.

ലാബുകളിലേക്ക് പൊതുവെ ഇടനിലക്കാർ വഴിയാണ് മുയലുകളെ എടുക്കാറുള്ളതെങ്കിലും, ബ്ലെസന്റെ ഫാമിന്റെ ഗുണനിലവാരം കാരണം രണ്ട് വൻകിട കമ്പനികൾ നേരിട്ടെത്തി ആരോഗ്യപരിശോധന നടത്തി തൂക്കത്തിന്റെ അടിസ്ഥാനത്തിൽ മുയലുകളെ വാങ്ങുന്നു. കോവിഡ് പ്രതിസന്ധിയിലും ഇദ്ദേഹത്തെ താങ്ങിനിർത്തിയത് ഈ ലാബ് കരാറുകളാണ്. (2 മാസം പ്രായമുള്ളവയാണ് ലാബുകാർക്ക് നൽകുക).

വലിയ ഓർഡറുകൾ തികയ്ക്കാൻ സ്വന്തം ഫാം മാത്രം പോരാ എന്ന് മനസ്സിലാക്കിയ ബ്ലെസൻ, കേരളത്തിലുടനീളമുള്ള ചെറുകിട കർഷകർക്ക് മുയൽക്കുഞ്ഞുങ്ങളെ നൽകി.
അവർ വളർത്തുന്ന മുയലുകളെ നിശ്ചിത വിലയ്ക്ക് തിരികെ വാങ്ങുന്ന (Buyback) രീതിയിലൂടെ മൂലധനച്ചെലവ് കൂട്ടാതെ ഉത്പാദനം വർദ്ധിപ്പിച്ചു.

മരുന്ന് കമ്പനികൾക്ക് ഉയർന്ന ആരോഗ്യനിലവാരമുള്ള മുയലുകളെയാണ് ആവശ്യം. കേന്ദ്ര സർക്കാർ ഫാമുകളിൽ നിന്ന് നേരിട്ട് എത്തിച്ച ഉയർന്ന ജനുസ്സുകളെ (Pure breeds) മാത്രം വളർത്തിക്കൊണ്ട് വിപണിയിൽ തനതായ ബ്രാൻഡ് വാല്യൂ ഉണ്ടാക്കി.

ബിസിനസ്സ് പരാജയപ്പെടാൻ മറ്റൊരു പ്രധാന കാരണം തീറ്റച്ചെലവാണ്. ഇതിന് പരിഹാരമായി വിപണിയിലെ ബ്രാൻഡഡ് തീറ്റകൾക്ക് പകരം പ്രോട്ടീനും നാരുമുള്ള സമീകൃത തീറ്റ സ്വന്തം ഫോർമുലയിൽ നിർമ്മിച്ച് നൽകി ഉത്പാദനച്ചെലവ് വലിയ തോതിൽ കുറച്ചു.

ഇങ്ങനെ ബിസിനസിന്റെ ഉള്ളിൽ നിന്ന് ഓരോ പ്രശ്നങ്ങൾക്കും സ്വന്തം നിലയിൽ ഫോർമുലകൾ പരീക്ഷിച്ചപ്പോൾ ബ്ലെസ്സൺ തന്റെ ഇഷ്ട മേഖലയിൽ വിജയം നേടി.

മണ്ണിൽ റാബിറ്റ് ഫാം എന്ന് പേരുള്ള ബ്ലെസ്സന്റെ ഫാർമിൽ നിലവിൽ മാതൃ-പിതൃ ശേഖരത്തിൽ (Breeding stock) മാത്രം ഇന്ന് 100 മുയലുകളുണ്ട്. ശുദ്ധജനുസ്സുകളെ (Pure breeds) മാത്രം വളർത്തുന്ന ഫാമാണിത്.

ഏകദേശം 250 കൂടുകളിലായി 300 മുയലുകളെ ഒരേസമയം പാർപ്പിക്കാൻ ശേഷിയുള്ള ഷെഡാണ് ഒരുക്കിയിരിക്കുന്നത്. രണ്ട് തട്ടുള്ള സ്റ്റാൻഡിൽ ഉറപ്പിച്ച 22 കൂടുകൾ വീതമുള്ള 14 യൂണിറ്റുകൾ ഫാമിനുണ്ട്.

ഇവയിൽ എല്ലാം ആയി സോവ്യറ്റ് ചിഞ്ചില്ല (Soviet Chinchilla), വൈറ്റ് ജയന്റ് (White Giant), ഗ്രേ ജയന്റ് (Grey Giant), ബ്ലാക്ക് ബ്രൗൺ, ഇംഗ്ലിഷ് സ്പോട്ട്, നീളമേറിയ രോമങ്ങളുള്ള അങ്കോറ (Angora) തുടങ്ങിയ ഇനങ്ങളെയും വളർത്തുകയും

മാസത്തിൽ ശരാശരി 200 മുയലുകളെ വിൽക്കുകയും ചെയ്യുന്നുണ്ട്.

ബ്ലെസ്സന്റെ കഥ ഇവിടെ പങ്ക് വയ്ക്കാൻ ഒരു കാരണമുണ്ട്, സാധാരണ ഇത്തരം വിജയകഥകൾ സോഷ്യൽ മീഡിയയിൽ വരുമ്പോൾ പൂജ്യത്തിൽ നിന്ന് തുടങ്ങി ഇപ്പോൾ കോടീശ്വരനായി എന്ന രീതിയിൽ ആയിരിക്കും പ്രചരിപ്പിക്കുക,

എന്നാൽ എന്താണ് എങ്ങനെയാണ് അതിന്റെ ഉള്ളിൽ നടക്കുന്നതെന്ന് പലപ്പോഴും നമ്മൾ അറിയാതെ പോകുന്നു, അല്ലെങ്കിൽ നമ്മൾ കാണുന്നത് ആയിരിക്കില്ല ഉള്ളിൽ സംഭവിക്കുന്നത്.

ഒരു ബിസിനസ് വിജയിച്ചത് കണ്ടിട്ട് അതേ ബിസിനസ് കോപ്പി അടിച്ചാൽ വിജയിക്കണമെന്നില്ല. വിജയിച്ചത് ബിസിനസ് ആയതുകൊണ്ടല്ല, അതിന്റെ ഉള്ളിലെ പ്രശ്നങ്ങൾ പരിഹരിക്കാൻ ഒരാൾ സമയം ചെലവഴിച്ചതുകൊണ്ടാണ്.

അതുകൊണ്ടാണ് വിജയകഥകൾ വായിക്കുമ്പോൾ 'എന്ത് ചെയ്തു' എന്നതിനേക്കാൾ 'എങ്ങനെ ചെയ്തു' എന്ന ചോദ്യം കൂടുതൽ പ്രധാനമാകുന്നത്

വിജയകഥകൾ വായിക്കുമ്പോൾ നിങ്ങൾ കൂടുതൽ ശ്രദ്ധിക്കുന്നത് എന്തിലാണ്? അവർ എത്ര നേടി എന്നതിലോ, അതിലേക്ക് എത്താൻ എന്തൊക്കെ ചെയ്തു എന്നതിലോ?

ഈ ലേഖനം ഇഷ്ടം ആയെങ്കിൽ കമന്റ്‌ ചെയ്യുമല്ലോ, വീണ്ടും മറ്റൊരു കഥയും ആശയവുമായി വരാം.

✍🏻 Anup Jose