Nona Kitchen

🔴 الجلاش بالكريمة بكل تكاته 👌😋

⭕ المقادير
🔸لفة جلاش
🔸كوب ونص سكر
🔸نص كوب سمنه بلدي
🔸نص كيلو حليب بارد
🔸٣ معالق كبيرة نشا
🔸كيس ڤانيليا

⭕الطريقة ..

▪️أول حاجة هعمل الكريمة ...
ناخود كوباية صغيرة من مقدار الحليب البارد وندوب فيها النشا كويس جدا بره ونحط باقى الكمية على نار متوسطة ولما تبتدى تسخن ننزل بكوباية الحليب بالنشا وكيس الڤانيليا ونقلب باستمرار لغاية ما توصل لقوام كريمى وناعم تقيل.
هطفى عليها واسيبها تهدى شوية واحطها فى التلاجة واغطيها عشان ما تعملش قشرة على الوش

▪️طريقة السيرب (الشربات)

هضيف كوبايتين من الميه على كوباية ونص سكر ومعلقتين كبار من عسل النحل (اختيارى)
فى حله على النار واسيبهم لما يغلوا والسكر يدوب تماماً ، وممكن نضيف معاهم فص حبهان أو عود قرفة بيخلوا طعمه حاجه تانيه خالص

هطفى عليها واضيف معاها معلقة سمنة

فى صينية برص نص لفة الجلاش بتاعتى طبقتين طبقتين عكس بعض (اتنين بالطول واتنين بالعرض) عشان اخللى جزء من أطراف الورق برة الصينية واقفل بيه على طبقة الكريمة من الجوانب.
مش بندهن بين الطبقات ولا حاجه
ولا بدهن الصينية نفسها بمادة دهنية ده بيخليها تلزق
بضيف الكريمة بتاعتى فى النص واوزعها كويس بإيدى وبعدين ألم الأطراف الخارجية للورق عليها من الجوانب واقفلها عليها كويس
هارص باقى الطبقات فوق الكريمة بنفس الطريقة والف الأطراف الزيادة لجوة من تحت الطبقة اللى فيها الحشوة واقفلها كويس زى القرص (فى حالة الصينية تكون مدورة)
هسيح السمنة وتبقى دافيه مايله للبارد واوزعها نص الكمية على سطح الصينية واخليها تنزل فى كل الجوانب

بسكينة حامية وأقطع الصينية بتاعتى كويس ومانخافش السمنة هتعمل عازل بين السكينة والكريمة مش هتلزق فيها

بعد ما بقطعها كويس بوزع باقي كمية السمنة على الوش وفى أماكن التقطيع

لو عندنا بخاخة ميه بديها رشتين تلاته على الوش أو بنرش خفيف بإيدينا عشان يفضل رطب وما يتحمرش أسرع من باقى الطبقات اللى جوه

▪️التسوية
بدخلها الفرن ويكون سخن من قبلها كويس على حرارة ١٧٠ فى الرف الاوسط وبتابعها لغاية ما الحروف تحمر والوش يبتدى ياخود لون
بقفل عليها من تحت واشغل الشواية تديها لون دهبى جميل واطلعها سخنة واسقيها بالشربات دافى مايل للبارد

نغطيها خمس دقايق وبعدين نسيبها تهدى ونقطع وناكل احلى جلاش بالكريمة ممكن تدوقوا فى حياتكم 😋😋
وده لينك طريقة عمل الجلاش بالكستر 👍👍https://yt6.pics.ee/3pvvx8

⭕ الفراخ المشويه على الجريل بكل أسرارها 😉

اول خطوة مهمة جداً وتعتبر أساس نجاح الوصفة .. وهى إننا إزاى نفتح الفرخة صح ونشيل سلسلة الضهر منها .
(السلسلة بتتفرز وتتسلق فى اى وقت ويتاخد منها شوربة مش بنرميها)
وبعدين بنفردها كويس ونضغط عليها بإيدينا عشان تبتدى تفتح كلها واجزائها تنفصل عن بعض من الداخل وده هيخليها تستوى كويس والتتبيلة تتوزع فيها بشكل متوازن وكمان شكلها يكون حلو 👌

◾تابعوا الصور بالترتيب 👇
⭕ ملحوظتين مهمين ..

🔸اى دجاج مشوي لازم وزنه يكون صغير من كيلو الى كيلو و٢٠٠ جرام فقط 👍
((الوزن ده مناسب للشوى على اللهب المباشر فقط . لكن نقدر نشوى اى أوزان تانى فى الفرن عادى))

🔸الدجاج المشوي يا إما بيكون مجمد مسبقاً أو منقوع فى محلول نقع مدة لا تقل عن ١٢ ساعه وتصل ل ٤٨ ساعة ... الدجاج الفريش الطازج لحمة هيشد ومش هيبقى طرى.

🔴 ودى تتبلية مميزة للدجاج المشوى 😋

🔸توابل جافة ( ملح وفلفل وتوم بودرة وبصل بودرة وبابريكا وحبهان مطحون ومعلقة سكر صغيرة ورشة كمون ورشة قرفة ومعلقة صغيرة كركم ) + مكعب مرق خضروات او دجاج نفرمه معاهم

🔸هنضيف عليهم معلقة كبيرة مستردة ومعلقتين لتلاتة كاتشب وربع كوب صغير زيت ونقلب كل ده مع بعض لغاية مايبقى زى المعجون

🔸بخلة سنان أو خلة شيش او سكينة بوزها رفيع هانخرمها خصوصاً فى المناطق اللى لحمها كثافتة عاليه

🔸هاندهن الفرخة برة وجوة وبين الجلد وفى كل مكان نقدر نوصولوا
ونحطها فى كيس تلاجة ونضيف عليها باقى التتبيلة ونسيبها فى التلاجة مش اقل من ساعة وياريت نقلب الكيس كل نص ساعه.

🔸بعدها نخرجها بتتبيلتها ونحطها فى صينية ونغطيها بفويل أو نحطها فى كيس حرارى وندخّلها الفرن على درجة حرارة ٢٠٠ لمدة ساعة ونص ونشيل الغطاء أو نفتح عليها الكيس ١٠ دقايق كمان تحت الشواية عشان تاخد لون.
أو نحطها على الجريل وتتقلب كل ١٠ دقايق او على الشواية الفحم وتكون على إرتفاع مناسب من مستوى اللهب ما يقلش عن ١٢ سم عشان ماتاخودش لون من برة وقلبها يكون لسه ما استواش كويس
وسلاطاتكم بقى وبألف هنا وشفاء 🌹🌹

لما بنيجى نفرد العجينة اكتر حاجه بتدايقنا إنها تفضل تلم (تكش) معانا 😫😫 ودى بتكون حاجة مرهقة لغاية مانوصل للحجم المطلوب.👍👍

هقولكم على سر بس ماتقولهوش لحد 📣📣📣

معلقة كبيرة من "الخل" على كل كيلو دقيق تخللى العجينة ترتاح معانا كويس وماتلمش أثناء الفرد خالص 👌👌
وكمان الخل بينشط مواد الرفع (البكنج بودر أو الكربوناتو) ويخللى العجينة هشة واكتر طراوة 👌
كمان هو مادة حافظة لو قررتى تحتفظى بيها فى التلاجة اكتر من يوم 👍
وكل ده بمعلقة خل واحدة 🤝يابلاش 😁
وطبعاً الكلام ده لكل المعجنات
البيتزا الفطير عيش فينؤ عيش عادي كرب رقائق اي نوع من المعجنات🥖🍞🥐🥞🍔🍕🥯

السؤال الأزلى .. الجبنة الموتزاريلا مش بتشد معايا ليه؟!

اقولك انا ليه ..
عشان فى انواع من الجبنة مش بتكون مصنعة اصلا من الألبان ، بتكون من الدهن النباتى (زيوت النخيل المهدرجة) ودى اللى بتنشف معاكى ومهما عملنا صعب انها تدينا المطه اللى فى خيالك 🙄

طب الحل إيه؟

الحل نشترى اللى مصنعه من الحليب الطبيعى وتكون كامل الدسم كمان ... دى اللى بتمط وتشد وتتشقلب وتعمل كل الحركات 👍💪😂

⛥ ملحوظة ...

لو الفرن بتاعك حامى زيادة عن اللزوم هتتحرق ومش هتمط .

ولو قعدت فى الفرن أطول من المدة المطلوبة للسوى برضوا هتنشف ومش هتمط

خودى التركتين دول بقى 💡 وادعيلى 😉

🔸قلبى معلقتين من الحليب مع الجبنة المبشورة قبل ماترشيها على وش البيتزا عشان نحافظ على رطوبتها وماتنشفش طول مدة التسوية

🔸ضيفي الجبنة على مرتين .. نصها مع البيتزا اول ما تدخل الفرن والنص التانى قبل ما تخرجيها بخمس دقايق
وشوفى المطه والبطه والقطه ياست الكل 🍕🍕👍👍

بمناسبة تريند البرجر و اسلام فوزى .... قررت اقولك تعمليلوه احلى برجر فى البيت ازاى بدل ما ياكله برة مع صحبته 🍔🍔🍔🍔😂😂😂😂🍟🍟🍟

هنجيب كيلو لحم من عند الجزار سليم نص كيلو من الكتف و نص كيلو من الدوش منطقة الصدر عشان بيكون فيها دهون و لو مش مليانه خلى الجزار يديكى بوش ١٠٠ جرام و يفرمهم مرتين وشين يعني و فى البيت نعمل الطريقة دي 👇👇👇👇
بولة كبيرة و تحطى فيها اللحمه اللى اتفرمت و تحطى عليها معلقة توم بودرة و معلقة بصل بودرة و معلقة صغيرة جوزة الطيب و معلقة كبيرة ديمجلاس بودرة لو مش عندك عادي جدا ميقولش لا و نقطة زيت زيتون و تقلبى كويس جدا و تعملية كور بايدك و تحطى كل كورة فى كيس بلاستك و ببطن ايدك تدوسي عليها تفريديها جوة الكيس البلاستك ( كيس بورشن - اللى هو كيس للبن بلاستك ابيض ) و تحطيها فى التلاجه ساعتين تشد تطلع على الجريل رشة زيت و تنزلى بيها او فى الطاسة رشة زيت و تنزلى بيها و السر اول ما تحطيها ترشى رشة ملح و فلفل و تقلبيها و البرجر مش لازم يتحرق فى سينس فى تسويته عشان لازم يطلع الدهون بتنزل منه و ميته كده مش ناشف حجر
عيش كيزر تحمصى وشة لاسعه فى الطاسة اللى اتعمل فيها البرجر عشان ياخد ريحه الدهن وبعدين مايونيز خس كابوتشا شرايح طماطم شرايح خيار مخلل و قطعة البرجر و حتة الجبنه و نقفل الساندوتش و الف هنا ممكن اضافة مشروم .. جبنه بصل مكرمل زى ما تحبوا

وطبعا الصوره مش من عندي لشد النتبها😂😂😂