Sunni

// //
🌻በአንድ ወቅት አንድ ፈጣሪ በሰጠው ጸጋ አመስግኖ የማያውቅ ስስታም ነጋዴ ነበር። ከዕለታት አንድ ቀን ለንግድ ስራ ከሄደበት ወደ ቤቱ ሲመለስ 100 የወርቅ ሳንቲም ይጠፋበታል።
ነጋዴው "100 የወርቅ ሳንቲም ያገኘ ካለ ወረታው ከፋይ
ነኝ" እያለ ቢለፈልፍም ሊያገኘው አልቻለም። አንድ ቀን ተስፋ ቆርጦ እቤት ቁጭ ብሎ እያለ አንድ ልብሱ የቆሸሸ ገጽታው የተጎሳቀለ ሰውዬ የነጋዴውን ቤት አንኳኳ።
በር ተከፍቶ ወደ ሳሎን ቤቱ ሲዘልቀ እንግዳው ሰውዬ የመጣበትን ጉዳይ እንዲህ ሲል አስረዳ ፦
ጌታዬ 100 የወርቅ ሳንቲም መንገድ ላይ
አግኝቼ ነበር። ባለቤቱም እርሶ እንደሆኑ ነው የተነገረኝ። ምንም የዕለት ጉርሻ የሌለኝ ድሀ ብሆንም የሰው ንብረት አልመኝም። ስለሆነም የወርቅ ሳንቲሞን ይዤሎት መጥቻለሁ አለ።
🌻የሚሰጠውን ጉርሻ ምን ሊሆን እንደሚችል በልቡ እያሰበ።
ነጋዴው ይህን ሲሰማ ወረታውን ላለመክፈል በአንዴ ፊቱ ተለዋወጠ። አንተ እንዳልከው 100 የወርቅ ሳንቲም ብቻ አይደለም የጠፈብኝ። በአጠቃላይ የጠፋብኝ የወርቅ ሳንቲም መጠን 125 ነው። ስለዚህ 25 የወርቅ ሳንቲም አስቀርተክብኛል። አሁን ሌላ ጣጣ ሳይከተልህ 25ቱን ሳንቲም መልስልኝ ሲል አስፈራራው።
ምስኪኑ ሰውዬ ከቅንነት ተነስቶ ያደረገው ነገር ያላሰበው ጣጣ ስለመጣበት እጅግ ተጨነቀ። "ጌታዬ እኔ ያገኘሁት ይሄ ብቻ ነው ምናልባት ሌላ ቦታ ወድቆ እንዳይሆን። በፈጣሪ እምልሎታለው እኔ አልወሰድኩም። በማለት ሊያስረዳው ሞከረ።
ይሁን እንጂ ሀብታሙ ነጋዴ አእምሮ በጥቅም ታውሮ ምንም አይነት የርህራሄ ስሜት ሊያሳይ አልቻለም በዚህም 25 የወርቅ ሳንቲም ወስዶብኛል በሚል ከሰሰው። ድሀው ሰውዬ ከዳኛ ፊት ቀርቦ እንዲህ ሲል ተከራከረ።
ክቡር ዳኛ ከ 100 የወርቅ ሳንቲም ውጪ ሌላ ነገር አላገኘሁም። አግኝቷል የሚል ምስክር። ከተገኘ ግን የሚሰጠኝን ቅጣት በጸጋ ለመቀበል ዝግጁ ነኝ ሲል ተናገረ።
በዚህ ጊዜ ጉዳዩን ይመለከት የነበሩት ዳኛ ጠፋ የተባለው የወርቅ ሳንቲም መጠን ምን ያህል እንደሆነ ቀደም ብሎ መረጃ ደርሷቸው ስለነበር የሚከተለው ውሳኔ አስተላለፉ።
>>>>>>>
"ጠፋ የተባለው የወርቅ ሳንቲም 100 ብቻ እንደሆነ መረጃ አለን። እርስዎ የተከበሩ ከሳሽ ጠፋብኝ እያሉ ያሉት ደግሞ 125 ነው።
ስለዚህ 100 ው የወርቅ ሳንቲም የእርስዎ ሊሆን አይችልም። ምናልባት 125 የወርቅ ሳንቲም የወሰደ ሰው እስኪገኝ ድረስ ይጠብቁ።
አሁን የተገኘው ሳንቲም ግን ትክክለኛ ባለቤቱ እስካልተገኘ ድረስ ላገኘው ሰው እንዲሰጥ ወስንናል።"
የሚል ፍርድ ሰጡ በመጨረሻም ድሀው ሰውዬ ሀብት በሀብት ሆኖ ሲመለስ ስግብግቡ ነጋዴ ደግሞ ባዶ እጁን ለመመለስ ተገደደ።
መልካምነት ለራስ ነው። መልሶ ይከፍላልና!
ኢትዮጲያዊነት መልካምነት ነው።