Adel infos

علاه البرازيلي يهرب من الفقر بكرة القدم؟ وعلاه الباكستاني والهندي يهربوا من الفقر بالانترنت؟ و علاه الشاب الجزائري مازال يستنى في منصب عمل عند الدولة؟

​في 2018، فصلوني من العمل في 3 شركات مختلفة في أقل من عام.. انعم 3 مرات! ولكن في نفس هذاك العام درت أكثر من 20 مقابلة عمل..

كيفاش واحد كل مرة يفصل من العمل تجيه فرص كيم هك؟

السر ماشي معريفة السر أني كنت مريسكي و متعلم صنعة مطلوبة و قليل ليخدمها

​في الهند وباكستان تصيب طفل في عمره 10 سنين والديه يحطوه قدام ميكرو مع يوتيوب يتعلم التصميم والبرمجة.. علابالهم بلي هذا هو الطريق الوحيد باش يخرجهم من الميزيرية.. والنتيجة؟

اليوم المدراء التنفيديون لأكبر شركات العالم هنود.
​حنا في الجزائر ورثنا عقلية أقرى يا وليدي باش تولي مسوري عند الدولة.. والنتيجة؟

شباب ما يعرفش حتى يسجل روحه في موقع عدل أو منحة البطالة .. أمية رقمية و الكارثة بين الشباب

​عقلية الربح السريع هي لي خلاتنا نافوصيو لاريار
​علاه رانا نشوفو ليوم الشبيبة تقمر على الماتشات وعلاه واحد مستعد يحط 120 مليون باش يحرق في بوطي ونسبة نجاحه ضئيلة وغالباً ينتهي به المطاف يسرق باش يعيش؟

​لأننا نحوسوا على الساهلة... الجزائري حاشا لي ما يستاهلش ما يحبش يتعب ذهنياً يحب الواجدة .. ما عندوش الصبر باش يريح عام كامل يتعلم حرفة كما البرمجة، تصميم، تسويق و غيرهم رغم أن الإنترنت معمر بمصادر مجانية للتعلم

عاودت الباك 3 مرات باش ندخل للجامعة، وفي نص العام الأول بطلت وخرجت.. علاه؟ لأني شفت بلي الجامعة ما راحش توصلني.. ريسكيت
روحت نحوس على خدمة بالمجال تاع التصميم الثلاثي الأبعاد لبديت نتعلمه في ال 2009 عقلية الهندي

خدمت باطل مع مهندسين معماريين، تحقرت، وما خلصتش مرات.. بصح هذيك كانت ضريبة التعلم.
​الخدمة ماشي غير شانطي!

​ العالم تبدل.. الخدمة مراهيش غير بريكول
وخدمة تاع دراع.. كاين ملايير تدور في الانترنت.

شركات العالم كامل تحتاج التصميم، تحتاج مواقع تحتاج تسويق.. راح يشوفو كانش هندي في نيودلهي يخدمها
علاه ماش جزائري في ميلة ؟

​نقدروا ننافسوا الهنود و الباكستانيين نعم، الجزائري ذكي ، ولكن لازم ينحي عقلية السوسيال و الاتكالية ويدير في باله بلي لازم يتعب عام ولا عامين و حتى ما يدخلش دراهم باش يوصل لمستوى احترافي يخليه يبدأ ينافس

​راح نقولك من الاخير الباكستانيين مستحوذين على مواقع العمل الحر و من الأسباب انهم متحدين و يدعموا بعض و عندهم شبكات يسموها شبكات ال Vvro
دورها يشروا الطلبيات على بعضهم من اجل كسب التقييمات و رفع تقييم خدماتهم على منصات العمل الحر
و هذا اهم سبب لاستحواذهم على المنصات و الأمر تقدروا نطبقوه في الجزائر...

الخدمة ليسلكوك بالدينار راح تخلي مستواك المعيشي يسوء في كل مرة رانا نشوفو اليوم الدينار ينهار و الأورو بعد فترة قصيرة راح يوصل ل 300 دج ، نصيحة إذا كان بإمكانك تبدأ تتعلم كانش حرفة مطلوبة عبر الإنترنت غير ابدأ اليوم قبل غدوة

في منشورات أخرى سأشرح كيف تتعلم و تسوق لخدماتك ان شاء الله