Artopathic

ليه التستر على جرائم زي القتل أو السرقة بيعتبر جريمة بيعاقب عليها القانون لكن التستر على المتحرشين والدفاع عنهم أو مهاجمة ضحاياهم بيعدي من غير عقاب حقيقي؟

الدفاع عن المتحرش أو التبرير ليه مش أقل من الجريمة نفسها وغالبًا هو اللي بيخلي التحرش والعنف ضد الستات يزيد.

والمفارقة إن أكتر ناس بتبرر التحرش هم اللي بيدعوا التدين، و بيلقوا اللوم علي الضحية مش المتحرش.

الشخص اللي ماسك سبحة بيقول للضحية " الدين بريء منك" وبيدافع عن المتحرش وماقالش ليه الكلام ده.

مهم نسأل نفسنا عن استخدام الخطاب الديني في قضايا التحرش.
وازاي بيتم توظيفه بشكل بيحمل الستات مسؤولية العنف اللي بيتعرضوا له وبيسيب المتحرش من غير حساب.

اخيراً خبر الإفراج عن عبدالعاطي تم تأكيده، خبر مفرح، بس الفرحة ما تكملش وسوزي وباقي صناع المحتوى والتيكتوكرز لسه محبوسين.
السؤال مش: ليه عبدالعاطي؟، السؤال: ليه مش الكل؟
وليه شفنا دفاع وتعاطف انتقائي من الفنانين والمخرجين له هو بس، بينما صناع محتوى تانيين بيتوصموا ويتهاجموا أكتر، بحجة إن “عبدالعاطي غيرهم”.

الأغرب إن نفس الناس اللي بيتم احتقارهم دول بيتم استغلالهم في الأعمال الفنية وبيتحولوا لإكسسوار، وكأنهم زيّ تنكري مش ناس حقيقيين من خلفيات ثقافية مختلفة؛ قصصهم بتتسرق، أغانيهم بيترقص عليها، وطريقتهم في الكلام واللبس بتتنسخ في أفلام ومسلسلات.

حرية التعبير مش امتياز طبقي، ومش حكر على ناس وناس.
اللي حصل كان فرصة حقيقية للدفاع عن مبدأ، لكنها اتاخدت فرصة لاحتكار التعاطف، وتوسيع الفجوة، وتبرير معاقبة الباقي، وده مش هيغيّر شئ من الواقع ومش هيخلي اي حد في أمان، حتى لو كان "غيرهم"…