Nabua Methodist Circuit

Nu sa lea bula vinaka saka na lewe ni noda i Wasewase vakaturaga ko Nabua, kei na kena tabacakacaka. Oqo saka na nodra i tukutuku na noda i Talatala Qase e na vuku ni nodra i tuvatuva na noda Qase Levu, me baleta na kena qaravi na Sakaramede ni Vakayakavi ni Turaga e na Siga Tabu saka oqo, na i ka 18 ni Jiulai, 2021.
E ra sa na liutaki keda na noda Qase Levu, Rev Ili Vunisuwai ena kena qaravi na i tavi bibi oqo. E vica na ka e yaga me da vakarautaka;
1. Me vakarautaki e na noda veivuvale na madrai, waini, kei na dua na teveli;
2. Me da sa vakarau e na loma ni noda vei vuvale ena 2.30pm, ka me da dui tekivu ena sere kei na masu;
3. Me na tekivu donu e na 3pm na sakaramede ka na vakavoqataki tiko yani ena Radio Fiji One kei na i volamata ni MCIF;
4. Era na liutaki keda tiko na noda Qase Levu ena sakaramede ka sa kerei me vakalevutaki na rorogo se volume e na raitio kei na i vola mata me rawa ni matata na veika e vakayacori;
5. Oi keda na tama me da na taura na madrai kei na waini, ka vota yani vei ira na lewe ni noda vuvale ni bera ni da qai vakaivotavota e muri;
6. Era na qai vakacavara na soqoni oqo na noda Qase Levu e na dua na i vunau lekaleka kei na masu ni Veivakalougatataki.
Era sa vakanuinui na noda i Talatala Qase ni da na qarava ka marautaka na i tuvatuva ni noda lotu, ka kerei mo ni qai taro mai vei iratou na noda Qase ena vei tikotiko ni Lotu ke so na lomatarotaro.
Sa malo saka vakalevu.

Ni sa bula vinaka saka tale mai na lewe ni noda i Wasewase/Tabacakacaka ko Nabua.
Sa tekivu me vakacagau na vakavakarau ki na noda Bose Vakayabaki ni 2021. Sa dabe rawa ena yakavi ni Tusiti (13:04:21) na Bose Vaka i Talatala kei na nodratou sa mai vakatarogi na lewe ono (06) na lewe ni noda i Wasewase ka ratou gadreva me ratou sa dabeca na veitarogi ki na vuli Talatala. Era a dabe na i Vakatawa Yaco me ra veitokoni ena kena qaravi vakavinaka na bose ka oqo.
Era a solia na nodra vosa ni veitataunaki na Turaga i Talatala Qase, Rev Josefa Sewale vei iratou na i tokani vakayalo ni oti na nodratou vakatarogi mai vua na i Talatala ni TC ko Vatuwaqa, Rev Saini Mauitoga.
E sa na tekivutaki na noda bose ena lotu ni veikidavaki ena yakavi ni Vukelulu 28:04:21, ena 4 na kaloko ena yakavi. Tekivu vinaka na Bose ena Lotulevu ka vakacavari ena siga Vakaraubuka.
Ko ni sa kerei na lewe ni noda i Wasewase me da masulaka me yaco tikoga na lewa savasava ni Kalou ena loma ni noda i Wasewase.
Sa gadrevi me cavuti saka yani na vakavinavinaka levu vei kemuni na Turaga kei na marama ena TC ko Nabua ena kena vakarautaki vakavinaka na vanua ni bose, na veiqaravi vakavanua kei na nodra vakani na Qase ni lotu.
Sa nodra masu na Qase ni lotu me sobu saka tiko na nona veivakalougatataki na Tamada vakayalo vei kemuni me i dole ni nomuni yalo dina. Sa lea malo.