Media zone

بتعرف تعمل علاقات كويس؟
ارتبط مفهوم العلاقات العامة عند كثير من الناس بأنه نوع من أنواع تنظيم الايفينتات والاحتفالات وممكن كمان يزيد عليه نوع من أنواع بناء العلاقات وبالاخص مع الميديا، فأصبح job description لأي موظف علاقات عامة بيضم الأدوار الآتية(تنظيم الإيفينات والأحداث المهمة- بناء العلاقات مع الآخرين- بناء العلاقات مع الميديا ليتم النشر مجانا- استقبال الوفود وحجز أماكن الإقامة لو في مؤسسة حكومية أو شركة ليها تعاملات خارجية)

الاقتصار على الأدوار البسيطة دي للعلاقات العامة اختزل أدوار كتير ممكن يتم القيام بيها من خلالها، وللأسف الأدوار دي إما بيتم الإغفال عنها أو بيتم تداركها بس بتكون مشتته بين الإدارات المختلفة

المهمة الرئيسية للعلاقات العامة هي إحداث الاتصال بين المؤسسة أو الشركة أو الكيان أيا كان إيه هو وجميع من يتم التعامل معهم اللي هم بيتم تسميتهم stakeholders (موردين، عملاء، منافسين، موظفين، موزعين، مجتمع الميديا....) وغيرهم مما لهم تداخل بشكل أو آخر مع الكيان او المؤسسة ودا السبب الرئيسي اللي بيخلي كل الأبحاث والمصادر العلمية اللي بتتكلم عن السوشيال ميديا او التواصل عبر الانترنت عن إنها وسيلة من وسائل العلاقات العامة وليست التسويق علشان بتكون مرتبطة أكثر بإحداث التواصل والإتصال مع الجمهور دون التركيز فقط على بيع المنتج

ولعل النقطة السابقة هي أبرز اختلاف يين العلاقات العامة والتسويق
التسويق مرتبط أكثر بأنه يملأ المساحة الفاضية في احتياجات العملاء عن طريق الاتصال ولكن العلاقات العامة أوسع من كدا شوية في مجال الاتصال بجميع الأطراف
ويمكن يتفاجئ البعض لو عرف أهم أدوار العلاقات العامة زي مثلا:
- بناء الصورة الذهنية
- بناء سمعة ثابته وقوية
- بناء هوية للكيان وتوصيلها لجميع stakeholders والمقصود هنا بالهوية مش بس اللوجو والهوية البصرية
- تدعيم جهود المبيعات وحتى تدعيم أهداف الشركة
- وأبرز دور للعلاقات العامة حاليا هو خلق third party قوي
وممكن نعرف Third party endorsement أنه عبارة عن تدعيم المنتج أو الخدمة من شخصيات عامة وممكن تتم عن طريق الميدياولكنها مش إعلان مدفوع ودا بيكون له تأثير على العملاء بصورة أكبر بكتير جدا من الإعلان، وهي نفس الفكرة القائم عليها موقع linked in
علشان كدا بيعتبر موقع linked in من أهم الوسائل في العلاقات العامة ومع طبعا الانتشار اونلاين أصبح دور العلاقات العامة أسهل في مجال third party endorsement
آخر حاجة بقى
عشان تعمل استراتيجية علاقات عامة لازم تكون بتتكون من 4 نقاط رئيسية
1- الهوية: تخطيط ووضع هوية خاصة بالكيان بتاعك
2- أصحاب المصالح stakeholders : تكون عارف بالظبط مين هم كل الناس او الكيانات المرتبطين بيك وطرق الوصول المختلفة لكل مجموعة منهم
3- الميديا: وضع خطة إزاي هتتم عملية التواصل مع الميديا سواء كانت اونلاين أو أوفلاين وأيهم أنسب للمؤسسة بتاعتك
4- إدارة الأزمة: وضع خطة لكيفية إدارة الأزمة

بعد كل الكلام اللي فات دا شايف بقى إنك بتعرف تعمل علاقات كويس ولا لأ؟

لو عاوز تقرا وتعرف أكتر أكتبلنا إيميلك أو ابعته في مسدج وهنبعتلك المصادر اللي حضرنا منها الموضوع