Dadaou flora

. 💇 درس_الديكابـــاج💇
موضوع اليوم هو الديكاباج
لقيت بزاف بنات هردو شعرهم معرفوش طريقة الديكاباج وكاين بنات معيرفوش أصلا ما معنى الديكاباج

😘أولا : الديكاباج هوا ازالة ولا سحب اللون من الأغمق الى أفتح لون بدرجات

😙ثانيا : طريقة تاعو سهلة وشنو تبعوني باه تفهموني 😘

الطريقة كالاتي :
👈 1- الخليط يكون فيه هاد المكونات : كيلة بلوندور و زوج كيلات اوكسيدو 30v وشوية بلسم الشعر يعني ابري شمبوا قيس مغرفة برك ونص كيلة من كريمة مزيلة اللون لوريات الباط تاعها غوز نزيدلها حقها تاع لوكسيدو يعني تاني نص كيلة و نقطة قيس حبة حمص من المصحح الأزرق رقم 38 لوريات

👈 2- نخلطو كلش و نابليكيو كيما لا تانت و لي شعرها ماشي قاوي بزاف تبدا من وسط الشعر للآخر من بعد تولي دير من لاغاسين و تهبط

👈 3- بعد منكملو كلش يعني الشعر كامل نخلوه نصف ساعة و نغسلو مليح بالشامبوا ونشفوه مليح ونعمروه بزيت جوز الهند نخلوه يومين ولا 3 ونعادو نديكابيوه المرة الثانية نفس المقادير لكن هاد المرة نستعملو اوكسيد 20v ونخليوه 20 دقيقة ونغسلو

😘 هنا تتحصلي علا ديكاباج هايل خالي من العيوب يعني مفيهش الألوان هديك البرتقالي و الأحمر و ..... تبعو مليح الملاحظات لي راهم التحت 👇👇

👈👈 لي شعرها ماشي قاوي وخفيف دير ديراكت كريمة مزيلة اللون تاع لوريات باطتها غوز كيلة بكيلة متستعملش البلوندور وتستعمل ابري شامبوا ولا محسنات اخرى زيوت ولا سيروم

💪💪 حبيت نعطيكم معلومة حولة المصححات :

1- المصحح الأزرق 💙 ميخليش اللون البرتقالي يظهر بعد الديكاباج

2- المصحح الأخضر 💚 ميخليش اللون الأحمر يظهر بعد الديكاباج مكاش في ماركة لوريا كاين في ماركة اسمها كولوراي coloray دير 40 الف

3- المصحح البنفسجي 💜 ميخليش اللون الأصفر لي كيما البنان ( الموز ) يظهر بعد الديكاباج

يعني الديكاباج تاعك يخرجلك هايل وصافي ولي خايفة يخرجولها البقع البنية شبه برتقالية واللون الأحمر و ... في الخليط دير نقطة نقطة من جميع المصححات للعلم المصححات عندها تركيز عالي يعني نقطة صغيييييرة قلت صغييرة 👇👇

و لي خايفة على شعرها تستعمل البلوندور لوريال غالي شوية مي تضمني شعرك ميفسدش ولكن بهاذ الطريقة ثاني مليح مام مستعملتيش لوريال

المرة الجاية درس ليماش باش يخرجولك هبال
🔥🔥🔥
مهم عندي ساعة وأنا نكتب تفاعلووو شوية مكرة في لي تبخل من النصائح
ولي تخدم بالنية وتدي غير حقها وتنصح أدعولها ربي يبارك فيها وفي دراهمها