SWFT

فيس بوك أعلن رسمياً عن أول نظارة ذكية خاصة بيه بالتعاون مع شركة ريبان، النظارة اسمها Ray-Ban Stories.

بالنسبة لمميزات النظارة موجود فيها كاميرتين واحدة على الشمال وواحدة على اليمين بدقة 5 ميجابكسل هتقدر تصور صور أو مقاطع فيديو بحد أقصى 30 ثانية للمقطع ومشاركتهم مباشرة على فيس بوك ستوريز.

مارك زوكيربيرج قال اننا يهمنا جداً الخصوصية وقررنا نعالج المشكلة دي في النظارة الذكية الجديدة، وده عن طريق لمبة اشعارات في النظارة هتكون منورة بالأحمر أول مايتم تشغيل الكاميرات، علشان الأشخاص اللي قدامك يكونوا عارفين ان الشخص اللي لابس النظارة ده بيصور حالياً.

النظارة كمان فيها مايك وسبيكر، المايك علشان تقدر تشغل الكاميرا وتتحكم فيها بالأوامر الصوتية، والسبيكر علشان تقدر تشغل عليها أغاني براحتك.

النظارة هتكون متوفرة بـ 20 تصميم وشكل مختلف علشان تناسب كل الأزواق، والـ Cover بتاعها شغال كعلبة شحن هيشحن النظارة طول ماهي فيه.. نفس فكرة الـ Earpods كدة.

سعر النظارة 299 دولار وهتكون متاحة للشراء خلال متاجر ريبان المختلفة.

ايه رأيكوا في النظارة الجديدة، وهل متحمسين للنظارات الذكية ولا شايفينها ملهاش لزمة؟

- كلوب هاوس أعلن خلاص ان التسجيل أصبح متاح لجميع المستخدمين بدون دعاوى، وده بعد أكتر من سنة من اطلاقه رسمياً، الخطوة دي جت بعد ما الخدمة خلاص خرجت من مرحلة الـ Beta وفريق العمل أصبح قادر على استقبال جميع المستخدمين وده على لسان المؤسسين.

مؤسسين كلوب هاوس قالوا ان السبب في جعل الدمة بدعاوى فقط في البداية هي عدم قدرتهم الادارية في البداية للتحكم عدد لا محدود من المستخدمين، وده علشان يضمنوا تقديم جودة كويسة ومحتوى كويس على التطبيق.

مصدر: https://bit.ly/36TB0TY

- واتس اب بدأ يختبر ميزة جديدة احنا شايفينها مميزة جداً بصراحة، وهي حماية النسخ الاحتياطية للداتا بتاعتك او الـ Backup بباسورد.

يعني بمجرد ماتعمل باسورد للباك اب بتاعك محدش هيقدر يدخل يرفع الباك اب الا بالباسورد، بس الحاجة المميزة مش هنا..

المميز في الأمر ان حتى لو حد قدر يوصل للايميل بتاعك أو الـ Cloud Service المتخزن عليها باك اب واتس اب وقدر يحمل الباك اب علشان يشغله على واتس اب عنده، الباك اب ده مش هيشتغل نهائياً ولا الرسايل هتنزل الا بالباسورد.

الميزة دي نعتقد انها تمهيد لاطلاق التحديث المنتظر وهو امكانية فتح واتس اب على اكتر من جهاز في نفس الوقت وبدون الحاجة لوجود التليفون من الأساس، والمفترض هيتم اطلاقها آخر السنة.

مصدر: https://bit.ly/3zte2iR

- اليومين اللي فاتوا فيس بوك دخل في صدام شرس مع جو بايدن رئيس الولايات المتحدة الأمريكية، بعد تصريحات بايدن ان وسائل التواصل الاجتماعي وعلى رأسها فيس بوك بيقدموا طول الوقت معلومات مغلوطة ومضللة عن أحوال الكورونا في البلاد، وان فيس بوك دايماً بيضخم من أعداد الاصابات وبيهول من الأمر.

فيس بوك رد على بايدن في بيان رسمي بلهجة شديدة بيقوله باختصار ان بدل ماترمي اللوم على فيس بوك في نشر المعلومات الكاملة عن حالات كورونا، روح شوف اعداد الاصابات اللي عمالة تزيد يوم عن التاني.

فيس بوك قال كمان في البيان ان كان عامل رئيسي في حث الناس على أخذ اللقاح وتوعية الناس من خطر الاصابة بالفيروس والتوعية بشكل دائم بالاجراءات الاحترازية.

مصدر: https://bit.ly/2Ty6a0c

- فيس بوك أعلن عن ميزة التعبيرات الصوتية على الماسنجر أو Soundmojis زي ماسماها، اي ايموشن هتبعته من التعبيرات الصوتية هيعمل صوت معبر عنه..

فيس بوك بيقول ان يومياً بيتم ارسال 2.4 مليار رسالة فيها ايموجي على فيس بوك ماسنجر، وان التعبيرات بتقول اللي الكلام مبيقدرش يقوله..

مصدر: https://bit.ly/3BzotTN

- انستجرام أعلن عن اوبشن جديد اسمه Stories Draft، وده تقدر من خلاله تعمل Save للستوري في قسم الـ Drafts زي الاوبشن اللي موجود في بوستات فيس بوك بالظبط، تقدر تحفظ الاستوري لمدة 7 ايام في الـ Drafts وبعد كدة هتتمسح.

مصدر: https://bit.ly/3ruOf6W