Alt Shift

النهارده هنكلمكم عن الـ VRM أو Voltage regulator module
ايه هو دورها وليه هى عامل أساسى فى اختيار الـ MotherBoard !!

أولا كده الـ VRM بيشتغل بنفس الطريقة اللي الـ Power Supply بيشتغل بيها لأن ببساطة كده الـ Power Supply بيسحب 220 فولت من الكهرباء العادية و يحولهم لـ 12 فولت.

بس الرقم ده كبير على البروسيسور وبالتالي يجي الـ VRM يحولهم من 12 فولت لـ 1.2 او 1.3 فولت على حسب البروسيسور اللي عندك.

طيب هو الـ VRM ده موجود فين فى ال MotherBoard وشكله عامل إزاي؟
أولا كده لازم تعرف إن هما أيوه متشابهين فى الوظيفة بس هما غير متشابهين في الشكل تماما.

بالنسبه لشكله فهو متقسم لأكثر من جزء (مرحلة).
أول جزء هى الـ Mosfet وبتكون موجوده تحت الهيت سينك فوق البروسيسور و على شماله
ووظيفتها بتتمثل في إن لما البروسيسور يطلب منها فولت معين تشتغل و تبدأ تبعت للبروسيسور الفولت اللي هو محتاجه بالظبط.
تاني جزء هى الـ Chokes وبتكون موجوده جنب الهيت سينك إلي تحتها الموسفيت بالظبط ووظيفتها هي إنها تحافظ على استقرار تيار الكهرباء و ميكونش في اي تردد في الكهربا اللي داخله للبروسيسور
والجزء الأخير هو الـ Capacitors ودي مسئولة عن تخزين الطاقة قبل وصولها للبروسيسور عشان يحافظ على استقرار الفولت الواصل للبروسيسور.
واللي بيفرق MotherBoard عن التانية هو التبريد لأن كل ما كان تبريد الـ VRM احسن كل ما البورده قدرت تشتغل على ضغط 100% لفترات أكبر من غير ما يحصل مشاكل في الـ PC.
ولو لسه عندك اي استفسار تقدر تقولنا فى الكومنتات واحنا هنساعدك.

من أكبر مميزات الـ PC هي ال customisations اللي ممكن تطبقها عليه, (Intel ولا Amd) أو (Nvidia ولا Amd) تختار(RGB ولا Stock) (تبريد مائي ولا هوائي).
وعلشان التبريد مهم جدا لكل ال PCs احنا النهارده فى Alt Shift هنعرفكم الفرق بين أنواع المبردات وازاي تختار المبرد المناسب لجهازك.

علشان تعرف ايه اللي يناسبك لازم الأول تعرف مميزات كل نوع.
أولا التبريد المائي:
من أهم الحاجات اللي بتميز التبريد المائي هي الشكل.
ثانيا بقي وده الأهم:
السعة الحرارية حيث إن المبرد المائي عبارة عن radiator مرتبط ببلوك متصل مباشرة بالبروسيسور وسائل بيدور فى دايرة مغلقة بين المعالج والرادياتير ووجود مساحة تبريد أكبر (فى الرادياتير) بيساعد على بقاء درجات الحرارة الحرارة منخفضة من غير ما يسرع دوران المراوح وهو اللي بيدي توازن ممتاز ما بين درجات الحرارة والصوت اللي خارج من المراوح.
ثالثا:
تبريد الجهاز ككل بيكون أكثر كفاءة حيث إنه في الغالب إنت هتركب المراوح داخل الكيس بحيث يكون ال هواء اللي هيعدي على الرايدياتر خارج من الجهاز وده هيؤدي لسحب الهواء الساخن من الداخل و هيوفر عليك المراوح الزيادة لزوم تظبيط ال AirFlow وبالتالي الصوت كمان هيقل.

وزي ما كل حاجة ليها عيوب ومميزات التبريد المائي هو كمان ليه للاسف بعض العيوب زي إن ممكن يحصل فيه تسربات تأدي لتعطل المضخة أو حصول تسريب ممكن يأدي لحرق القطع اللي جوه الجهاز بتاعك بس تقدر تتفادى المشاكل دي لو اشتريت مبرد كويس من شركة معروفة,
بس للأسف ساعتها هيقابلك عيب تاني ألا وهو السعر حيث إن سعر المبردات المائية الكويسة اللي من الشركات المعروفة واللي تقدر تعتمد عليها بيتراوح ما بين 100 إلى 150 دولار وده سعر كبير مقارنة بالتبريد الهوائي اللي هنكلمكم عن مميزاته الوقت.

أولا القيمة مقابل السعر:
زي ما قلنا فوق أن المبردات المائية الرخيصة بتأدي لمشاكل كتير اللي هيضطرك لشراء واحد غالي.
بس هل تعلم إنك ممكن تشتري مبرد هوائي يديك 90% ألي 100% من أداء المبرد المائي بنص التمن بس.
عندك مثلا المبرد المائي (Corsair H100i) اللي بيجي بسعر 90 دولار واللي تقدر تستبدله بالمبرد الهوائي (Enermax ETS-N30) اللي هيديك من 90% إلي 95% مقابل 50 دولار بس.
وحتي إن فيه مبردات هوائية أقوى من كل المبردات المائية المعروفة في السوق زي (Noctua NH-D15 - Noctua NH-D15).

تاني ميزة من مميزات المبردات الهوائية هي الاستقرار حيث إن المبردات الهوائية أغلبها عبارة عن قطع معدنية ثابتة مفيش غير المروحة بس اللى بتتحرك ولو كان المبرد من نوع كويس المروة ممكن تفضل سنين وسنين من غير مشاكل. وده اللي يخليك متستغربش لما تعرق إن السيرفرات الكبيرة والسوبر كمبيوتر بيتم تبريدهم هوائيا مش مائيا.

بس زي ما بيقولوا الحلو مبيكملش المبردات الهوائية الكويسة عندها مشكلة صعبة شوية, ألا وهي الحجم بحيث إن مثلا لو اشتريت مبرد مائي قوي ممكن يكون حجمه كبير بحيث انه ميسمحلكش تركب رامات RGB (رامات الـ RGB بيكون ارتفاعها أعلى من الرامات العادية) أو إنه حتي يكون أكبر من عرض الكيس ومتعرفش تقفل الغطا بعد ما تركب المبرد.
وزي ما قلنا فوق إن المبرد المائي بيسحب الحرارة من كيس يخرجها بره المبرد الهوائي بيعمل تقريبا عكس كده لأنه بيسحب الحرارة من المعالج ويطلع الهواء جوه الكيس فبالتالي لازم يكون عندك AirFlow كويس علشان تحافظ على حرارة الجهاز.
وفي النهاية نحب نقولك: لو عايز تبريد محترم بسعر قليل يبقي انت محتاج تبريد هوائي أما لو عايز شكل وهدوء على حساب السعر تقدر ساعتها تختار المائي بس هلي فى بالك دائما (أياك ثم إياك التبريد المائي الرخيص)
ولو لسه عندك اي استفسار تقدر تقولنا فى الكومنتات واحنا هنساعدك.

ال RAM هي أحد أهم القطع في الجهاز بتاعك.💪💪
وسرعة البروسيسور بتتأثر بشكل كبير بسرعة الRAM .
وانهارده هنوضحلك بعض المفاهيم الغلط اللي ممكن تقع فيها وانت بتختار ال RAM.🙃
كتير من الناس عندها اعتقاد إن لما سعة ال RAM الموجودة فى جهازك تزيد الجهاز هيشتغل بسرعة وكفاءة أعلى. لكن للأسف, الاعتقاد ده غير صحيح.🤨
سعة أو حجم ال RAM مش مهمة بالدرجة اللي يكون ليها تأثير على أداء الجهاز.
عامةً لو عندك بروسيسور قوي مش هتحس بفرق بين ال 8GB RAM وال 16GB RAM لو شغال شغل بسيط زي انك تتصفح الإنترنت أو تبعت ميلات بس على الصعيد الآخر لو جينا للشغل التقيل زي الفوتوشوب و المونتاج أو الألعاب حتحس بالفرق لإن البرامج دي بتحتاج سعة RAM عالية.🤯

فيه عوامل كتير بتأثر على أداء ال RAM بغض النظر عن السعة اللي متوفرة عندك.
ومن أهم الحاجات دي سرعة ال RAM أو التردد وتأثير السرعة بيظهر بالتزامن مع البروسيسور. يعني لو بتستخدم RAM DDR4 مع بروسيسور Core 2 Duo متتوقعش أداء عالي لإن البروسيسور نفسه ضعيف.😴

ولازم تحط فى اعتبارك دائما السبب السبب اللي إنت بتغير علشانه.
فمثلا لو انت بتغير علشان الأداء والسرعة فى تنفيذ المهام يبقي لازم تخلي السرعة هي العامل الأساسي للاختيار.
أما لو بتغير علشان تشغل برامج أو مشاريع أكبر يبقي لازم تهتم شوي بمسألة السعة.🤏

أي MOTHERBOARD بيكون فيها خاصية إسمها Dual channel ✌والخاصية دي بتسمح بتوافق شريحتين RAM مع بعض علشان يقدموا أداء أعلي.💪
وللأسف فيه معتقد خاطئ عند بعض الناس ألا وهو أن المدخلين لازم يكون فيهم نفس نوع ال RAM.😥
بس ده مش شرط, عادي ممكن تضيف RAM جديد بحجم مختلف لكن مع مراعاة أن المدخلين يكون فيهم رامات من نفس الجيل.
بمعني: لو ال RAM الموجود عندك DDR4 يبقي ال RAM الجديد لازم برده يكون DDR4 ونفس المثال ينطبق على التردد والفولت.⚡⚡

موضوع الرامات كبير ومليان اسئله فلو عندك اى سؤال عن الرامات سيبهولنا فى الكومنتات وهنرد عليك.😉

اشتريت تجميعة جديدة أو حدثت الجهاز بتاعك وخلاص الزهر هيلعب وهتشغل الألعاب على 144 FPS 💪💪.... ايه ده ليه اللعبة مش بتجيب غير FPS 80 ؟!؟! 😭😭
اللي حصل ده Bottleneck/عنق الزجاجة. وأبسط مثال على عنق الزجاجة هو عنق الزجاجة 😅 حمادة هلال أوي.😅
تعال أشرح لك :
تخيل معايا كده ان انت عندك ضيوف وبتقدملهم Coca Cola🥤تمم.
لما تيجي تصب الكولا في الكاسات هتلاقي ان كمية الكولا اللي خارجه من الزجاجة بتقل عند العنق بسبب ان نصف قطر العنق أقل من نصف قطر الزجاجة.
ونفس المثال ده تقدر تطبقه علي PC. 🖥 وغالبا بيكون البروسيسر وكرت الشاشة هما المشكلة.
يعني لو عندك معالج قديم وضعيف وركبت عليه كرت شاشة قوي
أثناء اللعب البروسيسر هيخفض أداء كرت الشاشة للحيز اللي يقدر فيه يستوعب الداتا ويكمل معالجه (المعالج بيتجاهل بعض الفريمات اللي مقدرش عليها)😔 وهو ده ال Drop Frames

الفكره ان المعالج بيعالج بعض الداتا وللأسف مش بيقدر علي الباقي فالكارت وصله داتا ناقصة فبيحاول علي قد ما يقدر يرندر الداتا دي بس خليك عارف ان البروسيسر هو المسؤول عن الـ AI وال physics بتاعة اللعبة.

بس تعال معايا كده نتخيل السيناريو ده بالعكس:
(البروسيسر حديث وقوي - كارت الشاشة قديم وضعيف) مش هيحصل حاجه 🤨 اه زي ما بقولك كده. البروسيسر هيشتغل بكل قوته والكارت هيقدم كل اللي يقدر عليه بشكل كامل وسلس 😊 وفي الحالة دي اي Drop Frames هيكون بسبب ان اللعبة أصلا أعلي من إمكانيات الكارت.

طيب انا الوقت عرفت يعني ايه Bottleneck, إزاي بقي أعرف ان كان جهازي بيعاني من المشكلة دي ؟؟
اولا كده: هتحتاج برنامج يساعدك على قياس أداء القطع اللي عندك
(MSI Afterburner ✈️) كمثال
و تظبط اعدادات البرنامج بحيث يظهر لك البيانات اللازمة أثناء اللعب زي ال gpu usage وال cpu usage وبعد كده تفتح اللعبة من غير ما تعدل اعدادات الجرافيكس فيها.🔧
لو كان استهلاك البروسيسور دائما أعلى من كرت الشاشة فللأسف إنت عندك bottleneck.🙁 وبيكون مؤثر لو كان استهلاك المعالج 90% الى 100% وبيكون غالبا مش مؤثر لو كان تحت ال 90%

طيب ازاي اتجنب ال bottleneck ؟🥺
جملة واحدة عزيزي المتابع (خلي تجميعتك متوازنة)
متروحش تشتري TITAN وتركبه علي i7 الجيل الثاني بحجة أنه i7 وهيستحمل.😅😅
وعلشان متتعبش نفسك, فيه مواقع بتساعدك تعرف ان كانت القطع اللي انت هتشتريها هتسبب bottleneck ولا لا زي (Bottleneck Calculator)
بس للأسف غالبا مش بتكون دقيقة 100% 🙂
بس التارجت مش لازم يكون تجميعة مثالية المهم ال bottleneck يكون اقل ما يمكن.
كدا تقريبا احنا شرحنا كل ما يخص ال bottleneck
لو لسه عندك أي سؤال تقدر تسيبه في التعليقات وقولنا عايز البوست الجاي يكون عن ايه 😎