Big Jil

(5 أمور يجب على كل شاب جزائري أن يتقنها / يتعلمها/يمتلكها !)

نشوف بزاف مصغر شباب بين 18 - 25 أو 30 سنة حتى !! جايين للدنيا وناقصين بزاف في وحد الصوالح (مهارات حياتية).. وفي في العادة يجب على المرأ أن يتعلمهم في فترة حياته الأولى..

✅ التعامل مع الإدارة / إستخراج الوثائق .. بزاف مصغر لوكان يطلبولو شهادة جنسية، ولا سوابق عدلية تتلف بيه الدنيا.. تصيبو لا علاقة ..وقد يظطر حتى أن يرسل الوالد ولا الوالدة.. يا أخي ماشي هكا.. بوجي.. سقسي.. أدخل للمواقع أوفيسيال تع الإدارة.. ريغل كواغطك.. أخدم جواز سفرك.. غدوة لا قدر الله الوالدة تروح تداوي.. جات مصيريفة وحبت تروح عمرة ياسيدي.. حبيت تشري سيارة لازم تعرف كيفاه تباري، والكارت جريس كيفاه تخرجها.. كيفاه تكتب شيك.. لازملك كونت ccp .. بطاقة ذهبية.. لازم تكون أكتيف.. وسقسي عادي بدون أي عقدة من موظفي الإدارات..
✅ يا خاوتي السيارة ولات أمر لازم للأسف في بلادنا. وحتى إن ما زال ما كتبلك ربي تكون عندك وحدة. لازم لازم لازم..رخصة السياقة. ولازم تعرف أساسيات إستعمال السيارة.. وينتا تدير الفيدونج.. ليبوجي كيفاه يتبدلو.. كيفاه تدير رودة روتسكور كي تطيح أونبان..أوقف مع الميكانيسيان كي يكون يخدم تعرف سيارتك واش فيها ماشي يدغولك وتطبع برك كي البوجادي.

✅ البريكول الخفيف تع الدار.. هاذي حاجة مهمة بزاف.. عيب والله.. عين تقطر تعيط لبلومبي يبدلهالك ب 80 الف مثلا ؟ بريزة نحرقت ليكتريسيان يجبد عليك ب 100 الف ؟بريكولة صغيرة تع سبيغة مثلا الحاجة قالتلك بيفي قديم تنجر وقاعد سوفونير حبت تسبغو.. ياك بانسو وبيدون سبيغة وأنت فريتها.. باص تع الباب تكسر لازم تريغلو.. عفايس صغار هكا.. المهم خنتش ما تبقاش هكاك..

✅ أساسيات الطبخ والتخييم والصيد !.. من نعم الله على المرأ السياحة و التخييم برا.. واللي حاكمة عليهم الصيادة يحكولكم.. camping sauvage يتطلب أن تحسن الطبخ، تبني عشة بالقصب.. كيفية إشعال النار، وصدقني راح تتنعم وتحس بذوقها خير من hotel 4 نجوم.. وستبقى لك ذكريات جميلة 🙂

✅ (أهم نقطة).. الأساسيات في دينك. إحفظ حزبين من القرآن أو سورا قصيرة على الأقل لتصلي بها.. أحفظ أحاديث من الأربعين النووية.. كيفية ترقيع صلاتك إن سهوت.. زكاة مالك.. تعرف تحسب قيمتها وتخرجها ؟ لا قدر الله موت في العائلة (ربي يطول في عمار من تحبون) تعرف شروط الدفن، تعرف قواعد التغسيل؟ يحكون لنا أن أشخاص لم يستطيعو دفن أبيهم حتى لأنهم بعيدون جدا عن الدين (الله يهدينا جميعا).. يا خاوتي الدنيا هاذي لاتدوم لأحد.. الإنسان يقرى حساب للعاقبة وما يبقاش يجري وراء الدنيا.

⚠️ في الأخير.. أنا أحترم نوعا من الشباب.. تصيبو مصغر.. بصح حربي.. وين تحوس عليه تصيبو.. الحطة تع واحد (أنوش كيما يقولو) مي هو حربي وفحل وتتكل عليه... ويبقى شاد في دينه رغم كل المغريات، ربي يقدر الجميع. ولنكن رجالا ❤

كتبها عبد الله مولاي ذات صباح بكل ⁦❤️⁩ و 🌹.

walah ma tnédmou !!!!

وفاة المحامية السابقة لجبهة التحرير الوطني جيزيل حليمي باريس - توفيت اليوم الثلاثاء بباريس المحامية المعروفة و المثقفة جيزيل حليمي، احدى أبرز المدافعين عن القضية الوطنية خلال حرب التحرير الجزائرية عن عمر ن...

#سعس