Aly El Sayed

الاستثمار المالى فقط بمعنى عايز فلوسك تكتر بالحلال
اولا ابعد عن البنوك ثانيا بص ع شروط الاستثمار وازاى تعمله بص ع اخر بوستين ع الصفحة

هديكوا مثال ف بزنس انا بشتغله بالفعل حاليا 💥

💥المجال : تجارة الكيماويات والأجهزة المعملية والعلمية ومستلزماتها

💥حجم النشاط ف السوق المصرى : مليارى (بالدولار)

💥نوعية السوق : استراتيجى وb2b

💥العملاء :
1- المصانع بكافة مجالاتها طالما تحتوى على معامل للجودة والتطوير ومنها الأغذية والأدوية ع سبيل المثال لا الحصر
2-الجهات والمراكز البحثية والكليات العملية

💥اقسام الشركات فى السوق نفسه:
1- مستهلكات (Consumables)
كيماويات معملية محلى ومستورد (fine chemicals) ,زجاجيات وبلاستيكات محلى ومستورد glass&plastic ware.
2-الاجهزة المعملية المتعارف عليها وشائعة جدا لأى معمل جودة أو تطوير
3-الاجهزة الغير شائعة وايضا معها قسم أجهزة الLC ,GC وهيا أجهزة قيمتها بمئات الآلاف ومستلزماتها

🌚🌚 تشغيل الأموال ف المجال الخاص بيا كمثال لازم العميل يعرف مجال شغلك وحجمه واطلاعه ع اقراراتك الضريبية وحجم الفواتير سواء تجارى أو ( enduser )العميل الطبيعى بتاع سوقك ويشوف خطة عمل لا تقل عن سنة ولا تزيد عن ٣سنين وتحديد قيمة السهم المراد إشراكه ولا يتم التعامل ع قيمة اقل منه ولا اكتر منه كسهم منفرد بمعنى السوق بتاعنا السهم الواحد قيمته ١٠الاف دولار طب هل يقدر حد يدخل بأكتر من سهم اه طبعا وهنا بيتعمل عقد مساهمة في الشركة ع القيمة الإجمالية للمساهمة المالية ومقابل ذلك ثلث الأرباح الصافية بعد خصم كل التكاليف والمصاريف (ده من وجهة نظرى انا وقناعاتى) والقيمة تطبق ف حالة القيمة المالية(رأس مال الشركة السائلة والبضائع بعيد عن الأصول) تحت المليون دولار
🌚 وبالنسبة لخروج الارباح بتبقى بتصفية الاوردرات والمصاريف والتكاليف والأرباح والخسائر لا قدر الله إن وجدت كل ١٠٠يوم (ع السيولة النقدية المتاحة) بصفة مبدئية ويتم تقفيلها بنهاية السنة المالية ويحق للمساهم المالى الاطلاع الشهرى فى اجتماع ع سير العمل والفواتير والحسابات كاملة والتعاقدات
🌚وبالنسبة لكيفية سحب الاموال فى حالة الطوارئ وآليتها لابد من تحديدها من البداية وكذلك ف حالة الخلاف لابد من تحديد آلية الحل وبتختلف من واحد للتانى بس الاهم والقاعدة أن النظام يبقى ولضمان الحق

السوق بتاعنا مفيهوش تحصيل كاش عشان كده الحساب بيبقى كل ١٠٠يوم مع التحصيل عشان يبقى الحساب فعلى مش مجرد ارقام ع ورق فقط

تشغيل الفلوس فى مصر بقى نظام عام للنصب للاسف أو للكسب الحرام الا من رحم الله وموجودين بس قلة ودورك كصاحب سيولة انك تدور عليهم وهنا ديه شطارتك وقبلهم توفيق ربنا ليك

الحمدلله ان ربنا شرعلنا ازاى نتعامل مع بعض ف كل شئ ومنها الاقتصاديات وربنا يرزقنا الإخلاص والتوفيق ❤️

🌸 اتمنى يكون المثال واضح ع كيفية تشغيل الأموال بالحلال وبضمانات لصاحب المال ولضمان حقه وكذلك لصاحب العمل وضمان حقه

💥💥نصيحة لكل الشباب اللى راجعين من الغربة وعايزين يستثمروا فى مصر
معلش تعالى ع نفسك كمان سنة هنا فى مصر واتوظف فى الحاجات اللى انت كنت عايز تفتح فيها مشروعك الخاص

مفيش حد يفتح مشروع ف اى مجال من غير ما يشتغل فيه موظف فترة عشان يعرف التفاصيل بنفسه والoperation لازم يختبرها بنفسه
محدش بيصدق متاعب وعبئ الشغل غير اللى جربه بنفسه

"ابنى فى ملكك وفهمك وخبرتك بلاش تبنى فى ملك غيرك أو بفهمه"

أو استعين بحد يدلك ع حاجة منطقية بأقل التكاليف وأقل هامش مخاطرة ومش مهم العائد يكون كبير المهم العائد يبقى مستمر بطريقة ترضى ربنا

ازاى اختار الاستثمار الصح والمناسب ليا ولظروفى؟؟

السؤال ده إجاباته كتيرة وبتختلف ع حسب طبيعة كل واحد فينا وظروفه
بس اولا لازم تعرف انك محتاج مساعدة من حد يقدر يفيدك ويساعدك انك تحافظ ع راس مالك بجد مش هقولك اكلشيه أنه يكون بيعرف ربنا لان جزء كبير من النصابين بيدخلوا الدخلة ديه ع الناس والناس فعلا بتصدقهم بس فعلا لازم اللى يساعدك ده يكون بيتقى الله ويراعى ربنا فى نصيحته ويحط نفسه مكان صاحب الاستثمار
ثانيا اشتغل ف حاجة انت بتفهم فيها أو عايز تفهم فيها أو عندك خبرة فيها أو اعتمد على حد انت جربته اكتر من مرة ف حاجة زى كده ومخذلكش

1-الناس اللى متغربة بره وشغلاين فى الخليج وعارفين أن الدنيا بتتضيق كل شوية مع الوقت ولازم يفكر في الاستثمار فى بلده اللى هيستقر فيها إن عاجلا أو أجلا

2-الناس اللى زهقت وتعبت من الشغل والوظيفة ونفسهم يفتحوا بزنس خاص وعندهم أو معندهمش القدرات لده

3-الناس اللى عندها شغلها وحياتها ونفسها توسع ع نفسها بدخل اضافى من غير بزنس خاص(يعنى مصالح أو شغل فرى لانس فردانى كده مع نفسه)

4-الناس اللى بتفتح ستارت اب وعندها مشاكل متعددة ف الإدارة والتنظيم والهيكلة والتشغيل والتمويل

الصورة اللى تحت ديه بتشرح ازاى تختار صناديق الاستثمار أو هتستثمر فلوسك مع مين 👇👇

1-اهدافك من الاستثمار ايه بالظبط
2-تقييم تحملك لمخاطر الاستثمار (يعنى مدى قدرتك ع تحمل مخاطر الاستثمار هل هتقدر تخسر كل الفلوس وتكمل حياتك عادى ولا ايه )
💥💥 والمخاطر نفسها هنتكلم فيها فى بوست تانى لوحده عشان مش اى حد يكلمك ع استثمار تصدقه مهما كانت المغريات أو الورق المتستف صح
3- الوقت المحدد لمشروع الاستثمار ومدى قدرتك عليه
4-شكل التمويل دفعة واحدة ولا دفعات ولا أسهم ونسب وشراكة ولا ايه بالظبط
5-الرسوم والمصاريف (الفلوس الميتة من الاستثمار)
6-حجم الاستثمار وقيمته المالية سواء دفعة واحدة أو دفعاته
7- تقييم مديرين والقائمين ع الاستثمار (ده حوار كبير شوية عشان فيه جانب شخصى وجانب مادى 😆)

مشاكل كتيرة اوى بتحصل بين الشركاء بسبب حجم نسبهم من البداية الغير منطقية والمسيئة كمان
عشان كده ده demo صغنن كده عن نسبة كل حاجة بناءا على أقسام العمل نفسه
رأس المال ، الفكرة ، الإدارة ، التسويق وغيره زى ما موجود في الصورة اللى تحت

اهم شئ لما تعلم حد تعلمه غلط 😂😂😂