Relationship coach - Heba Bahaa

"الخزان لازم يكون مليان "

وقت الابتلاءات بيكون صعب اوي و ردود افعالنا مش بتكون وليدة اللحظة دي نتيجة لاستعدادك للبتلاء او المحنة دي

ازاي يعني استعدادي دي ؟ 🤔

الاستعداد دة هو ان وقت الرخاء نكون بنملي خزان او تنك ربنا عشان يكون جاهز نستعملة لما المحنة تيجي زي خزان المية الاحتياطي اللي بنستعملة لما المية تقطع مثلا .
الخزان دة لازم يكون مليان تسليم و ايمان بربنا ، ايمان ان ربنا عليم بما يصلح احوالنا و حكيم بتدبيرة لامورنا و رحيم بنا لا يكلفنا الا وسعنا (يعني الابتلاء علي مقاسنا ) و لطيف بنا ، مع الابتلاء دايما في لطف و رحمة و منحة و عطية ، تسليم بقضاء الله و اقدارة و ان كلها خير .

كل دة بيساعدنا اننا نشوف الابتلاء دة نعمة و عطية من ربنا .

اية ؟ اشوف الابتلاء نعمة و عطية ؟؟!!
اة ممكن نشوف الابتلاء نعمة و عطية و طبعا دي حاجة مش سهلة بس ممكن تحصل لو الخزان مليان صح ، مليان و العقل مصدق و القلب معتقد و مترسخ فية المعاني دي بجد مش كلام بيتقال .

بتقولولي ازاي ؟

اقولكم بقة ازاي
١ - لما الخزان بيكون مليان اول ما يقع الابتلاء او المصيبة ،العقل و القلب مستعدين جاهزين حاضرين بالصبر و الرضا بقضاء الله و قدرة

٢- لما هترضي هتعرف تتكيف و تتأقلم مع الوضع ، هتشغل العقل المرن flexible mindset , هتطلع حلول و بدائل تساعدك ، و بالتالي هترتاح و هتتقبل اكتر .

٣- لما هتتقبل اكتر ممكن كمان تلاقي فرص جديدة او تتعلم مهارات جديدة او تكتشف في نفسك امكانيات و مهارات مكنتش عارفها عن نفسك .

لما دا يحصل هتحس ان الابتلاء دة نعمة و ان ربنا هداك بية عشان تتعلم حاجة جديدة او تكتسب مهارة او خبرة في الحياة تزيدك صلابة و حكمة و تعلي قدراتك و امكانياتك دا غير طبعا مكانتك عند ربنا بالصبر و الرضا و مكافأة الصبر اللي لا يعلمها الا الله .

بالبساطة و السهولة دي ؟؟
اكيد لاء
هي مش سهلة بس مستاهلة