ZeroCalorie

صباح الخير
عادي على فكرة انك ملحقتش تظبط وزنك اخر اسبوعين فى السنة اللي فاتت.
عادي برضو انك محطتش هدف واضح ليلة رأس السنة.
عادي ان امبارح "عكيت" شوية أو كتير.
عادي انك دلوقتى خلاص فطرت فطار مش ريجيمي خالص...

الواحد لما بيقرر يغير حياته بجد مش محتاج توقيت معترف بيه عالمياً. محتاج بس يكون صادق مع نفسه المرة دي. ومحتاج قبل ما يتعلم يمشي على نظام مدى الحياة، يتعلم انه لما يمشي على نظام لمدة نص يوم ويخرج عنه، ساعتها يكمل ازاي.. لانه بنكمل بعدها عادي،، مش بنبطل ونستنى ليلة رأس السنة الميلادية الجديدة نبتدي "صح" بقى!
كل سنة وانتم طيبين

أولًا: صيام الأطفال -لأول مرة- فى رمضان
إن طفلك يبتدي يصوم شهر رمضان بالكامل المفروض ده قرار مهم. طبعًا البداية بتكون على مراحل زي إنه يصوم عن الأكل بس والماء لأ، أو إنه يصوم نصف اليوم، أو حتى يوم كامل لكن مش أيام الشهر كله.
لو عدى من كل ده تمام، وأخدت القرار إنه هيصوم الشهر كامل يبقى:
1- فى الحر ده، أهم حاجة السوائل،، طول وقت الفطار تشربيه ماء، عصائر ولبن بدون سكر، وتأكليه حاجات زى الخس والخيار.
2- كدة كدة إنت طول السنة شايفه إن أكله مش كفاية،، مش هتيجي تزودى كمية أكله فى ربع عدد ساعات المتاحة للأكل. إهتمي بالأنواع مش الكميات.
3- خلى الفطار على بلح ولبن، الخشاف مالوش لزمة. وأكيد متسيبيش له إزازة الماء الساقع.
4- إعملى دائمًا شوربة خفيفة زي لسان عصفور أو شوربة خضروات علشان لوغلبتي يبقى تحطيله فيها قطع صغيرة من البروتين وخلاص.
5- متستسهليش المعجنات لإنك غالبًا مش هتعرفي تدي معاها الكفاية من البروتين والخضروات.
6- حاولى إنه ياخد من السلطة بس لو معرفتيش على الفطار يبقى مينفعش تشيليها من السحور خالص.
7- الحلى فاكهة مش حلويات. زي ماهو مهم أنه يغطى إحتياجاته من السعرات، مينفعش تسيبيه يغطيها من الحلويات الشرقية والسكريات الفارغة.
8- حاولى تعملى إنت حاجات زى أرز بالبن، كريم كراميل ومهلبية،، إعمليهم بسكر خفيف جدًا،، وخليهم دول بعد التراويح مثلًا. هيساعدوك فى إنك تديله كفايته من الألبان.
9- طبعًا السحور مهم، بس ميبقاش خناقة وطفلك غلبه النوم، وتصحيه بالخناق ويقعد متنح على السفرة وإنت تحاولى تحشري أي حاجة قبل الفجر،، هيكره الصيام وهيكره نفسه وهيكرهكم كلكم. خليه يتعشى قبل ما ينام وخلاص،، كدة كدة هيجوع.. كدة كدة هيعطش وزي ماتقولى كدة ده من أساسيات الصيام.
10- خلى القاعدة الأساسية إنك تسيبي طفلك يقرر هو قادر يكمل ولا لأ،، متخليهوش يكابر، متعمليهاش مسابقة، ماتقارنيش حتى ولوبينه وبين إخواته، بس متسيبيهوش يستهبل بردو وتطلعي إنت اللى قلبك خفيف!

رمضان بكرة وكل سنة وإنتم طيبين وكدة!
موسم كل اللى عايز أي resolutions من أي نوع،، وأكيد طبعًا فى الأكل: فبغض النظر عن أهدافك العظيمة، دول 10 حاجات هتبقى بتهزر لو عملتها فى رمضان:
1- تفطر على لتر ماء
2- تفطر على لتر خشاف
3- تفطر على نص صينية المكرونة
4- تقوم من الفطار ده على صينية الكنافة
5- ترجع من الصلاة على باقى صينية الكنافة
6- أو ترجع من الصلاة على باقى صينية المكرونة
7- تقضيها طول اليوم قطايف طيب
8- متتسحرش
9- تتسحر بطيخ
10- تتسحر مكرونة بالكنافة بالقطايف بالبطيخ.

المكسرات دي حقيقي ثروة،، بس هتحتاج منك حاجتين:
1- ثروة بردو.
2- قدرة رهيبة على ضبط النفس.
لو متوفرين عندك، يبقى تمام،، نختار بقى هتجيب إيه وليه..

مميزات المكسرات عامة: مصادر كويسة للبروتين النباتي، الدهون الصحية، الكالسيوم (خاصة اللوز)، فيتامين ﻫ المضاد الأساسي للأكسدة، مضادات الإتهابات، الألياف وكذلك مواد أخرى مفيدة جداُ لصحة القلب والمخ ومنع الأثار الجانبية للتقدم فى العمر. المكسرات غنية بالحديد والزنك والمغنيسيوم فبالتالى مفيدة جدا للذاكرة. السودانى والبندق: فيهم نسبة كبيرة من حمض الفوليك، المهم جداً خاصة فى بداية الحمل وكذلك الحماية من أمراض كتير ومنها الأنيميا. حاجة زي البيكان مثلا فيها عنصر السيلينيوم اللى مقترح حالياً كمضاد لأمراض مثل السرطان، الألزهايمر، ومرض السكر.

حاجة مهمة: المكسرات بتحتوي على الدهون الغير مشبعة.. المشكلة إن النوع ده بيتأثر بالتصنيع ويتحول لأشكال مضرة... طيب الحل المثالى،، خد المكسرات النية.. بس مهم جداُ جداُ تكون محفوظه صح ومش معرضه لأي كائنات معدية زى الفطريات أو البكتريا المعدية علشان ساعتها بتبقى مشكلة كبيرة جداً.. البديل لو مش نية: محمصه بدون إضافة دهون.

يعني لو عايز وجبة بينية سريعة وتكون بديل سهل وفى نفس الوقت مفيد عن أى أكل الجاهز بتشتريه، أو بتحاول تقلل وزنك وعايز حاجة مفيدة وطعمها حلو، وبتشبع شوية، وتصبرك على الريجيم ككل،، يبقى كل يوم ممكن تاخد "حفنة" مكسرات وتاكلهم واحدة واحدة بس لحد ما تخلص فنجان القهوة وتبقى كدة تمام.