Quotations

لم يضايقني ما فعلته معي
فحياتي مليئة بالخسائر والصّدمات ،
ولكن صدمتي كانت لأنني ظهرتُ لك بوجهي الأخر ،
وجهي الذي لا يعرفه إلّا أنت !!
ظهرتُ لك بضعفي وعفويتي وطفولتي التي لم أتجاوزها حتي الأن،
كنتُ صادقاً معك لأنني شعرتُ أنّك مُختلف ،

كان هناك شعور ساذج بداخلي
يقول أنّك لن تُفلت يدي أبداً .

‏”يقاس الألم بأثره لا بسببه وأتعجب كيف يجرؤ إنسان أن يقول لآخر أن الأمر لم يكن يستحق ..”

في العلاقات يا جماعة…
في حاجات صغيرة جدًا بتفرق فرق السما من الأرض.
ممكن كلمة بسيطة، أو مكالمة في وقتها، أو حتى رسالة “أنا جنبك” تهوّن على اللي قدامك آلاف الأوجاع.
لكن لما الكلمة دي تتأخر… ولما المكالمة تتأجل… وساعات تتلغي أصلًا… ساعتها كل حاجة بتفقد معناها.

الاعتذار مثلًا: لما ييجي في وقته، بيكون له قيمة، بيطفي نار ويهدي قلب ويصلّح اللي اتكسر.
لكن لو اتأخر… بيبقى زي الدوا اللي اتاخد بعد ما المرض انتشر… ملوش أي فايدة، وبدل ما يداوي، ساعات بيفكر اللي قدامك بوجعه أكتر.

والمكالمة اللي ماجتش: ساعات بتكون قاعد مستني حد يتصل عشان يطمن عليك أو يعتذر أو يقول كلمة حلوة.
الساعة تعدي… واليوم يخلص… وتكتشف إن اللي كنت فارض عليه وجودك مشغول عنك أو ببساطة مش شايف إنك أولوية.
المكالمة بعد كده ما بترجعش قيمة اللي ضاع، بالعكس بتبقى “مجاملة” أو “إسكات ضمير”.

الخطورة فين؟ إن اللي قدامك مش بيحس إن رصيده عندك بيقل واحدة واحدة.
هو شايفها عادي… تأجيل، أو انشغال، أو هانتعدي.
لكن الحقيقة؟ كل مرة بيأجّل فيها كلمة أو اهتمام… نقطة من رصيده بتتسحب.
لحد ما ييجي يوم تلاقي الكارت فاضي… الرصيد صفر… ساعتها مهما حاول يعوّضك، قلبك خلاص قفل.

العلاقات يا جماعة مش بس حب كبير ولا وعود ضخمة.
العلاقات بتعيش على التفاصيل الصغيرة: الكلمة اللي في وقتها، المكالمة اللي على قد وجعك، النظرة اللي تحسسك إنك مهم، والاعتذار اللي ما يتأخرش.

فلو بتحب حد… أو بتحافظ على علاقتك بيه… إوعى تأخر كلمة أو فعل، افتكر إن في ناس مش بتدور على الكمال، هم بس عايزين يحسوا إنهم في أولويتك مش في آخر قايمة اهتماماتك.

في الآخر: متأخر كتير في الحب… بيمسح رصيدك من غير ما تحس.
وخليك عارف… لما الرصيد يخلص، حتى أعظم كلمة ممكن تقولها مش هتدخل القلب.

في ناس كتير بتدخل حياتنا وتدي إحساس إن اللي بينهم وبيننا حب، لكن مع الوقت تكتشف إن كل اللي بيعملوه تمثيل، محتاجين حد يسندهم أو مستغلين وجودك لمصلحة معينة. تلاقيه بيبص لغيرك، أو بيعمل مقارنات، أو يدخل طرف تالت في العلاقة، وده أكبر دليل إنه مش حب أصلاً.

الحب الحقيقي عمره ما بيتقسم، وعمر اللي بيحبك بجد ما يعرف يوزع قلبه على حد تاني. ولو غلط، هتلاقيه بيجري يصلّح عشان ما يخسركش، لأنك بالنسباله مش مجرد وجود، إنت حياة كاملة.

الوهم سهل جدًا يتعرف، لأن الوهم مجرد كلام معسول وكلام ببلاش، لكن الصح بيتقاس بالمواقف والأفعال. اللي بجد بيحبك مش هيفرق معاه تبعد أو تغيب، هيخاف يخسرك ويدور عليك في كل مكان.

اعرف دايمًا مكانتك من التصرفات مش من الكلام، لأن الكلام سهل يتقال، لكن الفعل هو المقياس الحقيقي للحب.