Flash with Carol Omar

في اخر ايام 2021 يجي فيلم Don’t Look Up يلخص حال الكوكب كله في اقل من ساعتين بمنتهي البساطه و السخريه و الواقعيه الصادمة 👻
و علّي فكره هي واقعيه صادمه حتي للناس اللي عارفين هذا الواقع برده لان مهما بتكون عارف و فاهم فالموضوع بالوضوح ده لما بيتمثل بالحلاوه دي بيكون صادم 👻👻
الفيلم بيورينا ان :
- الكوكب كله بتحركه المصالح سياسه و اعلام و علم و اقتصاد و اعمال و المصالح دائما بتتصالح بصرف النظر عن الضحايا و كله يهون في سبيل الفلوس و السلطه ايا كان مجالها .
- الاعلام بكل انواعه فضائيات و سوشيال ميديا بيجروا وراء التفاهه مهما كانت و اينما كانت اهم حاجه عدد المشاهدات و الاعلانات اهم حاجه الفلوس حتي و لو علّي حساب انكار الموت نفسه و طبعا تبقي المصالح في الخلفيه
- الناس مُتلقين بس و بشكل صارخ و ما عندهمش اي استعداد للتفكير و مستسهلين الاعتمادية علّي غيرهم في كل حاجه و اسهل حاجه بالنسبه لهم هو الانكار او التجاهل او الاعتقاد ان اكيد فيه حد هيحل المشكله فسيبك ياعم خلينا في اللي احنا فيه خلينا في التفاهه و الهلس و اهو نتسلي.
ده غير ان الناس بتهاجم اي حاجه لمجرد ان اي حد بيخبط علّي الباب اللي بيشغل دماغهم او بيخالف افكارهم او الناس اللي بيحبوها او لمجرد الهجوم و خلاص ، من غير ما يقفوا لحظه يفكروا او حتي يسألوا نفسهم هل الكلام ده ممكن يكون صحيح و لا لا .. من الاخر هما علّي fight mood احتياطي لان دماغهم مقفوله .
- و زي ما معروف فالناس اللي عكت الدنيا علشان مصالحها هما بس اللي بيكون عندهم Exit plan و بيسيبوا المصيبه تقع علّي الكل عادي .
- اخر جزء في الفيلم وضح ان الانسان لما بيفوق بيرجع للفطرة اللي اتخلق عليها و هي ضرورة العلاقات الانسانيه و احساس الدفا و الود و الرحمه اللي بيكونوا فيها
لما الناس اتأكدوا انهم هيموتوا الفكره اللي سيطرت عليهم هي ازاي يلحقوا يشوفوا و يقعدوا مع الناس اللي بيحبوهم و لحد اخر لحظة في حياتهم .

و بمناسبة العلاقات الانسانيه فجدير بالذكر ان دراسه عملتها جامعه هارفارد - و هي اطول دراسه تمت في تاريخ البحث العلمي لانها استمرت لمدة 80 سنه عن اسباب السعاده - كانت نتيجه الدراسات ان العلاقات الانسانيه الحلوه اللي فيها ود و حب سواء مع اهل او اصدقاء او زملاء عمل هي سبب السعاده الحقيقي مش الفلوس ولا النجاح .. و ان وجود النوع ده من العلاقات في حياه اي انسان بيمنع تدهور حالتة الصحيه و العقليه و الجسديه و بيساعده علّي تخطي مشاكله.

و بما ان العلاقات الانسانيه هي سبب السعاده
و بما اننا رايحيين لسنه جديده فبتمنالكم سنة جديده كلها علاقات انسانيه مليانه حب و ود و صفا و دفا و سعاده 💖💖
و كل سنه و احنا كلنا طيبين و بخير و صحة دائما 🙏🏻💖سنه جديده سعيده يا رب 2022 🥳🥳🥳🥳🥳🥳

#فلاش📸💫
#الاعلام #فيلم #واقع #انتاج #انسانية #كارثة
📸💫