ElAabd

مرايات

زي كل يوم في تخبطات أمواج بحر المعلوماتية والمعروفة بالـ (سوشيال ميديا) برضو🤓... جت موجة خلتنى أنزل أشرعة سفينتى شوية... الموجة كانت باختصار بودكاست لشخصية مشهورة وبحبها بدون ذكر أسماء🤐... لكن الى شدنى في البودكاست كله فقرة لا تتعدى 5 دقايق الضيف كان بيتكلم عن واحد من قرايبه وتقريبًا بيشتغل (H.R.) بالعربي موارد بشرية... المهم قريب الضيف هو الى بيوظف المديرين التنفيزين للشركة... و هو بيعمل المقابلات كان بيعمل حركة خبيثة... بتاع (H.R.) متوقعين خير مثلًا😈... ما علينا كان بيخلى المتقدم يتكلم عن نفسه كتير لحد ما يستوى في نار غروره و هوب يلسعه بالسؤال ده "إيه الى ما يخلينى أوظفك؟"😱 طبعًا بلاوى سودا بتطلع من الواحد لدرجة إن واحدة من المتقدمين قالت: "مين الشركة الغبية الى ما توظفنى" وقريب الضيف رد عليها: "مين الشركة الغبية؟" وهنا المتقدمة وقعت في شر أعمالها وسمحت لقريب الضيف إنه يصيب الهدف ويطلع أسواء ما فيها ألا وهو الكبر... ومتنساش الكبر طلع إبليس من رحمة ربنا...

هنا فلسفتي قالت كلمتها إنهارده يوم الأرق... لأ مقالتش كده بهرج هى سألتنى سؤال خطير "هتجاوب إزاى لو كنت مكان المتقدمة دى" بوم... بعد ساعات من التفكير الطويل العميق قررت إنى هجاوب السؤال بسؤال "قيم نفسك من 10؟"... ما هى فلسفة بفلسفة بقى... ومستنى إيه إنزل قيم نفسك من 10👇

بس حابب أقولك إنى كل إجاباتك مش هتكون صح... لإنك لو جاوبت 10 هتكون غلط لإن الكمال لله وحده ولو قولت أقل من كده برضو هتكون غلط لأنك ممكن تكون قاسى على نفسك ومش مديها حقها أو بتحاول إظهار شوية تواضع قدام الناس لكنك في قرار نفسك 100% مفكش غلطة مع إنك مش شايف نفسك أصلًا... بجد أنا لو قلتلك شعرك منكوش هتدور على مراية تشوف نفسك فيها... طب وايه علاقة شكلى فى المرايا بتقييمى لنفسى؟..

بالظبط أنت محتاج مراية عشان تقيم نفسك... لإنك زى ما أنت مش قادر تشوف شكلك من غير مرايا مش هتقدر تشوف نفسك من جوا من غير مرايا... لكن لازم تعرف إن المرايات أنواع وأشكال ولازم تعرف نوع المرايا الى قدامك عشان تعرف تتعامل معاها... و دى أربعة من المرايات موجودين فى حياة معظمنا من الأسوأ للأحسن...

4- المراية المنافقة: ودي المرايات الى مش سوية بطلعك وحش في كل الأحوال والسبب قد يكون غيرة، حقد أو حسد إلخ... ودي متكسرهاش -خليك لطيف- بس متثقش في صورتها...

3- المراية الضبابية: هي مرايا مش قريبة منك كفاية عشان تعرف تطلع صورة صحيحة عنك فبطلع صورة قد تكون منقوصة أو غلط خالص...

2- مرايا بتشوف الحلو بس: المرايا دى عكس المنافقة تمامًا هي أثرها ايجابى عشان كده هي أحسن من المغبشة لكن برضو غلط عشان مبتشوفش الجانب السيء لإنك ببساطة مش ملاك... وفي حياة بعضنا المرايات دى بتكون الأب والأم وطبعًا لازم نقول المثل بتاعنا في مصر: "القرد في عين ماماته غزال" طبعًا مع كامل إحترامى للقرد والغزال... لكن لازم تسمع كلام الوالد و الوالدة بدون إهمال لكن فى نفس الوقت لازم تميز بين صورتك في عينهم وصورتك الحقيقية...

1- المرايا الواضحة: مرايا بطلعك زى ما أنت بطريقة محايدة... قادرة تظهر مميزاتك بدون مجاملات زى ما قادرة توضحلك عيوبك بدون رأفة وأه بدون رأفة... لإن ده شيء مهم لو عايز تطور من نفسك بجد... أه هتدايق وممكن تحبط لكن هتطور للأحسن كنتيجة إيجابية للنقد... لإنها مخلياك شايف نفسك بوضوح...

لو فيه مرايات تانى موجودة فى حياتك غير دول قلنا فى التعليقات... و متنساش تقيمنى برضو و أااه لو فى شوية نقد بناء تبقى جدع👍

وحابب أختم بقول سيدنا عمر بن الخطاب رضى الله عنه: " رحم الله امرأً أهدى إلي عيوبي"...

هذا المقال إهداء إلى أبى...

أنا العابد... كاتب و مهندس قسم فلسفة... و دى صفحتى إلى إن شاء الله هنشر فيها عبثياتى... أو ما أسميه و فى الأخر أتمنى أسيب أثر إيجابى فى حياة الناس👌🫶