AR Architecture

** أهمية عملية تحديد ووضع معالم الحدود (BORNAGE) التي يقوم بها المهندس الخبير العقاري وفق المادة 02 من الأمر 95-08 المتعلق بمهنة المهندس الخبير العقاري.

-- لا يمكن التأكد من صحة المخططات الا باستشارة أهل الاختصاص أو القيام بعمليات التوتيد ( مكتب المهندس الخبير العقاري على سبيل المثال)

-- الكثير لا يتأكد من صحة مساحة عقاره و حدوده و شكل العقار في الواقع و المشاكل التي يمكن تواجهه مستقبلا و يكتفي بالاحتفاظ بوثائق لا تحاكي الواقع

المقال أسفله منقول للافادة من صفحة Huissier de Justice

🤚⚠️ فخ " محضر التنصيب والتنفيذ للحكم " اللي يغفلوا عليه الورثة كي يقسمو العقار !

​بزاف ناس كي تخلص المحكمة ويخرج حكم القسمة، يروحوا يجروا للمحافظة العقارية باش يخرجوا الدفتر العقاري 📄. يحسابوا بلي الحكاية فضت.. بصح الحقيقة، الحكاية قادرة تكون عاد بدأت! 💣

​1️⃣ وش الفرق بين "الورقة" و"الواقع"؟ 🤔

​الإشهار العقاري (الورق): المحافظ العقاري يخدم بالستيلو 🖋️، يشوف الحكم إذا يطابق السجلات اللي عنده، يطبع لك الدفتر. هو ما شافش الأرض، ما شاف الحيط، ما شاف الواد.

​التنفيذ الميداني (الواقع): هو نهار يخرج المحضر القضائي 👮 والخبير ومعاه (الطبوغراف) 📏 للأرض باش يقولك: "هاو وين تبدأ حصتك وهاو وين تخلاص".

​2️⃣ علاش "التنفيذ قبل الإشهار" هو الدواء؟ 💊

​ها علاش لازم تجيب المحضر القضائي للأرض قبل ما تروح للمحافظة العقارية:

​📍 تحديد الحدود (Bornage): الخبير يغرس لك المعالم (البيكيات) تاع حصتك قدام خاوتك والجيران. والناس تشوف فيك انت المالك وواقف على حقك وحاضرة قدامك هكذا واحد ما يقولك "دخلت عليا بسنتيمتر". 📏وتماك يعطيك المحضر القضائي محضر يسمة محضر تنفيذ وتنصيب معناه ان الحصة او القطعة الارضية مطابقة وصحيحة لما قضى به الحكم مع الواقع الميداني ✅

​🚫 صمام الأمان (إشكال في التنفيذ): تخيل نهار تخرج للأرض تلقى حصتك فيها:

​حيط مبني من طرف جارك 🧱.

​طريق عمومي فات عليها 🛣️.

​غلطة في القياسات تاع الخبير القديم 📉. هنا المحضر يدير "محضر إشكال في التنفيذ " وتولي للمحكمة تصحح الخطأ وهي سخونة، قبل ما يخرج الدفتر العقاري ويولي التصحيح فيها "محال" أو غالي ومستحيل! لازم تلغي الدفتر و باش تلغي الدقدفتر لازم دعوى قضائية ادارية ضد مسح الأراضي ووووووو .

​3️⃣ النتيجة: واش تخسر واش تربح؟ ⚖️

​❌ إذا تسرعت وأشهرت الحكم مباشرة (بلا تنفيذ ميداني) بلا محضر تنصيب :

​هنا راك تضيع في حقك وأنت ماكش داري. راح تربح "ورقة" مكتوب فيها اسمك (الدفتر العقاري)، بصح في الحقيقة راك شريت "مشكلة مؤجلة لا تنتهي ". نهار تروح تبني أو تسيّج أرضك، تكتشف بلي المساحة ناقصة، أو كاين جار بنى في حقك، أو كاين طريق فات على حصتك. وقتها يولي الدفتر العقاري تاعك "حبر على ورق" وما تقدرش تفرض ملكيتك في الميدان، وتضطر تولي للمحاكم من جديد باش تلغي الإشهار وتصحح الغلطة، وتدخل في صراعات مع الورثة والجيران قادرة تدوم سنين وتورثها حتى لولادك.

​✅ إذا نفذت في الميدان قبل ما تشهر (الطريق الصحيح):

​هنا راك "ثبت ساسك". كي تجيب المحضر القضائي والخبير، راك راح تربح السيطرة الفعلية على حصتك. المعالم (البيكيات) يتغرسوا قدام عينيك، وأي غلطة في القياس أو "ترامي" من الجيران تبان فَمْ قبل ما تخسر دراهم الإشهار. إذا صرا مشكل، المحضر يدير "إشكال في التنفيذ" والقاضي يصحح الوضع وهو مازال "سخون". نهار تخرج الدفتر العقاري تاعك، يخرج دفتر "صافي ومريغل"، يطابق الأرض اللي راك واقف عليها بالمليمتر، وتولي تملك ملكية هادئة، لا فيها نكران من خاوتك ولا مشاكل مع الجيران، وراسك يبقى مرفوع.

💡 النصيحة (خلاصة الهدرة):

​"الملكية في بلادنا ما تكملش غير بـ 'صحة السند' (الورقة مريغلة)، لازم تزيدلها 'مطابقة الميدان' (الأرض مريغلة)." 🤝

​🛑 قاعدة: اللي يتسرع ويشهر حكمه بلا ما يطرصي أرضه، كيما اللي شرا "حوت في بحر".. في الورق راهو ملكه، بصح نهار يحب يرفده، ما يلقاهش! 🐟🌊

​أيا واش قلتوا؟ تبانلكم الحكاية تستاهل نمشي للمحضر القضائي في الأول، ولا نمشي نشهر الحكم اولا و نخلوها للزمان والورثة يكملوا النزاع؟ 🧐📝

مكتبنا يتمنى لكم رمضان مبارك كل عام وانتم بخير