SCOOBY-DoO

-الحقيني يادكتورة وانا بلعب مع لولي لاقيتها بتهرش جامد في ودنها وبتهز راسها اوي ولما بصيت علي ودنها لاقيت حاجات سودا كده ايه ديه ؟😰
📌سؤال بيتكرر كتير جدا ومن اكتر المشاكل اللي بتواجه القطط

وهو جرب الاذن للقطط او ال ear mites 👂🏼🐈

وده بيشكل خطورة علي القطط لو متعالجتش بشكل صحيح 🥲
📍وهي عبارة عن حشرة صغيرة جدا مش بنشوفها بعنينا لا تري الا بالميكروسكوب. وبتعيش جوة في قناة الاذن وبتتغذي علي شمع الاذن والإفرازات التي تفرزها آذان القطط
وعشان كده مش بنكتشف جرب الاذن عند القطط إلا في مرحلة متأخرة , لما نشوف اللون الاسود او البني الداكن داخل الاذن وهو ده اللي المُربي بيشوفه وبيتخض منه لو مكنش عارف ده ايه أو لو اول مرة يربي قط يعني
🐾طب ايه الحاجات اللي لونها اسود ديه ؟!🤔
- ديه المواد الدفاعية اللي بتبدأ الاذن تفرزها عند تقدم الإصابة عشان تقاوم بيها الحشرة اللي بتسبب جرب الاذن

📌من اهم اعراض الإصابة بالجرب في اذن القطط:🫣
1-احمرار حول الاذن والحكة الشديدة للاذن هتلاقيه دايما بيهرش في ودنه وكثرة هز القطة لرأسها
2-وجود لون بني داكن او اسود داخل اذن قطك او قطتك
3-زيادة شمع الاذن ذو اللون البني عن الطبيعي
4-التهابات شديدة في الاذن
5-ميل رأس القطة ناحية الاذن المصابة وتكثر من النوم علي جانب رأسها ناحية هذه الاذن
📌 وافتكر دايما ان المرض ده من الامراض شديدة العدوي بين القطط عشان كده لو ظهرت الاعراض ديه علي أليفك لازم تبدأ بالعلاج في اسرع وقت

طب اصلا ايه اللي يخلي اليفك يتصاب؟ اسباب جرب الاذن للقطط🥲
بتكون بسبب اتصال اليفك بحيوانات أخري مصابة
ولو مناعته ضعيفة هيبقي سهل انه يتصاب😥

📌طبعا زي ما احنا عارفين ان الوقاية خيرٌ من العلاج
فاا ايه طرق الوقاية اللي استخدمها عشان اتجنب حدوث المشكلة دي:👀👆🏻
-مهم جدا تطعيم القطط ضد الحشرات يساعد بشكل كبير في وقاية القطط من الحشرات المختلفة وخاصة المسببة لجرب الاذن وطبعا احنا في الصفحة هنا اتكلمنا في بوست كامل عن التطعيمات بالتفصيل
-انك تكون حريص علي تنظيف اذن صديقك الاليف مرة أسبوعيا بقطرة مطهرة
تحط نقطة او نقطتين من القطرة اللي حددهالك الدكتور وتسيب الدوا خمس دقايق وبعد كده تنضف الاذن برفق ولطف حتي لا تخدش طبلة الاذن
-منع اختلاط اليفك بحيوانات اخري مصابة
-الحفاظ على صحة حيوانك الأليف لتجنب تقليل المناعة
وتنظيف مكان نوم أليفك وادواته باستمرار جيدا
ومتابعة تطعيمات الحشرات في وقتها

📌طب انا عرفت ان القطة بتاعتي عندها جرب الاذن اعالجها ازاي يادكتورة؟!🥺
اول حاجة ننضف الاذن كويس جدا بمادة مطهرة 🧻🧴
عشان نتخلص من اكبر عدد ممكن من الحشرات ونشيل الحاجات السودا اللي اتكلمنا عنها فوق
وبعد كده نستخدم النقط من القطرة اللي بيحددها الدكتور بتكون مخصصة لتهدئة الحكة ومضادة للحشرة للقضاء علي المرض زي(Omni guard و Bars)وبعدها ندلك الاذن علي خفيف ونسيب الدوا في اذن القطة مش بنشيله بعد التدليك
ونكرر ده كل يوم لمدة اسبوع او اسبوعين علي حسب الحالة او لحد ما تختفي الأعراض ويصبح اليفك بخير😍❤️

🐾الكلام ده ينطبق علي صديقك الأليف اذا كان قط🐈 او كلب🐕