Sajid

عايزين نعمل زي ما بنسمع في البودكستات و الفيديوهات ننام 8 ساعات و نجري كل يوم الصبح قبل الشغل و نحافظ علي نضافه البيت و نتمرن و نربي حيوانات و نمارس هواياتنا و نخرج ونتفاعل مع صحابنا و نحافظ علي الصلاه و نود قرايبنا ونرجع ننام بدري زي ما الناس دي ما عايشه بقى!

الكلام من ظاهره شكله جميل و ريحته حلوه بس مين يقدر يعمل كل ده في 18 ساعه بعد ما نمنا 8 ساعات؟ ولا حتى 24؟

المشكله الاساسيه في الجدوله ذاتها, نقدر نغير حياتنا و ندخل فيها عادات جديده صحيه بس بدل متحشرهم في جدولك اليومي ومتلاقيش وقت تتنفس فيه جرب تجدولها بشكل اسبوعي

مش لازم الاستمرار علي العادة يومياً قد ما الاستمرار نفسه مهم "قليل مستمر خير من كثير متقطع"

عشان كده ممكن تخصص يوم الاجازه انك تجدول اسبوعك فيه و تقسمه لتلت رتب من الاولوية:
1. مهم ومفيهوش نقاش (النوم - الصلاة - الشغل)
2. مهم بس نقدر نتفاوض فيه (التمرين - الخروج - القرايه - صلة الرحم)
3. كويس لو عملناها (نتمشى - حضور ايفينتات - مساعده صديق)

طبعاً تقدر تحدد عناصر القايمه حسب اولوياتك و مهامك انت , كل الي عليك انك هتلتزم تعمل الحاجات الي مفيهاش نقاش يومياً و الي تقدر تتفاوض فيه ممكن تفضيله وقت كل 3 ايام في الاسبوع و الكويس لو عملته ممكن تخليه يومين او يوم في الاسبوع

لما السنه تخلص هتحس بإنجاز فعلاً ومش هتحس بإستنزاف و هتحافظ علي استمرار العادة الجديده.

متخلصش الكتاب كله اقرأ 10 صفح في الجلسه وكده كده الوقت هيعدي.