Noura Elsayed

💥الحل الوحيد عشان تقدر تكمل
*(هو إنك تعفو عن نفسك)* ..
● تستوعب إن مفيش حاجة بإيدك مهما سعيت وحاولت تخلي كل حاجة مظبوطة .. .💘💘
●.احترم صوتك الداخلي لما يقولك
إنك تعبان ،
إنك مش قادر ،
إنك لازم ترتاح شوية ،
إنك مش مبسوط ،
إنك ما تجيش على نفسك..

●احترم العلامات اللي بيرسلها جسمك ليك في شكل صداع أو ضغط عِلي أو وطي فجأة أو إرهاق أريفة أو همدان
》》عشان يفهمك إنك محتاج تركز مع نفسك وصحتك أكتر..
》》وإن نفسك و روحك و جسمك ليهم حق عليك..

●مفيش حد تعافى على نفسه وعلى صحته إلا و نِدم ،
●وفي الآخر محدش هيديلك الكاس لما تتكوم في سرير من التعب..

●و في الآخر هتطلع انت اللي عملت كده في نفسك وان محدش طلب منك تضحي بكل ده!

*صحتك و نفسيتك هما عُكازك*..

💥 *قال رسول الله صلى الله عليه وسلم" إن لِجَسَدِكَ عَلَيْكَ حَقًّا "*

#وعي

*لغات الحب الخمسة عند الأطفال*❤️
لو فهمتوها كويس علاقتكم بأولادكم هتتغير 180 درجة.

●الطفل زيه زي الكبير، محتاج يحس إنه محبوب، بس كل طفل ليه “باب” معين بيدخل منه الحب لقلبه.
●لو عرفنا طريق القلب، كل حاجة بعدها بتكون أسهل ،السلوك، الهدوء، الطاعة، الثقة، وشعوره بالأمان.

تعالوا نشرح كل لغة حب منهم..
》》 وإزاي تكتشفي لغة طفلك، وإزاي تستخدميها بطريقة بسيطة يوميًا:

*١- كلمات التشجيع والدعم*:
في أطفال بتفرح جداً جداً لما يسمعوا كلمة حلوة…
"أنا فخور بيك"
"أنا بحبك"
"شاطر"
"أنا مصدقك وانت قدها"...
الكلمات اللي زي دي بتكون بالنسباله زي الوقود بيمشيه، ودعم بيقويه وثقة بتبنيه.

●طيب إزاي تعرفي أن لغة حبه هي الكلمات؟
تلاقيه بيحكي كتير ومستني تعليقك.
عينه بتفرح لما تمدحيه.
بيتضايق جدًا من النقد أو الصوت العالي.

●تعملي إيه؟
استخدمي كلمات لطيفة… مدح صادق… جمل تشجيع… واحكيله قد إيه انتي شايفة تطوره ومجهوده حتى لو بسيط.

*٢- الوقت الخاص*:
في أطفال مش بيفرق معاهم حاجة أد إنك تقعدي جنبه ومعاه ولو دقايق بس، تحكي معاه، تضحكي، تلعبوا...
ثلاث دقايق اهتمام صافي بالنسباله = حب كبير.

●إزاي تعرفي إنها لغته؟
طول الوقت بيجري وراكي “تعالي شوفي يا ماما”
يزعل جدًا لو انشغلتي عنه بالموبايل.
يحب يقعد جنبك حتى لو بدون كلام.

●تعملي إيه؟
خصصوا وقت يومي ولو 10 دقايق بدون موبايلات…
اللعبة اللي هو بيحبها، تحكي معاه، تسمعيه…
الوقت ده بيتخزن جوا الطفل كأنه كنز.

*٣- الهدايا البسيطة:*
في أطفال بتحس بالحب من المفاجآت والهدايا.
مش لازم حاجة غالية، ممكن ورقة صغيرة عليها قلب، شوكولاتة، بالونة…
هو مش بيهتم بالهدية كقيمة مادية، هو بيهتم إن “حد افتكره”.

●إزاي تعرفي إنها لغته؟
يحتفظ بهدايا بسيطة لوقت طويل.
يفرح أكتر بالمفاجأة نفسها عن الحاجة اللي فيها.
يديكي هدايا من صنع إيده.

●تعملي إيه؟
اعملي ليه مفاجآت بسيطة… حاجات رمزية…
ورقة، رسمة، شوكولاته، لعبه ،حاجة من البيت…
المهم “افتكرتك"

*٤- اللمس الجسدي والاحتواء*:
في أطفال بتحس بالحب من الحضن ،من إيدك على كتفه، من إنك تشيليه…
من إنكم تبقوا قريبين من بعض.
الطفل ده الحضن بالنسباله ،أمان… إعادة شحن.

●إزاي تعرفي إنها لغته؟
بيحضنك كتير.
يحب يقعد في حضنك، ينام جنبك، يمسك إيدك.
لما يزعل يجري عليكي مخصوص.

●تعملي إيه؟
احضنيه كتير، المسي شعره ،خليه يقعد في حضنك…
اللمسة الصادقة بتطمن الطفل أكتر من ألف كلمة.

*٥- المساعدة وقضاء الاحتياجات:*
في طفل لما تساعديه يحس إنك بتحبيه…
لما تساعديه يلبس، تعملي معاه واجبه، ترتبي معاه…
مش لأنه عاجز عن ده، بالعكس…
هو شايف إن المساعدة = اهتمام
(ومساعدة فقط مش تعملي بداله)

●إزاي تعرفي إنها لغته؟
يحب يعمل حاجات معاكي “سوا”
يطلب منك تساعديه حتى في حاجات بسيطة.
يساعدك هو كمان، يجيب المية، يشيل طبقه... تحسي إنه بيعبر عن حبه ليكي بمساعدتك.

●تعملي إيه؟
ساعديه بحب، بدون عصبية، وخليه هو كمان يساعد في حاجات تناسب سنه…
ده بيعلمه الاعتماد على النفس وفي نفس الوقت بيشبع لغة حبه.

🤔*طيب إزاي نعرف لغة الحب الأساسية عند الطفل؟*

》》اسألي نفسك:
ايه الحاجة اللي لو عملتها طفلي بيكون في أحسن حالاته؟
راقبيه…
》》ايه أول حاجة يعملها لما يكون عايز اهتمامك؟
》》ايه أكتر حاجة تخليه مبسوط؟
》》ايه اللي بيزعله بسرعة لو اختفى؟

☆هتلاقي واحدة من الخمس لغات واقفة قدامك واضحة قوي.

*وإزاي نطبقها يوميًا؟*
١- خلي لغة حبه أساسية في روتينك.
٢- بس مهم جدًا تستخدمي باقي اللغات بشكل موزون.
٣- الطفل محتاج يشوف الحب بطرق مختلفة لكن “لغته الأساسية” لازم تبقى أوضحهم.
٤- لو شبع منها هتلاقيه هادي، متزن، واثق، وسلوكه اتحسن.
٥- الطفل اللي حاسس إنه محبوب سهل جدًا يتعلم ويتغير ويسمع الكلام ويتطور.

*لما بنحب الطفل بلغته هو*
نص مشاكله السلوكية بتختفي
ونص مخاوفه بتروح
ونص عناده مش بيكون موجود.
لأن الطفل وقتها بيحس إنه متشاف… مفهوم… ومحبوب.

*حبوا أولادكم بلغتهم هم مش لغتكم انتوا وهتشوفوا نسخة جديدة منهم أجمل بكتير*.❤️

عارفين الناس الي أول ما تبطّل تسيبهم يستغلوك و تحط حدود في العلاقات المؤذية معاهم ..
تلاقيهم فجأة بيقولوا عليك صعب أو طباعك بقت حادة او قليل الادب ؟

》》الكلام ده غالبًا مش عنك…
لا دا عن شعورهم بالانزعاج من تغيّر الديناميكية التي اعتادوا عليها.
》》وإنك ما بقيتش الشخص اللي كان دايمًا ساكت ومتسامح و بيجي على حساب نفسه.

💥 *في علم النفس ده اسمه*
*Threatened Control*

●يعني إحساسهم بالخوف نتيجة إنهم فقدوا السيطرة عليك.
●اللي اتعود على إن مافيش حدود، وجود الحدود فجأة يقلقه، لأنك ما بقيتش متاح زي الأول، وما بقيتش بتلبي احتياجاته و تيجي علي نفسك.

●الناس دي كانت مستفيدة من طيبتك، فلما تحط حدود، يحاولوا “يعاقبوك” اجتماعيًا عن طريق كلام سلبي، او تشويه صورتك، او اتهامك اتهامات كاذبه

●ودي كلها محاولات علشان يرجّعوك للدور القديم ( العبد المطيع ).

●كرههم ليك هو عباره عن إسقاط (Projection) لغضبهم الداخلي نتيجه فقدان امتياز كانوا واخدينه وافتكروا إنه حق مكتسب.

●وضع الحدود مش عدوانية، ده مهارة نفسية علشان تحمي طاقتك وحدودك

●لكن لازم تتعلم مع وضع الحدود انك تبطل الإحساس بالذنب بسبب تفعيل هذه الحدود.

●احترامك لنفسك و وضع حدود صحيه مش غرور، ده هوية نفسية سليمة.
●والسلام النفسي عمره ما بيبدأ بإرضاء الجميع…
*السلام الحقيقي بيبدأ لما تبطّل تأذي نفسك علشان غيرك يكون مرتاح*

#وعي