Capsulera

خلال عام 2021 فيه تطورات كبيرة حصلت في لينكدإن أهمها الزيادة الملحوظة لعدد المستخدمين في الدول العربية خصوصًا مصر والسعودية والإمارات، وتجاوز إيرادات الإعلانات في الربع الثالث من نفس العام لحاجز المليار دولار لأول مرة.

وخلال الربع الأول من العام الحالي 2022 الزيادة السنوية لعدد المستخدمين في مصر والسعودية وصلت لأول مرة إلى حاجز المليون مستخدم (1.2 مليون مستخدم جديد في مصر ومليون مستخدم جديد في السعودية).

وغالبًا خلال 2-3 أعوام لينكدإن هتكون واحدة من المنصات الفعالة في الإعلانات في كذا دولة عربية، لو استمر معدل نمو المستخدمين عليها بنفس المستوى ده.

وأعتقد إن ده وقت مناسب للناس اللي عايزة تبدأ في تجربة التسويق على لينكدإن (أورجانيك / مدفوع) بحيث يكونوا مستعدين قبل ما المنافسة هناك توصل لمستويات عالية زي ما بيحصل لأي منصة لما عدد المستخدمين عليها بيزيد.

حتى لو إنت بتبيع منتجات استهلاكية (عطور - ملابس رسمية - أجهزة كمبيوتر - موبايلات - ....) ممكن تبدأ في استكشاف المنصة من دلوقتي كقناة تسويقية جديدة، بس حاول دائمًا نوعية المحتوى اللي بتنشره هناك يكون له علاقة بالحياة الوظيفية أو البيزنس.

يعني لو نشاطك بيع موبايلات وكمبيوتر ممكن تبدأ في نشر ترشيحات لبرامج أو تطبيقات زيادة انتاجية أو تصميم تقارير، وإرشادات عن تأمين الموبايلات أو أجهزة الكمبيوتر ضد الاختراق في أماكن العمل المشتركة، ومراجعات فنية عن مواصفات الأجهزة المناسبة لوظائف معينة.
ونفس الموضوع مع العطور والملابس الرسمية، إنشر ترشيحات لأنواع العطور المناسبة لمقابلات العمل، أو أخطاء شائعة في اختيار الملابس الرسمية وطرق ارتدائها، وهكذا.

ودي مجموعة نصائح ممكن تسترشد بيها لو لسه هتبدأ:

1- إبدأ ببروفايلك الشخصي وكمل كل بياناتك الرئيسية (هتلاقي مقال تفصيلي في أول تعليق بيشرح لك كل أقسام البروفايل وتعمل فيها إيه).
2- حاول تنشر 2-3 بوستات بشكل أسبوعي (ممكن تعمل إعادة صياغة للبوستات اللي بتنشرها على فيسبوك أو إنستاجرام لتناسب طبيعة مستخدمي لينكدإن).

3- لو مفيش لك حساب شخصي على لينكدإن ولسه هتعمل حساب جديد فلا تبدأ في إنشاء صفحة تجارية لنشاطك بعد إنشاء حسابك الشخصي مباشرة لإن طلبك هيترفض، استخدم الحساب في التفاعل بشكل طبيعي لمدة إسبوعين على الأقل، وبعدين اعمل الصفحة (هتلاقي خطوات إنشاء الصفحة بالتفصيل في نفس المقال في أول تعليق).

4- من أكتر أنواع المحتوى اللي بتجيب تفاعل حاليًا هي ملفات PDF قصيرة (5-10 صفحات) فيها إرشادات أو محاذير مكتوبة بخط كبير مناسب لتصفح تطبيق لينكدإن من الموبايل (سهل جدًا تعملها على Canva كمجموعة صور متتابعة وتحفظها كملف PDF وممكن تستخدم Google Slides أو Power Point).

5- إنشر على الصفحة التجارية وعلى الحساب الشخصي وفي بعض الأحيان شارك على حسابك الشخصي بوستات منشورة على الصفحة علشان تعرف متابعيك على الصفحة الجديدة.

6- إعمل بحث باستخدام المسمى الوظيفي للوصول إلى العملاء المحتملين المناسبين لك في الدولة اللي انت بتستهدفها وتفاعل مع المحتوى اللي بينشروه على حساباتهم الأول وبعدين ابعت لهم طلبات إضافة.

7- بلاش تبدأ في إنشاء إعلانات مدفوعة في الوقت الحالي لو ميزانيتك محدودة أو عايز تروج لمنتجات أو خدمات بشكل مباشر، الأفضل تواصل التسويق بشكل طبيعي (أورجانيك) لكذا شهر، ولما يكون عندك قاعدة معقولة من المتابعين اللي جبتهم بشكل طبيعي من خلال التفاعل ونشر المحتوى ( 500 - 1000 للصفحة التجارية و 1000-3000 في الحساب الشخصي) ممكن تبدأ في تجربة الإعلانات المدفوعة.

8- لما تبدأ في تجربة الإعلانات المدفوعة لازم يكون عندك على الأقل ميزانية 300-600 دولار في الشهر مخصصة للتجربة على مدار 3 شهور علشان التجربة تكون كاملة ويكون عندك بعد 3 شهور بيانات واقعية تقدر تبني عليها قرارات صحيحة للتوسع.

9- الحملة الإعلانية الاختبارية على لينكدإن يفضل تستمر لمدة 14 يوم متواصلين بميزانية يومية 20-30 دولار لمراعاة قلة مرات دخول المستخدمين لحساباتهم وانخفاض معدل توافرهم على مدار أيام الإسبوع مقارنة بفيسبوك وإنستاجرام.

10- يفضل كل إعلان موجود داخل الحملة يكون مخصص له 10 دولار يوميًا على الأقل يعني لو الحملة هيكون فيها 3 إعلانات خصص لها ميزانية يومية 30 دولار منعا لتفتيت ميزانية صغيرة على كذا إعلان. (ملحوظة: الحد الأدنى للميزانية اليومية 10 دولار بشكل إجباري).

11- في حالة استهداف الدول العربية حاول تخلي جمهورك واسع يعني حدد فئة عمرية ومجموعة اهتمامات مناسبة لمجالات عملهم، وخلى بالك إن تكلفة الألف مرة ظهور CPM حاليًا بتتراوح بين 100- 185 جنيه في مصر، وتكلفة النقرة CPC بتترواح بين 3 - 11 جنيه بحسب آخر تجارب خلال شهري فبراير ومارس 2022.

12- أول حملات ممكن تبدأ بيها هي حملات التفاعل Engagement ودي هتساعدك في زيادة عدد المتابعين لصفحتك التجارية وزيادة التفاعل على البوستات اللي بتروجها في نفس الوقت، وبعد كده ممكن تشتغل حملات كونفيرجنز لو عندك موقع ومثبت عليه LinkedIn Insights Tag.

13- ممكن تقدم طلب للحصول على كوبون بقيمة 50 دولار من لينكدإن وتضيفه في حسابك الإعلاني (صلاحيته سنة كاملة بعد إضافته في حسابك الإعلاني) بحيث لما تعمل أول حملة وتكون ميزانيتها 150 دولار مثلًا تدفع 100 دولار فقط، وده رابط مباشر لطلب الكوبون (مخصص فقط للمعلنين الجدد):

https://bit.ly/linkedin-promo-code-request

14- من وقت للتاني لينكدإن بيبعت كوبونات مجانية للإعلانات بقيمة 500 دولار إلى إيميلك بس بشرط تصرف 500 دولار زيهم الأول خلال فترة محددة.

15- لينكدإن مش منصة تسويقية مناسبة لكل المنتجات أو الخدمات التقليدية، لذلك من الأفضل قبل ما تبدأ في التسويق عليها تتأكد إن منتجاتك أو خدماتك لها علاقة بالحياة الوظيفية وتطويرها أو عالم البيزنس والأعمال بشكل عام بحيث تعلي من فرص نجاحها.

#كابسوليرا #تسويق #لينكدإن