Dr. Reham Ragab

من حقك تحلم وتتمنى وتخطط، بس دايما متقطعش الحبل مع ربنا وخليك متيقن في قرارة نفسك ان اللي هيجيبه ربنا هو دايما الخير سواء انت شايفه خير حاليا أو لا. 👌🌷❤️❤️

واحدة من تعريفات الصحة النفسية أنك تكون عايش في حالة سلام وتناغم مع النفس، أيوة مع النفس .. مش مع العالم المحيط.

الحقيقة إن الإنسان لما يوصل لحالة التناغم مع النفس (اللي كلنا بنعدي عليها حتى ولو لحظات قليلة) مابتفرقش معاه وقتها أي صراعات خارجية .. أثر الخارج عليه بيقل ويكاد يكون منعدم.

وجربها .. جرب انك تكون معنوياتك عالية ومتصالح مع نفسك وسمعت ان حد قال عنك كلمة مش لطيفة، مش هتأثر أوي فيك .. قارن أثرها عليك مع أثر نفس الكلمة لو سمعتها في يوم انت قرفان ومش طايق نفسك فيه .. هاتجيبك الأرض.

إحنا بالبلدي بنقول مزاجي حلو أو قرفان.
إنما في الحقيقة هي مش مسألة مزاج. هي مسألة صراعات داخلية دفينة .. أحيانا بتكون عارفها ودافنها عشان مش عايز وجع دماغ، وأحيانا بتكون نسيتها من كتر ما دفنتها وعملت نفسك تمام. طول مانت مش بتحل الصراعات دي، هاتفضل عايش في خناقة جوة نفسك مهما كان بيحصل في الخارج.

تأكد ان صراعك الحقيقي مش مع العالم الخارجي. صراعك الحقيقي مع النفس.

واستنوا حاجات تانية مهمة جاية في الموضوع ده. ❤️