CV Maker

❤️😍

فيه معلومة مهمة بتقول إن محافظة المنيا هي ثالث محافظة أثرية مصرية بعد الجيزة والأقصر!.. يمكن عشان كده تم إطلاق اسم "عروس الصعيد" على المحافظة الجميلة المميزة واللي بتجمع كمية ضخمة من الآثار من أول عصر قدماء المصريين وحتى العصر الإسلامي!.. ويمكن عشان كده برضه قرر مجموعة من طلاب الفرقة الرابعة قسم العلاقات العامة في كلية الإعلام جامعة الأزهر إنهم يعملوا خطوة تسلط الضوء على المنيا كمكان سياحي مُبهر.. عملوا إيه؟.. مشروع حملة ترويجية اسمها "عروس الصعيد" هدفها..

"شريف محمد" واحد من أعضاء المشروع اللي بيتكون من 15 عضو قال في تصريحات للصحفي "عبدالعزيز سلامة": (مشروعنا عبارة عن حملة ترويجية لمحافظة المنيا كمكان سياحي، واللي ساعدنا على اختيار المشروع إن المنيا فيها مناطق آثرية من آلاف السنين ومرت بجميع العصور التاريخية وفيها أماكن ترفيهية جميلة جدا، ورغم كده محدش بيسمع عنها.. عاملين صفحة على الفيسبوك وعلى الانستجرام عشان ننشر عليها ونروج من خلالها للمناطق السياحية اللي في المنيا)..

الفكرة إن المنيا فيها كمية متنوعة من الأماكن الأثرية يعني مثلاً من الآثار القديمة "تل العمارنة"، و"تونا الجبل"، و"طهنا الجبل"، و"مقبرة ماهو"، و"إسطبل عنتر".. ده غير المعبد الروماني ومعبد نيرون ومدينة هيرموبوليس ومنطقة بني حسن والبهنسا، ومتاحف أثرية زي متحف ملوي ومتحف الأتوني، وغيرهم..

الشباب قدموا طلب بالحصول على تصريح عشان يقدروا يصوروا كل الأماكن السياحية دي في المنيا وفي انتظار الموافقة عليه، وبإذن الله قريب جداً يكون بين إيديهم عشان يفرجوا الناس على جمال محافظتهم بعيونهم..

شباب مصري جميل قرروا من نفسهم وبدون توجيه من حد إنهم يقولوا بلدنا جميلة ويخلّوا غيرهم يشوفوا الجمال ده.