BanArki

شطب بنفسك

(٥) تعديلات معمارية ٢

بعد ما خلصنا بند التكسير هانبدأ بند المباني

ثانيًا: بند المباني:

- حسب الرسومات اللي في إيدنا هانجيب بنَّا وهانديله الشغل طريحة وبلاش يومية عشان الدنيا هاتفتح معاك لو بنا ماعندوش ضمير

- هاتجيبه يوم يشوف الشغل ويكتب طلباته (طوب - اسمنت - رمل) وتحسبها تاني وراه وتجيب بزيادة عن حساباتك ١٠٪؜

- هاتجيب المون قبل الشغل بيوم من أقرب موان لك هايبقى أرخص في النقل وهايسد معاك في أي وقت بعد كدا … وهاتخلي الحارس يشونهم فوق لو رفض تخلي الموان يبعت عمال يطلعوهم

- تشوين المون يكون بعيد عن مكان الشغل … والرمل يتشون في مكان واسع يسمح بهز الرملة وعمل المونة

- احضر مع البنا بداية الشغل واستلم منه قد الشغل بالمقاسات حسب الرسومات

- لابد من عمل طرف رباط في أي شغل مباني مرتبط بمباني سابقة

- وزن الشغل أفقي ورأسي مهم نسبيًا … كدا كدا الشغل في التعديلات محكوم

- أي مون باقية احتفظ بها … وانقل أي مخلفات عالكومة اللي تحت

- هاتسيب الشغل ٤٨ ساعة يعضم

ثالثًا: بند البياض (المحارة):

- هانجيب المبيض يبص عالشغل ويشوف المون الباقية (لو فيه مون باقية) ويطلب مونته ونتفق معاه بالطريحة ونجيب له المونة قبل الشغل بيوم

- الشغل المحكوم مش هايحتاج بؤج وأوتار لكن لو عندنا جدار مساحته كبيرة نلزم المبيض ببؤج وأوتار وباقي الشغل المحكوم نستلمه على القديم بقدة ألومنيوم سليمة

- احتفظ بأي مون باقية هانحتاجها وشونها بعيد عن أي مصدر مية وانقل أي مخلفات على الكومة اللي تحت

- هات عربية تنقل المخلفات بالنقلة وأكد على رفع المخلفات عالعربية بمعرفتهم في الاتفاق

وبكدا نكون جاهزين عالتأسيي

ندعو الله أن يعلمنا ما ينفعنا وينفعنا بما علمنا

شطب بنفسك

(٣) بدء الأعمال

والمرحلة دي هانقسمها لقسمين مهمين

أولًا: هانجهز المكان لبدأ الأعمال

- هاناخد معانا كهربائي وسباك (هاتحاسبهم على يومية واسأل على اليوميات برا واسأل كل واحد على يوميته قبل ما تتحركوا)

- هاتفرجهم الشغل وتشتري لهم الخامات وتستلمها منهم راكبة بالعدد

- الكهربائي هاينور كل فراغ في الشقة بلمبة بدواية (دواية جودتها عالية ولمبات كبيرة لرؤية أوضح) …

- والسباك هايركب حنفية على دخلة المية بس يخليها عالية أعلى من ارتفاع برميل بـ ٢٠ سم (واختار نوع جيد عشان تستحمل لحد ما نخلص تشطيب)

- خلي بالك دايمًا من سلوك العمال والصنايعية مع الحنفية عشان غالبًا هايغرقوا الأرضية الخرسانة (اللي هي سقف جارك) وهايتشبع مية وهايبقى عندك مشكلة رطوبة في الجزء دا هاتستمر فترة لحين جفاف السقف تمامًا

- ممكن تشتري برميل وتكنة (نص برميل) وبخرطوم يتثبت كويس في الحنفية بكوليه … ويتملي البرميل دايمًا ويستخدموا ميته في الشغل … والعمال تتشطف في التكنة

- لو فيه أي مخلفات في الشقة هاتتخلص منها (هات عمال واتفق معاهم على طريحة (بالمقطوعية يعني بلغة المقايسات) … ولو الكمية صغيرة ماتجيبش عربية لنقلهم للمقالب وخلي الحارس اللي سقيته شاي يتخلص منهم
مقابل اكرامية

- لو فيه رمل صالح للاستخدام أو أي خامات تنفعنا سيبها ماتتخلصش منها (وعرف العمال واقف معاهم لإنهم غالبًا هاينزلوها عشان يبيعوها)

ثانيًا: هانجهز الرسومات اللي هانشتغل منها

- هاتقعد سعادتك مع كل مستخدم للفراغ قدام الرسومات وتفكروا في افضل حل لأقصى استخدام جميل للفراغات

- اتجاه الشمال وانت شغال عالورق عامل مهم جدًا لإنه بيحدد اتجاه الهوا واتجاه الشمس ودور دا في اختيار النشاط في كل فراغ وفرشه … وكمان له دور في مكان الفتحات وأبعادها (لو متاح تعديلهم) … كمان له دور في مكان الحمامات واتجاه أبوابها وشبابيكها (لو متاح تعديلهم)

- هاترسم تصورك في تلات نسخ على الأقل:

١- نسخة معماري: هاتحدد فيها كل التفصيلات بالأبعاد وتحدد كل التعديلات المطلوبة بأبعادها وتفاصيلها (تعديل في حيطة باب شباك بالإضافة والحذف … إلخ)

٢- نسخة كهربا: هاتحط فيها تصورك عن الكهربا بكل الأبعاد والتفصيلات

٣- نسخة صحي: هاتحدد فيها فرش الحمامات والمطبخ ومكان الغسالات لو خارج المطبخ والحمامات (بالأبعاد والتفصيلات)

- لو مش هاتعرف تعمل التصور اللي عالورق استعين بمهندس صديق … لكن لا أنصح بالبدء والتصور في عقلك بس (هاتتعطل وهاتغلط كتير)

كدا احنا جاهزين نبدأ بنود التأسيس إن شاء الله

ندعو الله أن يعلمنا ما ينفعنا وينفعنا بما علمنا