Sport For Development

Heydər Əliyev Fondunun təşəbbüsü ilə təşkil olunan və artıq ənənəyə çevrilmiş Bakı Marafonu 2025-də komandamız uğurla təmsil olunmuşdur. “Küləyə qalib gəl” şüarı altında baş tutan bu möhtəşəm idman tədbirində komandamız 2 nümayəndə - Səməndər Allahverdiyev və Şamil Qorxmaz oğlu ilə iştirak edib. Onlar yarış boyunca böyük əzmkarlıq göstərərək finiş xəttinədək var gücləri ilə irəliləmişlər.

Bu cür tədbirlər cəmiyyətə sağlam həyat tərzinin təbliği və həmrəyliyin gücləndirilməsi baxımından mühüm əhəmiyyət daşıyır. Biz də bu marafonda iştirak etməklə bir komanda olaraq həm fiziki gücümüzü, həm də iradəmizi sınamaq fürsəti qazandıq.

Qeyd edək ki, builki Bakı Marafonuna ümumilikdə 28 minədək iştirakçı qatılıb.

"Yaşıl Dünya və İnklüziv İdman" layihəsinin rəsmi açılış tədbiri keçirildi

06 mart 2025-ci il tarixində Elm və Təhsil Nazirliyinin "Təhsildə İnkişaf və İnnovasiyalar üzrə VIII qrant müsabiqəsi" çərçivəsində, TOPs layihəsinin təlimçisi, Bakı Avropa Liseyinin müəllimi Şamil Qorxmaz oğlu tərəfindən təqdim olunmuş və uğur qazanmış "Yaşıl Dünya və İnklüziv İdman" layihəsinin rəsmi açılış tədbiri keçirildi.

Tədbirdə məktəb rəhbərliyi, müəllimlər, şagirdlər və dəvət olunmuş qonaqlar iştirak etdilər. Layihənin rəhbəri Şamil Qorxmaz oğlu açılış nitqində layihənin məqsədləri və əhəmiyyəti barədə geniş məlumat verdi. O, idmanın sağlamlıq üçün əhəmiyyətini, şagirdlərdə idmana marağın artırılmasının vacibliyini və inklüziv mühitin yaradılmasının önəmini vurğuladı.

Daha sonra layihənin eksperti Vəli Musayev çıxış edərək layihənin praktik tətbiqi və gözlənilən nəticələri haqqında danışdı. O, layihə çərçivəsində təşkil olunacaq idman tədbirlərinin fiziki aktivliyi artırmaqla yanaşı, inklüzivliyin inkişafına da töhfə verəcəyini qeyd etdi. O bildirdi ki, bütün şagirdlərin bərabər şəkildə iştirak edə biləcəyi bir mühitin yaradılması əsas prioritetlərdəndir və bu yanaşma onların sosial bacarıqlarının formalaşmasına kömək edəcək. Eyni zamanda "Yaşıl Dünya" anlayışının layihənin əsas istiqamətlərindən biri olduğunu qeyd edərək, ekologiyanın qorunmasının gələcək nəsillər üçün nə qədər vacib olduğunu vurğuladı.

Daha sonra məktəb rəhbərliyi söz alaraq fiziki fəaliyyətin təkcə bədənə deyil, eyni zamanda zehni fəaliyyətə göstərdiyi müsbət təsirlərdən danışdı. Rəhbərlik qeyd etdi ki, mütəmadi idmanla məşğul olan şagirdlərdə konsentrasiya və yaddaş güclənir, stress səviyyəsi azalır və dərs müvəffəqiyyəti artır. Eyni zamanda, idmanın şagirdlərdə intizam və məsuliyyət hissini inkişaf etdirdiyini, onlara öz vaxtlarını düzgün idarə etməyi öyrətdiyini vurğuladı.

📌 Layihənin məqsədləri:
✅ Şagirdlərdə idmana marağı artırmaq
✅ Sağlam həyat tərzini təşviq etmək
✅ İnklüziv idman mühiti yaratmaq
✅ Ekoloji maarifləndirməni gücləndirmək
✅ Fiziki fəaliyyətin şagirdlərin akademik göstəricilərinə müsbət təsirini artırmaq

Tədbirin ikinci hissəsində şagirdlər idman zalında müxtəlif oyunlar və məşğələlərdə iştirak edərək layihənin praktiki hissəsini təcrübədən keçirdilər.

Layihə 3 ay müddətində 3 məktəbdə həyata keçiriləcək. Bu layihənin şagirdlərin idmana marağını artıracağına, onların sağlam həyat tərzinə və akademik nailiyyətlərinə müsbət təsir göstərəcəyinə inanırıq.

Sentyabrın 27-si Azərbaycanda Anım Günüdür. Prezidenti İlham Əliyevin 2020-ci il 2 dekabr tarixli Sərəncamına əsasən təsis edilən Anım Günü Vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarından keçmiş etmiş əsgər və zabitlərimizə, bütün şəhidlərimizə dərin ehtiramın ifadəsidir.
Prezident, Müzəffər Ali Baş Komandan İlham Əliyev Vətən uğrunda canından keçən şəhidlərimizin xatirəsinə daim yüksək ehtiram göstərir, onların xatirəsinin əbədiləşdirilməsini, eləcə də qazilərimizin müalicəsini və sağlamlıqlarının bərpasını diqqət mərkəzində saxlayır. Dövlətimizin başçısı Vətən müharibəsinin başa çatması ilə bağlı xalq müraciətində bu barədə deyib: “Birinci Qarabağ və İkinci Qarabağ müharibələrinin şəhidləri bizim qəlbimizdə əbədi yaşayacaq
Bu gün səhər saatlarından başlayaraq respublikamızın bütün şəhər və rayonlarinda, o cümlədən azad edilmiş ərazilərimizdə anım mərasimləri keçirilir, xalqımız Vətən uğrunda canlarını fəda etmiş qəhrəman şəhidlərimizin xatirəsini qürurla yad edilir.
Biz də Ağcabədi Reabilitasiya mərkəzi olaraq müəllim və şagird kollektivi ilə şəhidlərimizin ruhunu yad etdik. Şagirdlərimiz vətən uğrunda canından keçən şəhidlərimizin ruhuna şerlər söyləyərək, rəsm çəkərək yad etdilər. Allah bütün şəhidlərimizə rəhmət eləsin. Qazilərimizə kömək olsun.

Fiziki tərbiyə müəllimi və TOPs proqramının təlimçisi Səməndar Allahverdiyev, gənclər arasında idmanın təşviqindəki uğurları ilə diqqət çəkir. Onun bu sahədəki fəaliyyəti nəticəsində çox sayda gənc idmana maraq göstərməyə başlamış və sağlam həyat tərzinə istiqamətləndirilmişdir. Olimpsport.az jurnalında dərc edilən məqalədə Səməndar Allahverdiyevin idman sahəsindəki xüsusi əməyi və töhfələri üçün ayrılmış yazı hissəsi, onun həm müəllim, həm də təlimçi kimi bu sahədəki rolunu vurğulayıb.

TOPs proqramı üzrə müasir təhsil texnologiyalarının yaradılması layihəsi Azərbaycan Respublikası Elm və Təhsil Nazirliyi, Azərbaycan Dövlət Bədən Tərbiyəsi və İdman Akademiyası, British Council Azerbaijan, həmçinin”İnkişaf Naminə İdman” İctimai Birliyinin birgə iştirakı və dəstəyi ilə 2014-2015-ci tədris ilindən həyata keçirilir.