RI.MA Mix

ابني مبيتهدش خالص وبوظلي الشقه كلها اعمل ايه ؟
===============================

مبدئيا كل العيال عفاريت ^_^
كلهم تقريبا قبل سن 5 سنين بيتنططوا كتير ويتشقلبوا وزي تعبيرات الأمهات مبيتهدوش
ومحدش يقول على طفل عنده فرط حركة الا لما يكون الطفل معموله اختبار فرط حركه
ومش كل طفل بيتحرك كتير وبسرعه يبقا عنده فرط حركه
طب نعمل ايه ؟

شوفي يا ستي
سبحان الله ربنا خلق ابنك ده عشان في المرحله دي محتاح ميتهدش
انا مش فاهمه انتي عاوزه تهديه ليه
يا ستي سيبيه يتحرك ربنا يباركلك فيه
مشكلتنا مش في ان الطفل مبيتهدش
المشكله اننا مش عارفين نتعامل مع الحالة الحركية اللي محتاجينها الأطفال
ولما مبنعرفش نتعامل معاها بتقلب لفوضى وبهدلة في الشقه
ماهو معندوش حل غير كده

يعني مثلا انتي فكرتي في مكان للمطبخ عشان تطبخي
وفكرتي في انتريه او صالون للضيوف يقعدوا عليه لما ييجو
وفكرتي هتناموا فين
وفكرتي هتحطوا الجزم فين
وفكرتي هتعلقي الجواكت فين
وفكرتي طب اول ما ادخل من باب البيت باكون تعبانه احط ايه اقرب مكان ليا ارمي عليه كل حاجه عشان ارتاح واعلق المفتاح فين
انتي فكرتي في كل حاجه وفكرتي في الطفل نفسه
في مكان نومه
في مكان مذاكرته
لكن للأسف الأعم الأغلب من الأمهات بتفكر في كل ده وتنسى مكان لعب الطفل !!
هيلعب فين
وهيجري فين
ولما يحب مثلا يجيب قطعة فلين وينشرها بالمنشار
( تخيلي بقا كمية المرمطة اللي هيسببها الموضوع ده )
واللي هو في أمهات متخيله ان ده كده بهدله وتخريب
في حين انه مهم جدااااا لتنمية الطفل
ومفيش حاجه بيعملها الطفل اسمها تخريب
وكل لعب الطفل هادف لكن انتي اللي بتوجهي اللعب ده للطريق الصح عشان يستفيد منه اقصى استفاده
بس هو كده كده هيستفيد
ده طبعا اذا حضرتك متدخلتيش وبوظتي عليه لعبه بحجه ايه البهدله دي وايه الفوضى دي
وبالراحه عشان الجيران
وصوتك عالي وطي صوتك
ومينفعش تلعب بالشاكوش دلوقتي عشان بابا نايم
ومش وقت عجين وبهدلة هو دلوقتي
لا لا الوان ايه دلوقتي هو انا فاضيه للعك ده خليه بعدين
يابني مرمط الفل جايباهولك تنط فوقه مش تفرتكه في الأوضه
يالهوي الرمل مالي شعرك وجسمك كله يخربيت اللي اخترع اللعب بالرمل
خلاص بقا اسكت كفايه لعب
وانت دايما مصدعني كده
تعبت قلبي يابني اتهد بقا انت ايه مبتتهدش :(

ارحميه وارحمي نفسك من كل ده
لو وفرتي مساحه للطفل في البيت ركن كده او اوضه بحالها لو عندك مكان يكفي
يكون فيه اثاث بسيط وياريت منغير أثاث خالص :D
افرشي فيه سجاده بسيطه وبلاش الله يخليكي السجاده الشعر الغاليه اللي هتخليكي تعيطي لما تشوفي هيعملك فيها ايه :V
خلي اوضة لعب الطفل بسيييييييطه جدا هتبقا مريحه له وسهلة التنضيف
وسيبيه ينطلق الله يخليكي بس فهميه ان لو هنلعب ونتنطط يبقا هنا في الأوضه ولو تقدري وفريله بقا مرجيحه على زحليقه من اللي بنفعوا في البيت ( أي العاب حركية متاحه )
المساحه دي هيحس فيها بالحريه وهيخرج طاقته فيها وهيرحمك من بهدلة الشقه كلها

طيب لو مش قادره اوفر ده او بيتي صغير اعمل ايه ؟

يبقا عليكي وعلى الخروج
بس متروحيش تشتريله لبس وتقوليلي خرجته
ومتروحيش تاكليه في ماك وتقوليلي خرجته
ده مش خرووووووووووج للطفل
افتكري معايا كده :
ماما عاوزه اخرج مع صاحبتي
مانتي لسه جايه من بره يابنتي
ايوه ياماما كنت في الدرس
طيب يعني خرجتي
لا ياماما ده مش خروووووووج انا كنت في الدرس ودلوقتي عاوزه اخرج نتفسح ..
ها افتكرتي ؟
طيب متعمليش في طفلك كده بقا لأنه محتاج ده ومش عارف يعبر زي مانتي كنتي كبيره وعبرتي لمامتك
خروج الطفل يعني جري وتنطيط واستكشاف للطبيعه وحرية
ولو فقد حاجه من دول ميبقاش خروج
عندك النوادي ومراكز الشباب والحدائق العامه شوفي اقرب حاجه ليكي
واعرفي ان فترة الطفل الأقل من 5 سنين
زيارتك للمكان ده هيكون بشكل مستمر حتى لو موفراله برضه اوضة للعب
لأنه لازم يشوف الشمس والهوا والطبيعه
ويبعد عن العلب اللي عايشين فيها ومرصوصه جنب بعضها
بيوت لازقه في بعضها وفوق بعضها بتحصر عينه وتفكيره وابداعه
الطبيعه بتخليه يتأمل ويبدع
لازم يشوف افق واسع ومنطقة حره
لازم يجري وينط ويتشقلب ويقع ويتعور ويلعب في الطين والرمل ويروح البيت هدومه على سلة الغسيل وهو على الدش عشان يتنقع هو وهدومه
غيري الأماكن لو تقدري كل فتره
خليها وسط جروب اوقات
ولوحدكو اوقات
عشان الطفل يفرغ طاقته ويرجع البيت مصفر العداد
وكام يوم وهتلاقيه في طاقه اتشحنت تاني ومحتاجه تتفرغ
هوووووب قومي واخداه وخليه ينطلق بره تاني
وتقبلي حالاته بصدر رحب واعرفي انه عاوز يستكشف مش عاوز يخرب حاجه
ولا قاصد يزعلك ولا يخنقك
بس هو احتياجاته كده ومش عارف يتصرف ازي ويفرغ طاقته فين فبيعمل اي حاجه قدامه

اقولك حاجه : سيبك من كل الرغي اللي قلته فوق ده
قومي بصي لابنك كده وصغري مقاس دماغك على اد مقاس دماغه
وفكري هو محتاج يعمل ايه دلوقتي
وقومي اعملي والعبي معاه ;)



#مكعبات