Zack Pharma

ليه الجريب فروت خطر مع بعض الأدوية؟

الجريب فروت فيه مواد كيميائية (furanocoumarins) بتثبط إنزيم CYP3A4 في الأمعاء الدقيقة وده الإنزيم المسؤول عن تكسير كتير من الأدوية قبل ما تدخل الدم.
لما الإنزيم ده يتعطل، الدواء بيتمتص بتركيز أعلى بكتير من المفروض، وكأنك خدت جرعة مضاعفة من غير قصد.

أمثلة: بعض أدوية الكوليسترول (Simvastatin)، بعض أدوية الضغط (Calcium channel blockers)، وبعض المهدئات التفاعل ممكن يوصل لسمّية عضلية أو هبوط ضغط حاد.

والغريب أن التأثير ده ممكن يستمر لحد 72 ساعة بعد أكل الجريب فروت، مش بس وقت الأكل مباشرة.

ليه بعض الناس بتحس بطنين أو رنين في الودن بعد جرعة كبيرة من الأسبرين؟

الأسبرين بجرعات عالية (زي اللي بتتاخد في الروماتيزم) ليه تأثير معروف اسمه Salicylate-induced ototoxicity.

السبب: الساليسيلات بتأثر على قنوات الكالسيوم في الخلايا الشعرية الخارجية بالقوقعة (cochlea)، وده بيغيّر مؤقتاً من حساسية السمع ويسبب طنين (Tinnitus) وأحياناً نقص سمع بسيط.

متقلقش: الأعراض دي بترجع تماماً بمجرد تقليل الجرعة أو إيقاف الدواء عكس تسمم الأذن اللي بيسببه بعض المضادات الحيوية (زي الأمينوجليكوزيدات) واللي ممكن يكون دائم.

ليه فيتامين D بيتسمى الفيتامين الهرمون؟

فيتامين D مش زي باقي الفيتامينات، تقنياً هو prohormone.

الجسم بيصنّعه بنفسه من الكوليسترول في الجلد لما يتعرض لأشعة الشمس فوق البنفسجية (UVB)، بعدين الكبد والكلى بيحوّلوه لصورته النشطة Calcitriol اللي بتشتغل بالظبط زي الهرمونات: بترتبط بمستقبلات داخل نواة الخلية وتأثر على التعبير الجيني مباشرة.

عشان كده نقصه مش بس بيأثر على العظام (زي ما إحنا متعودين)، لكنه مرتبط كمان بالمناعة، المزاج، وحتى تنظيم ضغط الدم.

ليه الأسبرين مختلف عن باقي الـ NSAIDs؟

كل مضادات الالتهاب اللاستيرويدية (NSAIDs) بتثبط إنزيم COX بشكل مؤقت وعكسي.

الأسبرين بس هو الوحيد اللي بيعمل acetylation لإنزيم COX-1 في الصفائح الدموية، يعني بيربطه بشكل دائم وغير عكسي.

عشان كده تأثير الأسبرين المضاد للتجلط بيفضل موجود طول عمر الصفيحة الدموية (7-10 أيام)، لحد ما الجسم يعمل صفايح جديدة. ده سبب استخدامه في الوقاية من الجلطات بجرعة صغيرة يومية.