Clear Accounting System

مقتطفات من كتاب " أنا المدير - هنحط السيخ المحمي في صرصور قلبه "

التلكيك على كل حاجة تافهة:

من نماذج الإدارة الناجحة إنك تبقى عينيك دايما مفتحة وحواسك كلها منتبهة طوال الوقت علشان تلاحظ كل الأخطاء اللي بيعملها الموظفين اللي تحت إدارتك أو اللي بيشتعلوا عندك، ولازم دايما تعمل عليها فيلم هندي مبالغ فيه فبتبقى بتركز على الحاجات دي وبتكبرها وبتشتكي منها دايما وتتكلم دايما عن أثرها السلبي على الشغل.
ونوصل للسؤال المهم اللي هو ليه هنعمل كده؟ والإجابة فيها شفاء لكل نفس مضطربة. علشان لما تعمل كده دايما الموظف هيحس إنه مقصر ومش هيحس بقيمة الحاجات الكويسة اللي بيعملها، وده علشان انت دايما بتبين له الصورة الوحشة بتاعته وبس. الفايدة من الموضوع ده كبيرة جدا لإن الموظف مش هيتجرأ ويطلب مثلا زيادة في الراتب، ترقية، سفر، مكافأة على حاجة كويسة عملها، أو أي حاجة لإنك دمرته نفسيا وهو على طول شايف نفسه وِحش. والسؤال التاني هل الأسلوب ده هيعالج نفسك المضطربة كمدير. الإجابة هي طبعا لأ، ده بيزود الطاقة السلبية اللي بتملى قلبك وبتدمر نفسيتك أكتر وأكتر، فتفتري على خلق الله أكتر وأكتر وتبقى مدير ناجح.

طبعا لو سمعتم كلام كتاكيتو بُني بتوع الإدارة الحديثة هتلاقيهم بيقولوا إن المدير الناجح هو اللي يشوف نقاط القوة عند الموظف ويقويها ويظهرها، وكمان يتجاوز عن الأخطاء غير المؤثرة. ولو الموظف عنده أخطاء كبيرة فلازم يرشحه للتدريب اللي يخليه أحسن وأحسن في شغله وفي حياته كمان. (طبعا دي ناس مش فاهمة إن المدير الناجح هو اللي بيدمر الموظف باستخدام طرق متعددة علشان يلغب بيه زي ما هو عايز، مش يدربه ويحسن حياته. عِشنا وشٌفنا)