Til Travel

أنتم فى البوست ده هتسمعوا شوية أسامى أماكن مش هتصدقوا أنها فى مصر
اللى بنطلبة منك أنك بعد كل كام سطر كدة غمض عنيك وتخيل نفسك فى المكان دة وبس كدة

كنت بدات من فتره اتكلم عن اماكن في مصر مش كل الناس تسمع عنها او تعرفها بالرغم من انها اماكن تفوق الخيال بدون مبالغه و تستغرب ان ازاي الاماكن ديه موجوده في مصر و محدش يسمع عنها و لا بتتراح ازاي!!.

عشان كده اي مكان هروحوا هكتب عنه و اتمني من الناس تجربه الرحلات ديه بنفسها و تشوف مدي الانبهار الي هتحس بيه اما تجربها بنفسها و خصوصا القهراويه الي دايما عايشين في تلوث و ضغط نفسي و الي فعلا اكتشفت ان سكان القاهره اكتر ناس مكتئبة نفسيا.☹️

لو اتكلمنا عن سانت كاترين هتلاقي 90٪ من اعضاء الجروب ميعرفوش غير جبل موسي الي اغلبنا طلعناه و جبل سانت كاترين الي 10٪ من الناس طلعته

منطقه سانت كاترين عباره عن مجموعه جبال مختلفه من مناظر و ارتفاعات زي مثلا الجبل الاحمر و جبل نعجه و غيرها من الجبال الي كل واحده منها ليها قصه محدش يعرفها غير بدو سينا.

-انا النهارده هتكلم عن رحله متكامله بس الرحله ديه عشان تعرف تعملها صح لازم يكون معاك دليل (مرشد بدوي) ذو خبره عارف الاماكن الي الناس تمشي فيها بدون مخاطره
خصوصا انك بتمشي 3 ليالي في صحراء و تبات في اماكن مخصصه و بتشرب من أماكن محدده و بتطلع جبال بزاويه معينه
و مينفعش في الرحله ديه تسترخص بدوي لسه مبتدئ عشان الغلطه في كاترين بزعله وحشه جدا 😐
خصوصا ان منطقه كاترين وسط الجبال مفيهاش شبكات محمول فلو ضعت و ملكش خبره حتي انك تمشي عن طريق النجوم بليل فاستحاله تطلع من كاترين ليوم القيامه😰 فخلى بالك كويس👀

الحل التاني تطلع مع جروب محترف يعرف ينظم الرحله ديه بطريقه احترافيه جدا و بيكون معاهم بدو خبره بالمكان.
-الرحله ديه مش هقول ان لازم يكون عندك لياقه بدنيه عاليه عشان تطلعها بس علي الاقل بتمشي مسافات طويله خصوصا انك هتمشي علي مدار 3 ليالي حوالي 44 كيلومتر وسط جبال و تكون في نفس الوقت مؤهل نفسيا انك تكون مغامر و تشوف حاجات كتيره و مرتفعات و تشرب من ينابيع المياه الي منتشره في الارض فمحدش يتخيل انها سهله و ان اي طفل في حضانه ممكن يطلعها بالعكس انت هتتمشي و تتسلق ارتفاع 1900 متر عن سطح الارض و هتنزلها من مكان مختلف😃

لازم و انت طالع تعمل حسابك في جزم تمشيه و تسلق عشان بنسبه كبيره لو طلعت بجزمه عاديه فهتتنحل منك في الرحله من المرتفعات و الصخور الي هتطلعها و بلاش تقلق و تشيل ازايز مياه كتيره عشان كلها هتسخن منك عشان مفيش لسه في الصحراء تلاجات و هتضطر تفضي الزجاجات عشان تخف الحمل و تبقي تملاها من الابار الي هتشفها في الطريق و برده ميكنش معاك سندوتشات عشان هتبوظ منك من الشمس بس يفضل شكولاته و كام علبه عصير مش بيبسي.

-الرحله بتبدا من كامب اسمه fox و ده مكان بتجهز نفسك و تغير هدومك و لو عايز تاخد دش عشان هتقعد 3 ايام من غير ما تستحمي😁
طبعا بيكون معاك شنطتين
واحده فيها الاكل و الشرب و التانيه فيها لبسك و الحاجات الي مش هتحتاجها😂
احنا سيبنا الشنط الي مش محتاجينها مع بدو بينقلها بالجمال لكل مكان بتخيم فيه فمفيش خوف علي حجتك انها تتسرق او تضيع.

اتحركنا اول يوم حوالي 16 كيلو متر وصلنا و دول اخدناهم في 7 ساعات تقريبا شامله الراحه 3 مرات و روحنا منطقه اسمها (وادي طلاح) و بتوصل لوادي وسط الصحراء بتلاقي الخضره و المعيز الجبليه الي بتتسلق الجبال احسن منك و هتلاقي ناس بترعي الغنم هناك و بعد كده بتتسلق مناطق صخريه
(امنه جدا) عشان توصل لمنطقه اسمها
(خرزه الشق) و ديه منطقه شبه وادي الوشواشي الي في نويبع بس بتكون المياه الي جايه من اعلي الجبال بتكون درجه حرارتها قريبه من التجمد و مش عميقه يعني توصل لركبك بس في اماكن ممكن تعدي من غير ما تنزل المياه.

-هتبدا تتحرك لمكان اسمه (الشجره) و ده اشجار وسط الجبال فيها مغامرات حلوه جداً
و بعد كده تتجه لمكان البيات الي هتلاقيه عباره عن منطقه صغيره محاطه بالسور و داخلها اشجار رمان و جوز و بير مياه تاكل و تشرب زي ما تحب.

_طول ما انت ماشي هتلاقي اشجار رمان و تين و جوز و نوع من الفاكهه اسمه زعرور شبه الرمان بس علي صغير جدا و طعمه قريب من التفاح فممكن تاكل زى ما تحب من الشجر الي هتلاقي طعم الحاجه مختلف تماما عن الي بناكلها من كتر ما هي مسكره و معسله.

-تبدا تاني يوم من الساعه 9 الصبح تتحرك
( لحجر الفرس) وسط الحبال الحمراء و توصل
( لجلت الازرق) الي عشان توصله هتحس بمغامره شيقه جداً عشان توصل لمكان تحس انك داخل غابات الأمازون و مكان تنزل فيه المياه لو عايز تبل جسمك بس درجتها حرارتها توصل لتلج بس تقدر تستحملها من حراره الشمس الي بتعدي عليها في رحلتك.

_تبدا تتحرك( لفرش الرمانه) و ده المكان الي هترتاح فيه و تخيم فيه وسط الطبيعه.
_هتاكل اكل بدوي من فراخ و رز و شوربه خضار معموله بأعشاب بتدي طعم مختلف عن الي متعودين عليه و تشرب شاي بالأعشاب.
تصحي تالت يوم تفطر علي عيش بدوي بيخبزوه قصادك و بطريقه بدائيه.

_نبدا نتحرك لمكان 8 ساعات شامله الراحه لمكان اسمه (وادي جبال)و ده هتلاقي الجبال ملونه و هتلاقي الحمير الجبليه الي عايشه لوحدها في الطبيعه و بعد كده توصل( لعين شكايه)الي طول ما انت ماشي شامم الأعشاب من الروز ماري و أعشاب الليمون
و توصل لمكان ترتاح فيه و تلاقي البدو بيعملوا العيش المدفون أو ما يسمي بعيش اللبه اللى يفضل يتاكل بالجبنه و الطماطم.

-هتبدا تتحرك لمكان التخييم و تصحي اخر يوم عشان تبدا رحله الهبوط من 1900 متر إلي المدينه و تعدي علي (ممر ابو جيفه) الي معروفه باشجار العنب و الرمان.

-تنزل المدينه عشان تلاقي باص مستنيك يرجعك الي كامب فوكس تستحمي و تغير هدومك و ترجع😍

*ملاحظات تهمك
-الرحله كلها أمان❤️
-لو اتزنقت في الحمام هتلاقي حواليك جبال كتيره بتتصرف وراها عادي جداً منك بتجرب نوع جديد من الحمامات و منها بتشبع الطبيعه منك 😂
-المياه ممكن تلاقيها فيها شوائب بس أفيد مليون مره من الي بنشربها👌🏻
-مش محتاج تغسل الحاجه الي علي الشجر عشان تكلها عشان هناك مفيش تلوث في المكان 😍
-بليل يكون معاك حاجه تقيله عشان الجو برد جداً☁️😬
-مفيش شبكات محمول و ده أجمل حاجه انك تفصل عن العالم و النت و الفيس بوك😉

-الرحله كلفتني 1450 جنيه شامل كل حاجه.
-خد باور بانك مش اقل من 15000 عشان لو بتصور كتير.
-معدل المسافات 16 كيلومتر و عدد ساعات 7 ساعات تقريبا.
أتمني الكل يجرب الرحله ديه و يحكلنا عنها😉❤️