Esraa Ragaie

في بيوت كتير الحب فيها مش بيتقال، المدح قليل لكن اللوم كتير. فبتكبر وانت حاسس إنك لازم تبقى أحسن واحد، وأحسن ابن، وأحسن نسخة من نفسك… مش عشانك، عشان تحس إنك مقبول. بس الحقيقة اللي لازم تعرفها بدري إن حبك وقيمتك مش امتحان لازم تنجح فيه. ولو ما سمعتش جملة "أنا فخور بيك" وإنت صغير… ده مؤلم، آه. لكن ده مش معناه إنك فعلًا مش كفاية.
المشكلة إن اللي حواليك ما عرفوش يشوفوا قيمتك.

الناس مش فاضية تركز فيك قد ما انت متخيل، النضج مش إن الكل يحبك، النضج إنك تبقى مستعد تتقبل إن مش شرط الكل هيحبك..
ساعتها هتلاقي نفسك و توصل للسلام الداخلي...
لأن ناس كتير مرهقة مش بسبب حياتهم…
لكن بسبب محاولتهم المستمرة يرضوا اللي حواليهم
ايوه الرغبة في القبول شيء إنساني طبيعي.
لكن المشكلة تبدأ لما تقديرك لنفسك يبقى معتمد بالكامل
على تصفيق الناس… أو نقدهم.....
النضج إنك تفرق بين:
رأي يساعدك تطور، ورأي نابع من إسقاطات الآخرين عليك.
مش كل تعليق محتاج رد.
ومش كل نقد معناه إن فيك عيب.
أحيانا الناس بتحكم عليك
من خلال مخاوفهم هم… مش حقيقتك أنت.
متربطش قيمتك برأي الناس !!

الأذى النفسي ممكن يكون مش بيكسر العضم بس
بيكسر الثقة
بيخليك تشك في نفسك
في إحساسك
في قيمتك
أسوأ حاجة إن اللي قدامك يقولك
إنت حساس بزيادة، إنت مكبر الموضوع، فين الاذي و الاهانه ده هزار ! الأذى
مش لازم نستحمله و نسميه طبيعي.
Stop Normalizing Emotional Abuse