Xcloseve

نحط زيت ايه للعربيات الهايبرد من كيا و هيونداي؟؟
ناس كتير بتقول نحط 0W20 زي ماهو موجود على ملصق جوه الكبوت . و ناس تانيه تقولك لا نحط 0W30 و ناس تالته تقول 5W30

احب اوضح في الاول ان نوع الزيت مالوش علاقه بالموتور نفسه . ده ليه علاقه بالظروف التشغيليه للموتور ده . و مش هدخل في تفاصيل علميه ممكن تكون مهمه لكن هتاخد قصايد عشان نتكلم فيها .

الزيت اهم خاصيتين فيه للعربيات الحديثه . لزوجته و هو بارد و ده الرقم اللي بيبقى عالشمال من رقم اللزوجه

و الخاصيه التانيه الاهم بالنسبه لينا هيا اداؤه في ظروف الحراره التشغيليه اللي هيا الرقم اللي عاليمين

نفهم من كده ان ال 0W20 هيكون اسرع في تزييت الموتور من جوه في الجو البارد و هيبقى خفيف مع حراره التشغيل فهيدينا استهلاك بنزين افضل

لكن المشكله انه غير مصمم للاجواء الحاره زي عندنا!!!

ايوه زي ما بقولك كده . و الدليل تحت عندك اهو من موقع كيا للصيانه بشكل رسمي

الموتور في كوريا و في مصر واحد . و الزيت هنا و هنا مختلفين .

هنلاحظ مكتوب بوضوح (للشرق الاوسط ، الهند ، ليبيا ، الجزائر ، ايران ، المغرب ، السودان ، تونس و مصر يستخدم زيت 5w30.

ما قلناش ابدا ان ال 0W20 هيبوظ الموتور عالمدى القريب . لكن مع الحر و الزحمه و العمر هيزعلك .

نصيحتنا استخدم دايما زيت لزوجه 5W30 من مصدر موثوق فيه عشان تحافظ على موتور عربيتك الهايبرد اطول فتره ممكنه



#هايبرد
#سورينتو
#سبورتاج
#توسان
#كيا
#هيونداي