DM world

عيد سعيد عليكم جميعا و اتمني من الله كل الخير للجميع ❤️

فيه مقولة شهيرة بتقول
❝You can crouch without the ouch❞
يعني، يمكنك الإنحناء بدون ألم

وده إيه علاقته بنزاهة مارك زوكربيرج من عدمه؟
هقولك..
أولًا أهلًا بيك في ملعب زوكربيرج

الراجل اللي كتب على الـ Business Card بتاعه
I'm the CEO, Bitch!

قبل ما تكمل بنصَحك لو لسه متفرجتش على فيلم
The social network
محتاج تتفرج عليه.
ولحد ما تتفرج عليه، لا بأس بقليل من الإثارة والتشويق حَج ميديستا.

مش هينفع أقولك سمّي وادخل برجلك اليمين ملعب زوكربيرج لإنك بالفعل جواه بقالك مش أقل من ٥ سنين.

بس هقولك ازاي تنحني من غير أي ألم زي ما عمل مارك..
على ذكر مارك، فمحدش يقدر ينكر إنه حرامي شاطر، ولو كل واحد فكر يسرق أفكار غيره في سبيل إنه يتصنَّف أصغر مليادير في العالم من ١٥ سنة ويبقى حديث العالم حتى يومنا هذا فـ إيه اللي موقفك إنك تسرق أفكار غيرك؟
هقولك أنا إيه اللي موقفك بس هقولك حقيقة مرة إنت دلوقتي بتعيشها وإنت بتقرأ الكلام ده..

إنت عندك فكرة مشروع هايلة بس مش عارف تنفذها للأسباب دي:
✦ مش معاك ميزانية كافية
✦ مش معاك الإمكانيات اللازمة
✦ مش مخطط لمشروعك صح
✦ خايف تبدأ لتفشل
✦ والأوقع من كل ده إنك كسلان ومستني الأول تخلص مسلسل اللعبة الجزء التاني

وصاحبك اللي حكيتله على فكرتك الهايلة خايف يسرقها منك للأسباب دي:
∎ خايف يخسرك للأبد
∎ مش عارف يشغل دماغه شويتين ويسرق بحرفنة
∎ معندوش خطة واضحة يشتغل عليها بعد ما يسرق فكرتك
∎ وغالبًا هو قرر يكبر دماغه لإنه قاعد جنبك بيتفرج معاك على مسلسل اللعبة.
ممكن تعملوا Pause انتوا الاتنين لمازو وحبو دلوقتي
و Pause لتفكيركم معاه
وتتفرجوا على لعب مارك شوية؟

➊ مارك سرق فكرة زمايله في الجامعة، بس محدش يقدر يصنَّفه مستغل أو حرامي أو منتهك حقوق ملكية، عشان هو طوّر في الفكرة لحد ما بقت بيزنس حقيقي.
وهنا تحضر مقولة مهمة محدش اخترعها غيري، بتقول:
❜❜الفكرة ليست حكر على قائلها، ولكنها حكر على من نفذها بالفعل وطورها وجعلها كيان حقيقي على أرض الواقع إلى أن يظهر منافس قوي له❛❛

لو سرقت فكرة صاحبك متتكسفش تقوله أنا سرقتها منك وهو ملوش حق يزعل منك، مارك قال للأخوان التوأم اللي سرق فكرتهم:
❞لو كانت فكرة فيسبوك بتاعتكم معملتوهاش ليه؟!❝

بهدووووء كده ومن غير ما تزعل مع صاحبك، احنا كل يوم بنفكر في أفكار لمشاريع كتير مهولة لو كانت كلها اتنفذت بالفعل كان كل مواطن وبشري على وجه الأرض هيبقى اسمه CEO و Founder الفكرة دي.

ولكن Generate الأفكار مفيش أسهل منه بس تنفيذها هو الصعب وكذلك الـ ٢ Titles دول مش بالساهل.

➋ مارك محبش يخلص الحفلة بدري بس إدواردو شريكه كان عايز كده.
مينفعش تكون ميزتك التفردية إنك بتعلن إنك موقع مجاني وبعد ما تجمع Market Share لا بأس به جاي على الميزة دي هوب دوبل كيك تحوله لموقع بتاع إعلانات عشان تتربح منه.

مينفعش تعمل بلوج تعليمي بينزل فيه مقالات تعليمية بحتة وكاملة مجانًا وبعد أول ٥٠٠٠ متابع تقلبه لموقع كورسات للمعلومات دي بس بفلوس!

بتلم الكراسي ليه وإنت لسه في نص الحفلة؟
بتطرد ضيوفك فجأة ليه؟

مارك صمم ميحولوش لموقع بيظهر فيه معلنين من أول إنجاز وفضل مصمم لحد ما كسب أول مستثمر بقيمة نص مليون دولار!

➌ التاسك اللي وراك تقيلة منتهتش على كونك سرقت أفكار، لأ انت وراك خطة جهنمية بعدها وهي سطو مسلح على عقول عملاءك المُبجلين.

بتعرف تسمع أكتر ما بتتكلم؟
لأ ؟
كنت عارفة إنه نو على فكرة 🙂

ينفع تسمعني كويس، عشان أنا هقولك دلوقت جملة واحدة بتون زعيق جامد جدًا خالص عشان تفوق:
❝PLEASE LISTEN TO YOUR AUDIENCE.❞
مفيش صيغة زعيق في العربي فلزم الكتابة بالإنجليزي.

مارك معندوش وقت ولا فاضي ودماغه مسحولة في Algorithms و أكواد وتفاصيل لا أنا ولا إنت نعرف عنها حاجة.
بس لما جاله واحد زميله يسأله على زميلتهم هي مرتبطة ولا لأ جري ع أوضته يزود الحالة الاجتماعية لبروفايلات المستخدمين في فيسبوك.

شوف يا أخي واحد صاحب مارك من ١٦ سنة خلاك إنت دلوقت تدخل تشوف الكراش مرتبطة ولا سنجل زي حالاتك.

منكرش إن مارك غلط كتير ولحد النهاردة بيغلط غلطات فادحة وده أكبر دليل على إن أي Business Man ناجح مش معصوم من الأخطاء الفادحة.
ورغم تحفظي عليه وعلى سياسته في إدارة منهجية فيسبوك وفي خسارته أعز أصدقاءه في بادئ الأمر وفي غضبه الدائم وتشهيره بصديقته على مواقع التواصل الإجتماعي وانتهاك حسابات بنات جامعته كلها.
بس زوكربيرج عرف ينحني من غير أي ألم..

نسيت أقولك هو أصلا مارك انحنى امتى؟
➀ مارك انحنى لما اتجرأ وسرق فكرة عادية وعرض نفسه للمسائلة القانونية وفضح نفسه في الجامعة بس مجهوده في تحويلها لبيزنس جهنمي زي ده خلاه ميتألمش لحظة ولا يبكي ع دماغه الألماظات اللي اسقطت من عليه التهمة في الآخر.

➁ مارك انحنى لما خان ثقة صاحبه الوحيد فيه واللي مضاه من غير علم على أوراق تنازله عن حصته في فيسبوك عشان صاحبه في لحظة غضب جمد كل حسابات فيسبوك البنكية، بس محسش بـ ألم لما باع حصته وفككها لـ ٥٠٠ ألف سهم لمستثمرين جدد آمنوا بفكرته وقدروا يوفروا فلوس شريكه وصاحبه اللي رضاه بعد كده ورجعه تاني لمنصبه..

لولا نجاح فيسبوك وقيمته السوقية مكانش صاحبه وافق يرجع بعد اللي حصل فيه!

➂ مارك انحنى لما خسر حبيبته بسبب هوسه بعالم البرمجة والنوادي ولاقى منها وصف لذاته مهين جدًا، بس مارك لولا الإنحناء ده مكنتش أنا بكتب بوست دلوقت و منزلاه على المنصة الأضخم في العالم واللي إنت بتقرأ فيها دلوقت المحتوى ده، اللي تعتبر هي المنصة الأولى المسروقة بحنكة وحرفنة من قبل أصغر ملياردير في العالم صاحب مقولة
❝When you give everyone a voice and give people power, the system usually ends up in a really good place. So, what we view our role as, is giving people that power.❞

صحيح فيه بنت في الفيلم بتقول إن هي أدمنت فيسبوك عشان قعدت عليه ٥ ساعات في اليوم الواحد!

طبعًا إنت بتقعد على فيسبوك باقي اليوم وبتنام الـ ٥ ساعات دول بس 🤭😂
مش هفتح معاك نقاش محتوم بتاع يا ترى يا هل ترى مارك حرامي ولا مُحنك، بس هسألك بكل جدية العالم بتقعد على فيسبوك كام ساعة في اليوم؟