FadyStips

شهادة الـ25%
استنيت لحد ما اليوم يخلص عشان أعرف أدي معلومة مفيدة

أشتري شهادة الـ25%؟
شهادة الـ25% عليها ضرائب ولو هتآخد الفائدة شهريًا، الفائدة هتكون 22.5% ومتقدرش تقولهم معلش أنا حصل لي ظرف ومحتاج أرجع الفوائد وآخد الشهادة، إلا بعد مرور 6 شهور.

أيوة يعني أشتري ولا لأ؟
لو معاك 100 ألف جنيه مش محتاجهم لمدة سنة، وخايف من إن الفلوس قيمتها بتقل، لازم تعمل حاجة اسمها "تنويع المحفظة الاستثمارية"
يعني مثلًا
تشتري شهادة بقيمة 20 ألف
وتشتري دهب ب40 ألف
وتشتري أسهم الشركات الحكومية وشركات الجيش اللي هتُطرح في البورصة قريب ب30 ألف
و10 آلاف جنيه تشتري بيهم أي حاجة سعرها عالي ويهبط جامد مرة واحدة.

طب لو عندي شهادة بالفعل وعاوز أكسرها عشان أشتري الشهادة الجديدة؟
أحسب الخسائر اللي هتتطبق عليك لو كسرت الشهادة القديمة والمكاسب اللي هتجيلك من الشهادة الجديدة، وإطرح المكاسب من الخساير، لو طلع الرقم بالموجب، إعمل كدا.

إمتى الدولار هيتوقف عن الصعود؟
الإجابة المختصرة: الدولار هيستقر عند 28 - 30 جنيه بنهاية 2023.
لكن لحد ما هيوصل لسعر الاستقرار ده ممكن ينزل عن السعر الحالي وممكن يطلع عن سعر الاستقرار.

إيه الحاجات اللي لو حصلت، الدولار هيهدى علينا شوية؟
1. نجاح الحكومة في السيطرة على السوق السوداء
2. شراء الشهادة الجديدة بكميات ضخمة من الأموال من قِبل الجمهور.
3. حل أزمة احتياطي النقد الأجنبي عن طريق القرض
4. عائدات السياحة ترتفع بشكل كويس
5. المستثمرين الأجانب يرجعوا يستثمروا في أدوات الدين
6. زيادة استثمارات الخليج في مصر

ملحوظة مهمة: المكتوب في البوست مش نصيحة مالية ولا مشورة شخصية، إنما مجرد قراءة ونصائح عامة، تتوافق مع البعض، وممكن تتسبب في خسارة البعض الآخر، على حسب العديد من العوامل اللي بتختلف من شخص للتاني، للحصول على مشورة مالية شخصية تقدر تحجز جلسة معايا بشكل شخصي.

9 طرق تحمي بيهم نفسك من قيمة الفلوس بتقل

1. فك الكيس: ركنة الفلوس ملهاش لزمة حاليًا، لازم تستثمر بالفلوس دي.
2. نوّع استثماراتك: حط شوية فلوس في العقارات، واشتري بشوية أسهم في البورصة، ولو قدرت حاول تشتري أسهم أو أي أصول استثمارية خارج بلدك.
3. اشتري عملة صعبة مستقرة: حاول تشتري -بطريقة قانونية- أي عملة أجنبية سعرها مستقر، مش شرط الدولار واليورو، ممكن: دينار كويتي، جنيه استريليني، روبية هندي، دينار بحريني، دولار كندي، فرانك سويسري، دي كلها عملات مستقرة.
4. استراتيجية التحوّط: الاستثمار في الأدوات المالية زي العقود الآجلة، أو الخيارات.
5. الدهب: اشتري دهب لو مش عارف حوارات البورصة، أينعم مش صح تشتري حاجة سعرها طلع، بس أفضل من ركنة الفلوس.
6. شيل شوية على جنب: خلي شوية فلوس كاش معاك للطوارئ، الفترات دي بيكون فيها عدم يقين اقتصادي.
7. قلل النفقات المستوردة: حاول تشوف الحاجات اللي بتستنزف فلوسك، خاصة المستوردة، ورشد فيها أو بدلها بالمحلي.
8. شغل إضافي: لو الوضع صعب معاك، لازم تدوّر على عمل إضافي أو شغل ع النت.
9. استشير: دور على حد متخصص يقدم لك خطة تقلل بيها من أثر انخفاض قيمة العملة، كمان هيعرفك إزاي البورصة ممكن تكون وسيلة للربح حتى في الظروف دي، أينعم هيآخد منك أجر على ده، بس ده هيكون أفضل بكتير من إن فلوسك اللي كانت في مارس اللي فات قيمتها 100 ألف، إنهارده قيمتها بقت 30 ألف.

10 أهداف مهنية ممكن تحطها للسنة الجديدة

1. خد كورس تقيل على كورسيرا
2. إتعلّم برنامج أحدث وأقوى من اللي بتستخدمه حاليًا في شغلك
3. زود مهاراتك في تقديم البريزنتيشن
4. حاول تخش قسم تاني أعلى في شركتك
5. حسّن قدرتك على إن اللي حوليك يشوفوا شغلك ويعرفوا إنت مين
6. كوّن شبكة علاقات مهنية (إيفنتات - مؤتمرات - مكالمات)
7. إعمل بحث عن زمايلك اللي وصلوا ومنافسيك
8. إعرف إزاي تدير وقتك صح
9. قدّم مقترح متخطط عملي كامل جاهز لمديرك يزوّد أرباح شركته
10. إبدأ شغل على الإنترنت، ولو شغال بالفعل، إعمل بيزنس