Amazon Education Center

بمناسبه امتحان اللغه العربيه…

(فيه فرق كبير بين التعليم والتسويق)

لما تبقى السنة كلها عبارة عن باكدجات، وشامل، ومراجعات، ومعسكرات، ومحاضرة وداع، ومحاضرة تكريم، ومحاضرة مفاجآت… و ٥٠ الف ملزمه مراجعه و١٠٠ الف ساعه مراجعه علي اليوتيوب والطالب يفضل يدفع من غير ما يحس إنه بيتقدم فعلًا، يبقى لازم نسأل نفسنا: إحنا بنعلّم ولا بنبيع؟

ولما تلاقي جروبات ولجان إلكترونية شغلها الوحيد التطبيل، وحسابات بتردد نفس الكلام: “مفيش زيه”، “بيشرح بضمير”، “مش بينام عشان الطلاب”، مع جرعات من كلام التنمية البشرية والشعارات الرنانة… يبقى الصورة واضحة.

أما التكريمات والجوايز، فبقت أحيانًا وسيلة للدعاية أكتر من كونها تقديرًا حقيقيًا. المهم تتصور مع أكبر عدد من الطلاب، وتنزل الصور، حتى لو المستوى العلمي محتاج شغل كتير.

ثم تيجي الوعود المعتادة:
“الامتحان هيجي من ملازمنا، ومن فيديوهاتنا، ومن اللايف.”
وفي النهاية يدخل الطالب الامتحان، يتفاجأ، ويخرج محبطًا، هو وأهله، بعد سنة كاملة من الضغط النفسي والمصاريف.

وبعد ظهور النتيجة، يبدأ فصل جديد:
يتم تجاهل الأغلبية التي تعثرت، ويتم الاحتفال بعدد قليل من المتفوقين، سواء كانوا السبب الحقيقي في تفوقهم أو لا، وكأن نجاح هؤلاء وحده دليل على نجاح المنظومة كلها.

ولا ننسى بعض السناتر التي أصبح معيارها الأول: مين هيجيب عدد أكبر من الطلاب؟ وليس: مين الأكفأ والأقدر على توصيل المعلومة؟

والأسوأ من كل ذلك، أن أي شخص يحاول ينتقد هذا الواقع أو يناقشه بموضوعية، يجد نفسه أمام لجان إلكترونية جاهزة للتشويه، والاتهامات بالحقد أو الغيرة، بدلًا من الرد على أصل المشكلة وفي الاخر يقولك تم فتح باب الحجز حجز ايه مش لما تطمئن علي طلابك الاول وتشوفهم عملوا ايه حجز ايه ولسه المناهج أصلا مانزلتش…

في النهاية… الطالب ليس مشروعًا استثماريًا، والتعليم ليس سباقًا في الدعاية واللي حصل في العربي وارد جدًا يتكرر في مواد تانية. فلا تضيع وقتك في الجري وراء الدعاية، وركز في التحصيل الحقيقي. الامتحانات بقت بتقيس الفهم، مش الحفظ ولا عدد المراجعات اللي حضرتها…
المعلم الحقيقي يُقاس بأثره في طلابه، لا بعدد البوستات، ولا حجم الإعلانات، ولا عدد المشاهدات ولا كثرة التكريمات.
اسف جدا لو كلامي جرح حد او اتكلمت ب أسلوب غير لائق.
توضيح/ البوست مش خاص بماده العربي او بمدرس معين البوست خاص ب جميع المواد👌