Africanoo

عمرك فكرت اشمعنى الفقمة او كلب البحر او فرس النهر او طيور النورس او السلعوة بيطلعوا دخان من بؤها في الشتاء؟
سؤال غريب اوي ما أكيد مفكرتش يعني :D بس الأكيد انك فكرت في نفسك فكرت في الإنسان :D و مش بس فكرت انت مش بعيد و انت صغير تكون قطعت ورقة من الكراسة و لفيتها وحطيتها في بؤك و فضلك تنفخ في بخار احزانك قال يعني انت مُدخن قديم :D

ليه الإنسان و أخوه الإنسان بيطلعوا دخان من بؤهم في الشتا؟
مبدئياً يا إنسان دا مش دخان .. دا بخار مياه و زي ما انت عارف من أولى إبتدائي إن عملية التنفس بتتكون من مرحلتين .. الشهيق و الزفير ..

الشهيق بتدخل لجسمك فيها حاجات هو عايزها من الهواء زي الأكسجين ..

و في الزفير بتخرج حاجات جسمك مش عايزها زي ثاني أكسيد الكربون و بخار المياه . امسكلي بقى في بخار المياه و حطلي تحتها 100 خط :/

قالك بقى إن بخار المياه دا في أغلب حالاته غير مرئي (هو عبارة عن مياه في حالتها الغازية) اومال ليه في الشتاء بيطلع من الفم على هيئة لون أبيض؟

بص يا سيدي .. في عملية كدا اسمها التكثيف و هي تحويل المادة من حالتها الغازية لحالتها السائلة بتحصل لما المادة تتعرض من درجة حرارة معينة لدرجة حرارة أقل فجزيئاتها تقرب من بعض اكتر بدل ما هي كانت طايرة في الهواء كدا و تلزق في بعض و تبقى سائل و هو دا بالظبط اللي بيحصل

انت بتبقى قاعد في أمان الله فجأة الهواء يلاقيك شفطته من بؤك او مناخيرك و هو قاعد في أمان الله برده و دخلته للرئة بتاعتك .. درجة الحرارة جوا الجسم حوالي 37 يعني انت تاخد هواء ساقع من برا تدخله جوا جسمك يتسخن و بعد كدا تطلعه في الزفير و هو سخن حلو كدا؟
الهواء السخن اللي شايل "بخار" يقابل الهواء الساقع اللي في الجو فيكثف البخار الموجود في الهواء اللي طالع من جسمك ..

طبعاً انت مش في بالك في اللحظة دي غير انك تفضل تلعب بالبخار و تجرب تطلعه مرا براحة و مرة بسرعة و مرة و انت ضامم شفايفك و كدا صح؟ :D

إن عالم الحيوان ملئ بالأسرار والكثير من الحكايات، وسوف نقوم في"Africanoo" بسرد وتبسيط هذا العالم من منظور الطب البيطري ولكن بنظره خاصة التي تجعل كل شخص شغوف بعالمنا.