Bodywork_artstudio

解答對Body Work嘅疑問🤔️

Body Work 課堂相對新，而且同其他舞蹈課堂唔一樣，等我哋解答吓大家嘅疑問啦！

Body Work係咩嚟㗎？
- Body Work 係集合舞蹈堂同埋治療性藝術嘅課堂，堂上唔會淨係教跳舞或者記舞步，而係用一啲練習同遊戲，讓小朋友身體舞動之餘，亦都要運用表達能力以及創意，身體同腦袋都同時郁動！

喺Body Work課堂入面，參加者要跳幾多舞？
- Body Work 課堂會同傳統舞蹈堂唔一樣，唔會只係學習舞蹈動作，參加嘅大小朋友都會用身體，完成各個練習同遊戲，好似戲劇堂咁，身體語言同表達會係課堂主要嘅溝通方法，希望突破日常嘅限制，創造更多嘅可能性！

Body Work 動作難唔難？
- 同之前所講，課堂嘅動作會主要由參加嘅大小朋友自行創作而成，課堂主要係啟發大家創作同埋自由地舞動身體。可能比較難嘅會係，將自己創作嘅動作加以編排再記住，呢一步就係訓練身體記憶同埋開發創造力嘅時候！

上堂應該着咩衫？
- 同舞蹈堂一樣，著上鬆身、舒適，同埋可以郁動嘅衫褲就可以！因為上堂會大動作地郁動，太蓬鬆或太多飾物都未必適合。另外我哋課堂會除鞋上堂，大家都可以準備定舒服嘅襪仔，甚至好似老師咁赤腳都得！

👣Body Work根據表達性治療嘅系統，以三個唔同層面去設計課堂：動覺／感覺層面、感知／情感層面，以及認知／象徵層面。

🕺🏻動覺／感覺層面（Kinesthetic / Sensory level）：
以動作和感覺經驗為主，強調動覺歷程，Body Work課堂以應用身體動作同啟發感知嘅材料，例如黏土、彩繪、粉彩筆等。配合舞蹈同埋肢體開發嘅練習，強化小朋友嘅動覺同感覺。

🥰感知／情感層面（Perceptual / Affective level）：
課堂以創作為主，加入創意遊戲同練習，鼓勵小朋友表達對外在世界嘅感知，同時加入同運用情緒，以紙張和顏料作為表達嘅材料，配合創作同表達。

👀認知／象徵層面（Cognitive / Symbolic level）：
課堂之後同小朋友經歷處理複雜資訊嘅過程，加入象徵符號去表達想法同感受，運用寫作同多媒體嘅協助，鼓勵有意識嘅創作同表達

親子班🐣
💕Body Work 親子班著重建立同強化小朋友同大朋友之間嘅連繫，透過課堂作為平台，促進親子嘅溝通同埋了解。

喺課堂入面，大朋友將會同小朋友一齊創作，一齊嘗試，以平衡同和諧嘅關係一齊學習，藉此能夠了解到對方嘅長短處，互相支持。

Body Work 課堂目標🐝

Body Work 課堂以舞蹈作為切入點，訓練小朋友嘅身體協調、靈活性同平衡力等，著重開發身體，強化心理質素。對五感(5 senses)嘅開發同訓練，亦係Body Work 課堂嘅重心。

課堂亦包括創作練習，鼓勵小朋友發揮創意，表達自己，令小朋友更有自信、更肯定自我。