HNS STORE

اليوم راهي صورتهم في الأخبار… لكن غدوة ممكن تكون صورتي أنا أو انت
أول مرة يأثر فيا حدث ويخليني نعاود حساباتي ونطرح ألف سؤال وسؤال…

🚍 شفتو الحافلة اللي طاحت في واد الحراش؟ كانت معمرة بالناس…
كل واحد خرج في ذاك الوقت لسبب، لكن ولا واحد كان يتوقع أنو هذاك اليوم هو آخر يوم في حياته.

💭 تخيلو لو كان واحد تارك الصلاة من سنين…
أو وحدة متبرجة، ولا خارجة متعطرة…
أو واحد غارق في الحرام، ولا ظالم، ولا ماكل حق يتيم…
الموت ما عطاهمش وقت باش يتوبو، ما عطاهمش حتى فرصة يسجدو سجدة لله، ولا يقولو “استغفر الله” بصدق.

⏳ في ثانية وحدة، كانو قاعدين عادي على كرسي الحافلة… وثانية بعدها لقاو رواحهم في ظلمة القبر.

✋ هنا لازم نوقفو ونسقسو رواحنا:
أنا؟ وانت؟ هو وهي؟
لو يجي ملك الموت الآن… واش تكون حالنا؟
واش نكونو لابسين؟ واش نكونو نقولو؟ واش نكونو نديرو؟
هل نكونو على طاعة؟ ولا في معصية؟
هل نكونو مآدين صلواتنا؟ ولا تاركين الصلاة؟
هل نكونو بارّين بوالدينا؟ ولا غارقين فالعقوق؟

⚠️ ما نضحكوش على رواحنا بكلمة “غدوة نتوب”…
غدوة نبطل التلاقط؟ غدوة نبدا نصلي؟ غدوة نبطل نسمع موسيقا؟
غدوة يمكن ما نكونوش بين الأحياء…

🕊 الموت ما يعرفش صغير ولا كبير، ما يستأذنّش، وما ينبهش.
اليوم رانا نقراو خبرهم ونقولو “الله يرحمهم”…
لكن غدوة، الناس راح تقرا خبرنا. واش راح تقول علينا؟ والأهم: واش من عمل نلقاو به ربي؟

🤲 يا خويا، يا أختي…
استغلو الوقت اللي باقي، صلّو قبل ما ما تقدرش تصلو.
استرو رواحكم قبل ما يجي يوم تخرج فيه الروح وما عاد الستر ينفع.
توبو قبل ما تتمنو ترجعو دقيقة وحدة وما تلاقوش.

🌹 اللهم احسن خاتمتنا، ونجّينا من الموت على معصية، وارزقنا الموت على طاعة ترضيك 🤲