English with Essam

{ولع الشاشة} الكلمة قد تحمل معنيان باللغة العامية المعنى الأول أن يولع الشاشة اى يشغلها والمعنى الثانى أن يشعل فيها النار ، اللغة الإنجليزية أيضا غنية بمثل هذه الكلمات والجمل التى تحمل معنيان ومنها كلمات وجمل لا تحمل المعنى عند الترجمة الحرفية .
مشكلة إن بعض الطلبة بيتعاملوا مع الإنجليزي كمعادلة رياضية (كلمة + كلمة = جملة)، وده اللي بيخلي الترجمة الحرفية تطلع جمل غير مفهومة.
​ عشان الطلبة يقتنعوا ويغيروا طريقتهم نحاول نسبتلهم عمليا أن طريقتهم غلط .
​ما تحاولش تقنعهم بالكلام ، اثبتلهم عملياً إن طريقتهم غلط وهقولك إزاى
​ اكتب جملة إنجليزية دارجة جداً، زي: "Break a leg"
​اطلب منهم يترجموها حرفياً. النتيجة هتكون جمل مضحكة وغير منطقية .
​ وهنا عزيزى معلم اللغة الإنجليزية اشرح لهم إن اللغة ليست كلمات، بل "معانٍ" واللغة الإنجليزية لا تُترجم، بل تُفهم وتُستوعب ككتلة واحدة .
​الطلبة غالباً بيحفظوا كلمات منفردة ، وده اللي بيخلي الكلمة تتبخر من ذاكرتهم بسرعة البرق .
​الصح : اختار مقطع فيديو (مشهد من فيلم أو مسلسل) بس، فيه "موقف" من الحياة .
​هنا أنا بنصحك بلاش تركز على القواعد، ركز على: "ليه الشخص قال الجملة دي في الموقف ده؟" و"إيه الشعور اللي كان عايز يوصله؟".
​قول المشهد بنفس التعبيرات (حتى لو بلكنة مش مثالية)
​بدل ما تخليهم يحفظوا قائمة كلمات خليهم يحفظوا جمل جاهزة بمعنى
​بدل ما يحفظ كلمة "Decision"، خليهم يحفظوا "Make a decision".
​فهمهم إنهم لو حفظوا الجملة كاملة ، القواعد (Grammar) بتيجي لوحدها في سياقها الطبيعي بدون ما يضطروا يفتكروا القاعدة بالتفصيل
​ قولهم بوضوح اللي بيتعلم إنجليزي عشان الامتحان هيتكلم إنجليزي بتاع امتحانات ، واللي بيتعلم إنجليزي عشان يعيش التجربة هيتكلم إنجليزي حقيقي .
​ نصيحة للمدرس : الطالب بيزهق من المدرس اللي بيحفظه لكنه بيحترم المدرس اللي بيشاركه "طريق الوصول للطلاقة وكأنك المالك الأصلي للغة .
​استخدم لغة قريبة منهم لما تشرحلهم، قلهم أنا مش عايزكم تبقوا قواميس ناطقة ، أنا عايزكم تبقوا أشخاص لغتهم شبه شخصيتهم .
​خلاصة الكلام
الطلبة هيفهموا لما يشوفوا نتيجتك أنت في طريقة شرحك أو لما تخليهم يجربوا يقلدوا مشهد ويحسوا إنهم لأول مرة بيتكلموا زي الأفلام قلل من ضغط القواعد في حصتك
​سؤال بسيط في المنهج اللي انت بتدرسه ، هل فيه أي جزء ممكن تستبدله بمشاهد فيديو قصيرة عشان تكسر جمود الطريقة التقليدية؟
وتقدم المنهج بطريقة مبتكرة وفعالة اتمنى اكون قدرت اوصل الفكرة فى تقديم المنهج بطريقة سهلة وبسيطة .
شكرا لأبنائى من الطلبة والطالبات واتمنى ان تكون كلماتى كنصيحة مقبولة لدى معلمى اللغة الإنجليزية .
🌷