Hend Aly

هتتغير كتير لما تعرف إن المكان اللي بتضحك فيه من قلبك هو اكتر مكان هيشوفك و انت بتعيط، و إن الشخص اللي ملا عليك ايامك و زعلك هو هو هيكون نفس الشخص اللي يسبب ليك أكبر ضيق، لما تعرف إن الشغل اللي رفعك السما و كان سبب نجاح ليك سهل جدا يكون هو سبب فشلك الأول، لما تشوف صحابك و الناس اللي بتتبسط معاها هي نفس الناس اللي بتشدك لمكان مش حابب تكون فيه.

بشكل عام، حياتك هتتغير كتير لما تتقبل إن الحاجة و عكسها موجودة في نفس المكان و نفس الشعور، هتشوف دا بعينك كل مرة و كل مرة هتستغرب ازاي حصل و الأغرب ازاي بسهولة كدا.

عزيزي المستمع نسيت اقولك إن الحياة مش هتتغير للأحسن لما تتقبل دا، بس هتتغير للأريح، و الانسان محتاج راحة والله، عشان الانسان تعبان يا كابتن😂🙅‍♀️

لو في حد شاف أحسن وأصدق نسخة منك واوريدي دا مكنش كفاية بالنسباله، ف مفيش أي حاجة تانية هتعملها هتبقى مفيدة. ولا انتقام ولا غيظ ولا عتاب ولا حتى تتعمد تتجاهله عشان يعرف قيمتك. لو حد الحلو بتاعك أصلًا معجبوش، أكيد الوحش مش هو الحل. ولو الوحش كان حل ف تأكد إن لو شخص هتكسبه عشان تقلت عليه/حسسته بالإهمال ف رجعلك، فالأكيد إنه شخصية ملهاش أصول ولا تستحق.

دايمًا الحل إنك تبعد بطريقة محترمة وهادية، بدون ما تضايق حد أو تبوظ حاجة جميلة عندك عشان تعلم أي حد أي حاجة. بس حافظ على نفسك لنفسك ولناس تعرف تفهم طبيعتك وتحبها من بدري، بدون ما تحس إنك مضطر تغير الحاجات الحلوة اللي بتعملها لإنها مش متقدرة. دايمًا غيّر الناس.

أنا بقع في حب الصور دي فورًا، مش عشان الفكرة الرومانسية الساذجة اللي بتقول بص الفقرا مبسوطين وراضيين إزاي، لأن الفقر قاسي، وإحنا اللي بنحاول نقنع نفسنا أنهم مبسوطين كده عشان أي فكرة تانية هاتكون مزعجة، زي مثلاً أنا ليه وضعي أحسن منهم؟ هل هاقدر أستحمل أعيش زيهم؟ هل أقدر أعمل حاجة ومابعملهاش؟ لغوش لغوش كله تمام.
أنا بحب الصور دي لأني مُغرَمة بأي حد قادر على الانبساط بالمعطيات اللي معاه مهما ضاقت بيه الدنيا.. شاشة وكاوتش وسجادة وبقينا حاسين أننا عيال بتشجع في الاستاد..